Padvodny dron padparadkavaŭsia apierataru pa adlehłaści 16 tysiač kiłamietraŭ
Jašče niekalki hadoŭ tamu heta vyhladała b jak fantastyka: čałaviek u Aŭstralii kiruje padvodnym bieśpiłotnikam u vodach Anhlii. Ale sioleta heta ideja stała realnaściu.
Jak piša Focus.pl, padčas sumiesnych vučeńniaŭ Talisman Sabre u lipieni byŭ praviedzieny histaryčny ekśpierymient: apieratar u Aŭstralii paśpiachova kiravaŭ bieśpiłotnaj padvodnaj łodkaj, jakaja znachodziłasia ŭ vodach kala Plimuta —za 16 000 kiłamietraŭ. Vyniki vyprabavańniaŭ abnarodavali tolki ŭ žniŭni, bo vajskovym analitykam patrabavaŭsia čas dla pravierki nadziejnaści atrymanych dadzienych.
Ekśpierymient adbyŭsia ŭ miežach prahramy AUKUS Pillar II — partniorstva pamiž Aŭstralijaj, Vialikabrytanijaj i ZŠA, aryjentavanaha na raspracoŭku pieradavych abaronnych technałohij. Asnoŭnaja navina ŭ tym, što ŭpieršyniu na praktycy ŭ ramkach apieracyi Maritime Big Play była prademanstravana poŭnaja ŭzajemazamianialnaść padvodnych bieśpiłotnikaŭ hetych krain.
Da apieracyi dałučyłasia i Japonija, jakaja jašče ŭ 2024 hodzie abviaściła pra sumiesnuju pracu ŭ śfiery padvodnaj akustyčnaj suviazi — klučavoha elemienta takich apieracyj.
Hałoŭnym hierojem vyprabavańniaŭ staŭ Excalibur — samy vialiki padvodny bieśpiłotnik, jaki kali-niebudź mieŭ brytanski fłot. Jaho charaktarystyki sapraŭdy ŭražvajuć. Majučy daŭžyniu 12 mietraŭ i šyryniu 2 mietry, jon važyć kala 21 tony i maje radyus dziejańnia da 1600 kiłamietraŭ.
Excalibur moža apuskacca hłybiej, čym kłasičnyja brytanskija padłodki z ekipažam. Jaho kanfihuracyja dazvalaje lohka prystasoŭvać aparat da roznych misij — ad vyviedki da nazirańnia za marskimi terytoryjami
Na praciahu nastupnych dvuch hadoŭ Excalibur čakajuć intensiŭnyja vyprabavańni ŭ mory. Ich meta — zrazumieć asablivaści ekspłuatacyi bujnych padvodnych bieśpiłotnikaŭ, a taksama intehravać ich z tradycyjnymi karablami i padłodkami. Hetyja daśledavańni pavinny dadać novy dośvied da ŭžo isnujučych prahram, u tym liku pa pošuku i abiasškodžvańni min.
Varta adznačyć, što ŭ padobnym napramku ruchajucca i partniory Vialikabrytanii: ZŠA raźvivajuć prajekt Orca XLUUV, a Aŭstralija pracuje nad dronam Ghost Shark.
Analityki adznačajuć, što takija płatformy zdolnyja značna pašyryć mahčymaści fłotaŭ — asabliva ŭ halinie praciahłaha nazirańnia i dziejańniaŭ u addalenych rehijonach. Ale pry hetym padkreślivajuć: pakul što Excalibur zastajecca ŭ pieršuju čarhu kaštoŭnaj daśledčaj łabaratoryjaj, a nie bajavoj zbrojaj. Jaho sapraŭdnaja kaštoŭnaść vyjavicca tolki paśla hadoŭ vyprabavańniaŭ u roznych apieracyjnych umovach.
Ciapier čytajuć
Alaksandr Nadsan pieršy raz pryjechaŭ u Biełaruś paśla saraka hadoŭ emihracyi. Minskaja moładź niečakana znajšła ŭ im toje, čaho nie bačyła ŭ svaich baćkach88
Kamientary