Pary, jakija paznajomilisia ŭ internecie, mienš ščaślivyja? Voś što kaža novaje daśledavańnie
Z-za papularnaści dadatkaŭ dla anłajn-znajomstvaŭ znajści sapraŭdnaje kachańnie moža być praściej, čym kali-niebudź raniej. Niadaŭna navukoŭcy daśledavali, jak akaličnaści sustrečy z partnioram upłyvajuć na jakaść nastupnych adnosin. Ich vyniki mohuć stać sumnaj navinoj dla tych, chto paznajomiŭsia anłajn.
Jak piša Newsweek, amierykanskija navukoŭcy ŭ svaim daśledavańni paraŭnoŭvali siamiejnyja pary, jakija paznajomilisia dziakujučy internetu, z tymi, chto heta zrabiŭ tradycyjnym čynam — na pracy, škole, carkvie, praz ahulnych znajomych, susiedziaŭ ci siamju.
U im pryniali ŭdzieł 923 pary, ź jakich amal pałova paznajomiłasia dziakujučy roznym dadatkam, takim jak eHarmony, Grinder, Match, Tinder.
Udzielniki daśledavańnia byli adabrany takim čynam, kab adpaviadać danym ab uzroście, rasie i połu Biuro pierapisu nasielnictva ZŠA.
Jak adznačajuć, aŭtary, zhodna z danymi Statista, za pieryjad z 1995 pa 2017 hod kolkaść par, jakija paznajomilisia dziakujučy internetu, vyrasła z 2% da 39%. Tamu nie dziŭna, što siarod hetaj hrupy ŭ asnoŭnym maładyja pary, što niadaŭna ŭstupili ŭ šlub.
I dziakujučy značna šyrejšamu pułu mahčymych partnioraŭ, jakich daje internet, hetyja ludzi časta mieli bolš dośviedu ŭ spatkańniach da taho, jak pastajanna źviazalisia sa svajoj pałovaj, čym tyja, chto nie karystaŭsia anłajn-znajomstvami.
Razam z hetym tyja, chto sustreŭ adno adnaho anłajn, časta sutykalisia i z vonkavym ciskam, naprykład, z hramadskaj marhinalizacyjaj — stracham, što ich adnosiny ci sposab, jakim jany paznajomilisia, nie buduć šyroka pryniatyja hramadstvam.
Pa słovach navukoŭcaŭ, šluby, jakija skłalisia dziakujučy anłajn-znajomstvaŭ, taksama bolš rasava i seksualna raznastajnyja. Jany spasyłajucca na papiaredniaje daśledavańnie, jakoje pakazała, što anłajn-znajomstvy amal udvaja bolš papularnyja siarod leśbijanak, hiejaŭ i biseksuałaŭ, čym siarod hieteraseksualnych ludziej.
Aŭtary adznačajuć, što tyja, chto paznajomiŭsia anłajn, paviedamlali pra bolš nizki ŭzrovień zadavolenaści i stabilnaści šlubu, što śviedčyć pra mienš jakasnyja adnosiny ŭ paraŭnańni z parami, jakija sustrelisia asabista.
Adnak, niahledziačy na heta, ich acenki ŭsio jašče byli vyšej za siaredniuju adznaku pa škale zadavolenaści i stabilnaści, što aznačaje, što šlub u ludziej, jakija paznajomilisia anłajn, u cełym usio ž maje vysokuju jakaść.
Daśledčyki vykazali zdahadku, što anłajn-znajomstvy parušyli tradycyjnuju sistemu znajomstvaŭ, u tym liku dazvoliŭšy ludziam sustrakacca, niahledziačy na toje, što jany nie žyvuć pobač, i pryviali da taho, što siabry i svajaki nie sustrakalisia z partnioram i nie vykazvali svajo mierkavańnia pra jaho, pakul adnosiny ŭžo nie byli sfarmavanyja.
Adsutnaść fizičnaj blizkaści z patencyjnym partnioram u takich znajomstvach moža pryvieści da taho, što ludzi pačynajuć kampiensavać heta bolš hłybokaj emacyjnaj blizkaściu i adčuvać siabie bolš raźniavolena dla taho, kab padzialicca svaim sapraŭdnym «ja». Takoje rańniaje raskryćcio, na dumku daśledčykaŭ, moža stać mocnym padmurkam dla šlubu.
Aŭtary taksama źviartajuć uvahu na źmienu sposabu pracy płatformaŭ anłajn-znajomstvaŭ. Kali jany tolki źjavilisia, to byli aryjentavanyja na bolš navukovy padbor partnioraŭ, u ich vykarystoŭvalisia pošukavyja filtry, kab padbirać ludziej z ahulnymi zachapleńniami i intaresami.
Ale ciapier, pavodle daśledčykaŭ, heta źmianiłasia: na pieršy płan vyjšli ałharytmy, jakija, jak u dadatku Tinder, staranna vyvučajuć, kaho my «pravodzim» naprava, a kaho «zmachvajem» naleva.
Kamientary