Zatrymany staršynia Paralimpijskaha kamiteta Aleh Šepiel

Na pracy abodvuch kiraŭnikoŭ zajavili, što tyja ŭ adpačynkach, ale nie zmahli ŭdakładnić, kali viernucca. Asabisty numar telefona Piłatava niedastupny. Na jahonaj staroncy Vk.com i ŭ Viber-akaŭncie paznačana, što jon nie byŭ anłajn z 31 lipienia. Paśla hetaha dnia Piłataŭ nie zhadvaŭsia ŭ sacsietkach BiełTIZ i ŭ navinach na sajcie pradpryjemstva. Taksama ŭ žniŭni źnik z Telegram-kanała BiełTIZ i Šepiel, jaki raniej byŭ tam častym hierojem publikacyj.

Žurnalistka «Lusterka» źviarnułasia ŭ arhanizacyju BiełTIZ, jakuju ŭznačalvaje Šepiel, na padstavie zaprašeńnia na mierapryjemstva. Tam skazali, što kiraŭnik znachodzicca ŭ adpačynku i nie moža razmaŭlać. Surazmoŭnica taksama paviedamiła, što na mierapryjemstvie ŭ kastryčniku kiraŭnik BiełTIZ «nie zmoža prysutničać», bo «budzie zaniaty ŭ hety čas pa hrafiku». U Paraalimpijskim kamitecie zajavili, što Šepiel u adpačynku. Datu jaho zakančeńnia nazvać nie zmahli.

«Lusterka» taksama źviarnułasia na pradpryjemstva «Elekt», jakim kiruje Alaksandr Piłataŭ. Tam zajavili, što dyrektar u adpačynku i ŭ adjeździe, i nie zmahli skazać, kali jon vierniecca.

Na dumku abiedźviuch krynic, pytańni siłavikoŭ da Šepiela i Piłatava mahli być źviazanyja ź ich prafiesijnaj dziejnaściu.

Adzin z surazmoŭcaŭ adznačyŭ, što pracu «BiełTIZ» daŭno charaktaryzavaŭ vysoki «karupcyjny» składnik, adnak raniej pytańni «zakryvalisia ciškom».

— Ciapier źjavilisia šalonyja rasijskija hrošy, a BiełTIZ nikoli nie curaŭsia hrošaj, jakimi b jany ni byli. Ja dumaju, žadańnie niejkim čynam ich dzialić pierasiliła ŭsie miery aściarožnaści. Toje, što ciapier adbyłosia, na moj pohlad, — heta zusim ekanamičnyja matyvy. I ŭžo nijakija suviazi Aleha Alaksandraviča tut nie spracavali, raz heta adbyłosia, — skazała krynica.

Surazmoŭca charaktaryzuje Šepiela jak «pryjemnaha i miłaha Tałaja». Jon adznačaje, što kiraŭnik «BiełTIZ» «ščaśliva pieražyŭ» 2020-y hod i «prybraŭ usich niepatrebnych ludziej». U jaho karjery byli nieadnaznačnyja epizody, ale jon «zaŭsiody vykručvaŭsia».

— Jon usiu darohu vypłyvaŭ za košt takich nietryvijalnych chadoŭ. < … > Zaŭsiody pradstaŭlaŭ «BiełTIZ» dziaržavie jak lehitymnaha, pravilnaha partniora: «My zaŭsiody ŭchvalajem». I jon hulaŭ u futboł z patrebnymi ludźmi, u patrebny čas, u patrebnym miescy.

Chto takija Šepiel i Piłataŭ

Alehu Šepielu 58 hadoŭ. Jon piać razoŭ pieramahaŭ na Paralimpijadach u składzie savieckaj i biełaruskaj zbornych, pryčym u całkam roznych dyscyplinach: piaciborji, skačkach u daŭžyniu i vyšyniu (dvojčy), biehu na 400 mietraŭ. Čatyry razy byŭ bronzavym pryzioram.

Z 2002 hoda Šepiel źjaŭlajecca i staršynioj Centralnaha praŭleńnia Tavarystva invalidaŭ pa zroku («BiełTIZ»). Z 2003 hoda — heta značyć užo bolš za 20 hadoŭ — były spartsmien uznačalvaje paralimpijski kamitet Biełarusi.

Taksama Šepiel zajmaŭsia restarannym biznesam. Jon byŭ datyčny da adkryćcia Minskaj ustanovy «La fantana». Potym, jak kazaŭ u intervju ŭ 2010 hodzie, «uzialisia za letniuju kaviarniu, zrabili łaźniu, rekanstrujavali hatel — karaciej, pačali raźvivacca va ŭsie baki». Šepiel — adzin z prychilnikaŭ taho, što «va ŭsim vinavataja Amieryka». Na Hulniach 2016 hoda ŭ Rya prykłaŭ ruku da skandału. Rasijskaja zbornaja tady ŭ poŭnym składzie była adchilenaja ad udziełu z-za dopinhu, a pradstaŭnik biełaruskaj delehacyi, nasupierak praviłam, vyjšaŭ na cyrymoniju adkryćcia sa ściaham krainy-susiedki. Šepiel postfaktum zajaviŭ, što heta była nie palityčnaja akcyja, a «žest salidarnaści».

Pavialičyć

Alaksandru Piłatavu 40 hadoŭ. Jon kiruje pradpryjemstvam «Elekt» piać hadoŭ, na hetaj pasadzie jon źmianiŭ svajho brata. Da hetaha Piłataŭ pracavaŭ na Viciebskim elektratechničnym pradpryjemstvie «Śviatło». Pa vynikach 2024 hoda Piłatavu prysvojvali hanarovaje zvańnie «Čałaviek hoda Viciebščyny» ŭ naminacyi «Sacyjalnaja śfiera, sacyjalnaja abarona nasielnictva, kultura, adukacyja, navuka, sport, achova zdaroŭja, moładź».

Pradpryjemstva «Elekt» znachodzicca ŭ Viciebsku i ŭvachodzić u strukturu hramadskaha abjadnańnia «Biełaruskaje tavarystva invalidaŭ pa zroku». Tam pracujuć 510 čałaviek (269 ź ich — ludzi z asłablenym zrokam). Pradpryjemstva vypuskaje elektraŭstanovačnyja, śviatłotechničnuju pradukcyju, nizkavoltnuju i vysakavoltnuju aparaturu i inšyja techničnyja vyraby.

• 0
• 0
• 9
• 1
• 2
• 0
• 0
• 1