«Prapanoŭvaŭ dva błoki Winston, kab pieradali Znaku list». Były palitviazień Dźmitry Michajłaŭ — pra Maksima Znaka

Pra heta «Svabodzie» raskazaŭ Dźmitryj Michajłaŭ, hramadzianin Łatvii, jaki pravioŭ u biełaruskaj turmie try z pałovaj hady za svaje vykazvańni ŭ zakrytym čacie ŭ adnym ź miesiendžaraŭ.

Vyzvalili Dźmitryja 21 červienia 2025 hoda razam ź inšymi biełaruskimi palityčnymi źniavolenymi paśla vizitu śpiecyjalnaha pasłańnika Trampa ŭ Minsk. U intervju «Svabodzie» Dźmitryj Michajłaŭ raspavioŭ, što viedaŭ i čuŭ pra Maksima Znaka, znachodziačysia ź im u adnoj kałonii.

— Situacyja ź im dziŭnaja. Za niekalki miesiacaŭ da taho, jak ja trapiŭ u kałoniju, mnie raskazali, što Maksim byŭ u joj, što jon tam byŭ u dziaviatym atradzie. Navat niejkija hiry dla sportu, zdajecca, nabyŭ ci rodnyja pieradali. I pamiataju, tymi hirami Znaka navat zajmalisia niekalki miesiacaŭ. A potym jaho pasadzili ŭ ŠYZA. Heta było ŭ 2022 hodzie. U ŠYZA — i ź pieravodam u tak zvanaje PKT — pamiaškańnie kamiernaha typu. Heta jak by turma ŭnutry łahiera. To bok ty znachodzišsia, žyvieš pa kamiernym režymie. Nu i voś da 21 červienia 2025 hoda jon adtul nie vychodziŭ.

Ja mahu skazać, što jon dakładna žyvy, bo na toj momant, kali ja byŭ u ŠIZA, ja jaho čuŭ: jaho pieravodzili z ŠYZA ŭ PKT. Pa hołasie jon byŭ taki badziorańki. Ja viedaju, što jon vielmi šmat knih zamaŭlaje, čytaje vielmi šmat. Pa listach — nie viedaju, ci moža jon tam pierapisvacca, ale čytaje jon šmat.

Ja ŭvieś čas sprabavaŭ niešta pra jaho daviedacca, prapanoŭvaŭ chłopcam, chto chodziać tudy — ciapier užo možna skazać — prapanoŭvaŭ dva błoki Winston, kab pieradali jamu list. Jany kažuć: «Dzima, my lubomu inšamu choć kumpiak voś taki pieradadzim. A jamu — ničoha!». To bok tamu, chto jamu niešta pieradaść — tamu ŭsio, adrazu prosta ž**pa.

Kali ja sam byŭ u ŠYZA, adzin raz sprabavaŭ da jaho dakryčacca — ale tam pa kalidory nie tak prosta heta zrabić — prosta dakryčacca: «Maksim, trymajsia, ciabie pamiatajuć, ciabie nie zabyli, usio budzie dobra». Ale, na žal, ja dumaju, što jon, napeŭna, nie čuŭ.

Čamu byŭ addadzieny taki zahad?.. Voś, naprykład, kali Siarhiej Cichanoŭski — jon ža ŭ turmie pravioŭ 5 hadoŭ, tak? Čamu Maksim Znak siadzić nie ŭ turmie i nie ŭ łahiery, a ŭ PKT 2,5 hoda? Heta nie da mianie pytańnie. Chutčej za ŭsio, navat i nie da kałonii VK-3.

Ale ciažka, viadoma, dumaju, jamu tam — ciažka ad słova «zusim». Chaciełasia b, kab za jaho, moža, jak maha chutčej pazmahalisia.

• 0
• 0
• 0
• 0
• 0
• 0
• 0
• 0