Dziaŭčyncy z Polščy, achviaravać hrošy jakoj zaklikaŭ biełarus, sabrali patrebnuju sumu
10 dzion tamu Aleś Kudrycki zapuściŭ fłešmob u padtrymku dabračynnaha zboru dla dziaŭčynki ź Biełastoka. Takim čynam jon prapanavaŭ nie prosta dapamahčy dziciaci, ale i pakazać palakam salidarnaść biełarusaŭ, niahledziačy na paharšeńnie staŭleńnia da inšaziemcaŭ.
«Ja vypadkova pabačyŭ na Siepomaga [płatforma dla zboru srodkaŭ] abjavu dziaŭčynki Kasi ź Biełastoka. Baćki źbirajuć joj na kurs reabilitacyi — kab navučyć jaje lepiej chadzić […]. Hrošy treba adnosna nievialikija, ale dapamoha budzie darečy. Prapanuju pieraličyć choć by nievialikuju sumu dla padtrymki Kasi i padpisać jaje tak: Piąteczka od wolnej Białorusi! («Łavi piać ad Volnaj Biełarusi!»)», — napisaŭ tady Aleś Kudrycki.
Ahulny podpis dazvoliŭ by adroźnić biełaruskija achviaravańni ad inšych u ahulnym śpisie danataŭ.
Pa słovach aŭtara, meta takoha fłešmobu nie tolki dapamahčy dziciaci, ale i prademanstravać palakam svaju salidarnaść:
«Zaraz šmat abmierkavańniaŭ pra paharšeńnie staŭleńnia da čužaziemcaŭ u Polščy — dyk chočacca dać na heta asabisty adkaz z pazicyi nie kryŭdy, ale lubovi».
Historyja maleńkaj Kasi ź Biełastoka raźmieščana na sajcie Siepomaga. Jana naradziłasia na 30-m tydni ciažarnaści i z samaha naradžeńnia mieła patrebu ŭ miedycynskaj dapamozie. U 2023 hodzie joj praviali apieracyju na tazaściehnavym sustavie i ŭstalavali mietaličnuju płaścinu, jakuju nieŭzabavie treba budzie vydalić. Paśla hetaha spatrebicca intensiŭnaja trochtydniovaja reabilitacyja ŭ varšaŭskim centry Olinek, dzie dziaŭčynka ŭžo dasiahnuła značnaha prahresu raniej.
Kali Aleś ahučyŭ ideju, było sabrana kala 2191 złotaha (511 jeŭra — heta ŭsie danaty, a nie tolki biełaruskija).
Zaraz usia suma sabranaja i navat krychu bolej: 11 511 złotych (prykładna 2700 jeŭra).
Kamientary