Pamior 50-hadovy śpiecnazaviec Bućko. Jon byŭ udzielnikam vykradańnia i zabojstva Zacharanki i Hančara
Mienavita Bućko źniščyŭ aŭtamabil vykradzienaha biznesmiena Anatola Krasoŭskaha — raścisnuŭ mašynu BTRam.
Biełaruskaja asacyjacyja vieteranaŭ padraździaleńniaŭ śpiecyjalnaha pryznačeńnia vojskaŭ MUS «Honar» («Čiesť») paviedamiła pra śmierć ad ciažkaj i praciahłaj chvaroby 50-hadovaha Uładzimira Bućko, «bajavoha tavaryša, siabra i brata».
Adznačajecca, što jon słužyŭ u v/č 3214, byŭ kamandziram hrupy Śpiecyjalnaha atrada chutkaha reahavańnia i mieŭ krapavy bieret.
Uładzimir Bućko — adzin z tych ludziej, čyjo imia jak udzielnika zabojstvaŭ apazicyjnych palitykaŭ nazvaŭ śpiecnazaviec Juryj Haraŭski.
U kancy 1990-ch Haraŭski słužyŭ u Śpiecyjalnym atradzie chutkaha reahavańnia i sam prymaŭ udzieł u vykradańni i zabojstvie eks-ministra ŭnutranych spraŭ Juryja Zacharanki, eks-kiraŭnika Centrvybarkama Viktara Hančara i biznesmiena Anatola Krasoŭskaha.
Haraŭski nazvaŭ imiony adzinaccaci śpiecnazaŭcaŭ, jakija ŭdzielničali ŭ zachopie Zacharanki: Paŭlučenka, Karpovič, Škindzieraŭ, Kažeŭnikaŭ, Pankoŭ, Rumiancaŭ, Navatarski, Bałynin, Budźko i Bućko. A taksama sam Haraŭski.
Zabojcaŭ Krasoŭskaha i Hančara było dziesiać.
Z Bućko i Budźko jość błytanina, bo Haraŭski paznačaŭ abodvuch jak BuDŹko. Ale ŭ ich roźnica ŭ imionach — Juryj Budźko i Uładzimir Bućko.
Pa słovach Haraŭskaha, Uładzimir Bućko zajmaŭsia źniščeńniem aŭtamabila Anatola Krasoŭskaha. Pad Biahomlem vykapali jamu na prasiołkavaj darozie: «Tam takaja staraja prasiołkavaja daroha, prosta na joj była vykapana jama. Na nastupny dzień Bućko Uładzimir i kiroŭca BTRa — sałdat-terminavik — uziali mašynu Krasoŭskaha i zahnali jaje tudy. BTRam razdušyli hety džyp i zakapali».
Haraŭski i Uładzimir Bućko byli fihurantami kryminalnaj spravy ab vymahalnictvie — pa prośbie Paŭličenki sprabavali zabrać $25 tysiač u ludziej, jakija nibyta byli vinnyja jamu hetyja hrošy.
Adnak tyja napisali zajavu ŭ milicyju. U vyniku Bućko atrymaŭ try hady chimii, Haraŭski — čatyry.
Raźvitańnie sa śpiecnazaŭcam prachodziła ŭ vioscy Vuhły Barysaŭskaha rajona.
-
Łukašenka na pieramovach u Amanie ŭstaviŭ takoje słova, što pierakładčyca na arabskuju razhubiłasia
-
U Lidzie pabralisia šlubam 15‑hadovyja chłopiec i dziaŭčyna. Samaj maładoj mamie Hrodzienščyny taksama 15
-
«U płanie byli jašče niekalki krain». Maršrut Łukašenki składali tak, kab nie nadta biła pa zdaroŭi
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy29
Kamientary