Daśviedčanaha aŭdytara pasadzili za palityku i dadali ŭ śpis «terarystaŭ»
Ivan Kavalenka bolš za 20 hadoŭ pracuje ŭ śfiery aŭdytu. Jon pracavaŭ u kampanijach «vialikaj čaćviorki» i źjaŭlajecca členam brytanskaj asacyjacyi prysiažnych buchhałtaraŭ ACCA. Ciapier Ivan za kratami.
Ivanu Kavalenku 51 hod, jon z Baraŭlanaŭ. U 1996 hodzie skončyŭ lačebny fakultet Biełaruskaha dziaržaŭnaha miedycynskaha ŭniviersiteta. Ale ŭ miedycynie jon zatrymaŭsia nienadoŭha — adpracavaŭšy piać hadoŭ, pastupiŭ u Vyšejšuju škołu kiravańnia i biznesu pry Biełaruskim dziaržaŭnym ekanamičnym univiersitecie pa śpiecyjalnaści «buchhałtarski ŭlik».
U 2001-m Ivan pačynaje pracavać u śfiery finansaŭ. Siem hadoŭ adpracavaŭ finansavym menedžeram u kampanii «SoftŁajn Bieł». Z 2009 pa kaniec 2010 pracavaŭ u kampanii KPMG Audit, jakaja ŭvachodzić u «vialikuju čaćviorku» aŭdytarskich kampanijaŭ.
Z 2011 pa 2022 hod mužčyna pracavaŭ u biełaruskim ofisie kampanii BDO, dzie daros da partniora i dyrektara pa kansałtynhu. BDO — piataja pa vieličyni ŭ śviecie aŭdytarskaja sietka. Apošniaje miesca jahonaj pracy — kampanija Business Assurance, dzie jon byŭ partnioram i kiraŭnikom napramkaŭ mieniedžmientu ryzyk i kantrolu jakaści.
U 2009 Ivan staŭ paŭnavartasnym čalcom ACCA — prestyžnaj arhanizacyi, jakaja jadnaje śpiecyjalistaŭ u śfiery finansaŭ, uliku i aŭdytu pa ŭsim śviecie. A ŭ 2014 hodzie atrymaŭ tytuł FCCA — hanarovaha siabra arhanizacyi. Takich ludziej u Biełarusi niekalki dziasiatkaŭ.
U 2013 hodzie Kavalenka prajšoŭ kvalifikacyju Ministerstva finansaŭ na aŭdytara i atrymaŭ atestat. U tym ža hodzie atrymaŭ paśviedčańnie Nacbanka pra toje, što moža być aŭdytaram u bankach i niebankaŭskich kredytna-finansavych arhanizacyjach. Udzielničaŭ u šmatlikich prafiesijnych kanfierencyjach.
Apošni raz Kavalenka byŭ anłajn 8 miesiacaŭ tamu — u toj čas jaho i zatrymali. Jaho asudzili ŭ 2025 hodzie pa dvuch artykułach — «zakliki da pryčynieńnia škody Biełarusi» (č. 3 art. 361 KK) i «raspalvańnie varožaści» (č. 1 art. 130 KK). Ivanu pahražała ad 4 da 12 hadoŭ kałonii pa pieršym z artykułaŭ. 16 červienia Kavalenku ŭklučyli ŭ śpis «terarystaŭ», jaki składaje KDB.
Ciapier Ivan za kratami. Dakładny prysud i sutnaść abvinavačańniaŭ nieviadomyja.
«Naša Niva» — bastyjon biełaruščyny
PADTRYMAĆCiapier čytajuć
«Stajać na svaim, kožny na kolki moža!». Vialikaja hutarka z Natallaj Dulinaj pra hopnikaŭ z HUBAZiKa, Kaleśnikavu i što tam u kaho ŭ kałonii4
Kamientary