«Kidaje ŭ nas kučy haŭna». Tramp zajaviŭ pra svaju niezadavolenaść Pucinym
Prezident ZŠA Donald Tramp rezka vykazaŭsia pra Uładzimira Pucina, abvinavaciŭšy jaho ŭ niežadańni spynić vajnu va Ukrainie. Pavodle jaho słoŭ, skazanych padčas pasiadžeńnia amierykanskaha ŭrada, Pucin «kidaje ŭ nas kučy haŭna [bullshit]», piša The Guardian.
Tramp padkreśliŭ, što vajna, jakaja idzie ciapier, nikoli nie pavinna była pačacca, i adznačyŭ vialikija čałaviečyja straty. Jon zajaviŭ, što chacia Pucin i zachoŭvaje vietlivaść u pieramovach, usio heta akazvajecca pustymi słovami. Taksama jon nie vyklučyŭ uviadzieńnie novych sankcyj suprać Rasii: «Ja razhladaju heta».
Tym časam były śpikier Pałaty pradstaŭnikoŭ Ńjut Hinhryč paviedamiŭ, što 9 lipienia ŭ Kanhres budzie pradstaŭleny zakonaprajekt ab «skryšalnych» sankcyjach suprać Rasii, raspracavany sienataram Lindsi Hremam. Hinhryč nazvaŭ dakumient «važnym sihnałam Pucinu» i padkreśliŭ, što ciarpieńnie da jaho pavodzin u amierykancaŭ zakančvajecca.
Sienatar Lindsi Hrem raniej zajaŭlaŭ, što zakon praduhledžvaje mahčymaść dla Trampa ŭvieści 500%-ja myty na tavary z krain, jakija kuplajuć rasijskija pradukty, u tym liku naftu i haz. Jon padtrymaŭ namiery Trampa spynić vajnu, ale adznačyŭ, što dla miru patrebnyja abodva baki — i kali Ukraina hatovaja da pieramoŭ, to Pucin pakul nie.
Hrem ličyć, što ciapier samy čas uzmacnić cisk na Rasiju, i paviedamiŭ, što zakonaprajekt užo padtrymali 85 sienataraŭ, prytym kolkaść prychilnikaŭ raście.
Choć Tramp padčas svaich pieršych zvankoŭ Pucinu paśla viartańnia ŭ Bieły dom śćviardžaŭ, što toj nibyta choča miru, na spravie Rasija tolki ŭzmacniała ataki na Ukrainu — i ciapier navat Tramp heta pryznaje.
Ciapier čytajuć
Kamientary
Łuchta [sabačaja] — voś pravilny pierakład.