U šerahu haradoŭ Ispanii i Italii prajšli demanstracyi suprać zališniaha turyzmu. Mitynhoŭcy patrabujuć prymać mienš padarožnikaŭ.
Demanstracyi suprać «niekantralujemaha turyzmu» prajšli ŭ papularnych siarod padarožnikaŭ haradach Ispanii i Italii ŭ niadzielu, 15 červienia. Tak, kala šaścisot čałaviek pryniali ŭdzieł u mitynhu ŭ Barsiełonie, piša DW.
Prysutnyja skandavali: «Vaš vodpusk — majo niaščaście» i trymali ŭ rukach płakaty z nadpisami: «Masavy turyzm zabivaje horad» i «Ich prahnaść hubić nas».
Niekatoryja ź ich taksama stralali z vadzianych pistaletaŭ i lapili na vitryny kram i hateli nalepki «Turysty, prybirajciesia dadomu».
Za minuły hod Barsiełona z nasielnictvam u 1,6 miljona čałaviek pryniała 26 miljonaŭ turystaŭ, zaznačaje Reuters.
Pratesty z patrabavańniami skaracić turystyčny patok prajšli i ŭ inšych haradach paŭdniovaj Jeŭropy: u pryvatnaści, u Małazie, Palma-de-Majorcy, San-Siebaśćianie, Hranadzie i na vostravie Ibica ŭ Ispanii, a taksama ŭ Hienui, Palerma, Nieapali, Miłanie i Vieniecyi ŭ Italii. U apošnim horadzie pratestujučyja chočuć nie dapuścić budaŭnictva dvuch novych atelaŭ, jakija zmohuć prymać kala 1500 turystaŭ. Taksama ŭ Vieniecyi pratestavali suprać viasiella tam amierykanskaha miljardera Džefa Biezasa.
U 2025 hodzie vydatki na mižnarodnyja pajezdki ŭ Jeŭropie mohuć vyraści na 11 pracentaŭ da 838 młrd dołaraŭ ZŠA (727 młrd jeŭra). Čakajecca, što rekordnuju kolkaść turystaŭ prymuć Francyja i Ispanija.
Kamientary