Biełarusy ŭ sacsietkach aburajucca, što dekretnicam nibyta płaciać bolš, čym tym, chto chodzić na pracu

Biełaruska Julija Zdanievič u tyktoku padzialiłasia bolem. Jana vyrašyła pahavaryć pra chiejt, ź jakim sutykajucca maładyja maci praź finansavuju dapamohu na dzicia da troch hadoŭ.

— Dekretnicy ŭ Biełarusi atrymlivajuć bolš za tych, chto chodzić na pracu. Heta śmiešna! Vy sapraŭdy dumajecie, što my siadzim doma, ničoha nie robim, zaharajem, uvohule nijak nie zajmajemsia dziećmi i atrymlivajem bolš za vas? Vy hłyboka pamylajeciesia. Ty svoj zarobak traciŭ na siabie, a tut tabie treba jašče i zabiaśpiečyć dzicia. Kupić pampiersy, sumiesi, adzieńnie — tamu što dzieci ź jaho vyrastajuć kožnyja paru miesiacaŭ. I heta kaštuje vielmi niatanna, paviercie.

Tym, chto dumaje, što być u dekrecie praściej, čym chadzić na pracu, Julija raić naradzić — i tady «ničoha nie rabić i atrymlivać bolš hrošaj, čym na pracy».

@julijazdanschik Jeśli nie chočieš rabotať i połučať bolšie, idi v diekriet U nas (diekrietnic) pravda chorošije dietskije spasibo za eto našiemu Hosudarstvu. No hovoriť, čto v diekrietie lehko, da jeŝie i płatiat bolšie, čiem tiebie, idiotizm. Kto na čto učiłsia, kak hovoritsia #diekriet #Biełaruś #posobije #bieriemiennosť #mnohodietnyje #rabota #rieki ♬ orihinalnyj zvuk - julija-zdanschik

Pra jakuju ž sumu idzie havorka? Sioleta z 1 žniŭnia ŭ Biełarusi pavysili vypłaty na dzicia da troch hadoŭ. Ciapier jany składajuć 931,91 rubla na pieršaje dzicia i 1065,04 rubla na druhoje i nastupnych dziaciej na miesiac.

Rolik atrymaŭsia rezanansnym. Jon nabraŭ kala 220 tysiač prahladaŭ i vyklikaŭ dyskusiju amal na 2500 kamientaroŭ. Vyśvietliłasia, što šmat chto sapraŭdy ličyć vypłaty na dziaciej «šalonymi».

U asobnuju katehoryju možna vyłučyć tych, chto prytrymlivajecca pazicyi «raniej takoha nie było — i vyžyli»: «Maje dočki 1998 i 2002 hadoŭ naradžeńnia. Ciapier z žacham zhadvaju, jak my vyžyli», «Syn 2008 hoda, dekretnych chapała tolki na pampiersy dy sumieś, i toje na dva tydni», «U mianie taksama dvoje dziaciej, taksama była ŭ dekrecie dva razy pa paŭtara hady. Mnie dekretnych płacili stolki, što nie chapała na «Biełakt», a ciapier dekretnyja kaśmičnyja».

Aktyŭna dałučylisia i tyja, chto dziaciej hadavaŭ jašče ŭ Savieckim Sajuzie: «U 70-ch hadach nie było nijakich dapłat. 56 dzion paślarodavyja — i da hoda ŭ adpačynku za svoj košt. U hod, kali pašancuje, dzicia ŭ jaśli, sama na pracu. Pampiersaŭ nie było. Pałaskali pialonki kala kałonki na vulicy. U luboje nadvorje. I nie nyli. A ciapier vam nu vielmi ciažka».

Niekatoryja z kamientataraŭ navat zaklikali admianić finansavuju dapamohu maładym mamam, bo ličać, što dla kahości naradžeńnie dziaciej pieratvaryłasia ŭ zarobak.

Treba adznačyć, što pry ŭsim aptymiźmie kamientataraŭ realnaja demahrafičnaja situacyja ŭ Biełarusi ciapier davoli składanaja: letaś śmiarotnaść amal udvaja pieravysiła naradžalnaść.

Ekśpierty prahnazujuć, što kali situacyja nie źmienicca, to da kanca stahodździa ŭ Biełarusi zastaniecca ŭsiaho 3 miljony čałaviek.

Hałasy tych, chto ličyć dapamohu ad dziaržavy nie takoj užo kaśmičnaj, hučali nie vielmi aktyŭna: «Zarpłata da dekretnaha adpačynku była ŭ dva razy bolšaj, čym dekretnyja. Kali b nie zarpłata muža, nie razumieju, jak na dapamohu vyžyć», «Nasamreč dekretnyja nievialikija. Faktyčna dekretnyja pavinny być pryviazanyja da zarobkaŭ da ciažarnaści».

Byli i tyja, chto nie razumieje ahulnaha abureńnia: «Kaniečnie, na siońnia heta nikčemnaja suma. Na vyžyvańnie! Ź siońniašnimi cenami pavinna być 2000 chacia b! Heta suma na dvaich — na dzicia i mamu. Dobra, kali tata dobra zarablaje! Voś tamu i nie choča moładź asabliva naradžać».

Niekatoryja žančyny sprabavali rastłumačyć, što da naradžeńnia dziciaci pracavali šmat hadoŭ: «Vielmi śmiešna, kali za vypłaty dziakujuć dziaržavie. Hetyja vypłaty — padatki hramadzian, jakija pracujuć».

Darečy, biełaruskaja prapahanda vielmi lubić raskazvać, jak usio drenna ź finansavaj dapamohaj baćkam u Jeŭropie. Zabyŭšysia na toje, što situacyja ŭ krainach Jeŭropy vielmi roznaja. Naprykład, u susiedniaj Litvie žančyna moža sama vybirać, na kolki pojdzie ŭ dekretny adpačynak — dziaržava hatovaja apłačvać da 24 miesiacaŭ. Pamier vypłat pryviazany da pamieru zarobkaŭ da naradžeńnia dziciaci.

Pry hetym, u Litvie žančyny praciahvajuć atrymlivać finansavuju dapamohu ažno da 18 hadoŭ dziciaci (a kali jano praciahvaje vučycca, to maksimum da 23 hadoŭ). Ciapier pamier hetych štomiesiačnych vypłat na adno dzicia składaje kala 122 jeŭra.

• 1
• 0
• 1
• 4
• 0
• 0
• 0
• 0