«Zub nie brali, bo adsutničała hałava». Sudmiedekśpierty raskazali, jak identyfikujuć viernutyja Rasijaj cieły ŭkrainskich vajskoŭcaŭ
U siaredzinie lipienia na Pałtaŭščynu pryvieźli tysiaču ciełaŭ ukrainskich abaroncaŭ, jakich Rasija pieradała ŭ miežach čarhovaj repatryjacyi. Cieły dastaŭlali ŭ vahonach-chaładzilnikach, bo miascovy morh nie moža źmiaścić takuju kolkaść. Tamu ŭsie raboty — ahlad, adbor uzoraŭ i fiksacyja — viaducca prosta kala čyhunki, u palavych umovach, piša vydańnie «Ślidstvo-Info».
Na miescy pracuje siem hrup, u skład jakich uvachodziać śledčyja, kryminalisty, sudmiedekśpierty i vybuchatechniki. Spačatku jany praviarajuć, ci niama ŭ miaškach vybuchoŭki, apisvajuć cieły (poł, rost, abutak, kamuflaž) i prysvojvajuć kožnamu indyvidualny numar. Časam u adnym miašku akazvajucca frahmienty roznych ludziej, i heta patrabuje asablivaj uvahi, kab paźbiehnuć pamyłak padčas identyfikacyi. Z usioj tysiačy ciełaŭ tolki ŭ adnaho vajskoŭca znajšli hranatu biez zapała.
Nastupny etap — adbor hienietyčnaha materyjału. Zvyčajna heta zuby, paznohci, vałasy, a pry nieabchodnaści — frahmienty kostak. Sudmiedekśpiertka Vitalina Maroz tłumačyć, što byvajuć vypadki, kali atrymać uzory vielmi ciažka, naprykład, praz mocnaje abvuhleńnie paśla vybuchaŭ. Jana apisała prykład:
«Zub nie brali, bo adsutničała hałava — uziali tolki paznohci sa stupniaŭ».
Usie ŭzory źmiaščajuć u asobnyja kantejniery z numaracyjaj. Kali svajaki ŭžo zdali svaje ŭzory DNK, to paśla ekśpiertyzy ich supastaviać, i ŭ vypadku supadzieńnia siamja zmoža atrymać cieła dla pachavańnia. Časam davodzicca brać materyjał paŭtorna, kali pieršy analiz nie daje vyniku.
U susiedniaj pałatcy pravodziać miedahlad ciełaŭ: robiać fota, fiksujuć asablivaści — zuby, vałasy, baradu, elemienty adzieńnia. Ekśpiertka Halija Mustafina adznačaje, što hetyja danyja vielmi važnyja: jany dapamahajuć svajakam paćvierdzić, što cieła sapraŭdy naležyć ich blizkamu, a nie tolki daviaracca «ličbam u vyniku DNK-testu».
Paśla ŭsich pracedur cieły viartajuć u vahony-refryžeratary da momantu kančatkovaj identyfikacyi i pieradačy rodnym.
Va Ukrainu viarnuli cieły jašče tysiačy zahinułych
U Kijevie pachavali ŭkrainskuju žurnalistku, jakaja zahinuła ŭ rasijskim pałonie
Čamu rasijanie addali ŭkraincam cieły zabitych, a tyja — nie?
Va Ukrainu viarnuli jašče 1245 ciełaŭ zahinułych
MUS Ukrainy: Rasija razam ź ciełami ŭkrainskich vajskoŭcaŭ pieradaje i rasijskich
«Da hetaha času nie vieru, što vyžyŭ». Raspovied adzinaha vyžyłaha ŭ katastrofie samalota Air India, jaki raźbiŭsia ŭ Achmiedabadzie
Ciapier čytajuć
Łatuška: U Piatkievič treślisia ruki, hałava, jana tupała, kryčała: «Vy nasadžajecie nacyjanalizm»23
Kamientary