Handlovaja palityka Donalda Trampa prymušaje zbližacca Indyju i Kitaj

Kitaj taksama ciapier zacikaŭleny ŭ narmalizacyi adnosin ź Indyjaj, bo sam padviarhaŭsia napadkam Trampa, a dźvie krainy majuć vidavočnyja ekanamičnyja intaresy, choć ich sprečki pa miažy i histaryčnyja kanflikty zastajucca niavyrašanymi jašče z kałanijalnych časoŭ.

Pieršy praktyčny krok da zbližeńnia zrabiŭ jašče ŭ sakaviku staršynia KNR Si Czińpin, napisaŭšy list indyjskamu prezidentu, pasada jakoha ŭ asnoŭnym cyrymanijalnaja. Adnak realnyja kroki pa nałažvańni adnosin byli zroblenyja tolki ŭ červieni, kali paharšalisia handlovyja adnosiny Indyi z ZŠA, a ŭ Deli razdražnialisia, što Tramp prypisvaŭ sabie zasłuhu «miratvorca», nibyta spyniŭšy bajavyja sutyknieńni Indyi z Pakistanam.

Paśla hetaha Tramp uvioŭ 25%-ju pošlinu na indyjski impart i pahražaŭ pavialičyć jaje, kali Indyja nie spynić kuplać rasijskuju naftu. Heta padšturchnuła premjera Narendru Modzi płanavać pieršy za siem hadoŭ vizit u Kitaj na samit Šanchajskaj arhanizacyi supracoŭnictva, dzie 1 vieraśnia jon sustreniecca ź Si Czińpinam. Akramia taho, na minułym tydni Modzi adznačyŭ palapšeńnie adnosin z Kitajem paśla sustrečy ź ministram zamiežnych spraŭ hetaj krainy Van I, jaki pryjazdžaŭ u Deli ŭpieršyniu za piać hadoŭ.

Na miažy Indyi i Kitaja jość niekalki sprečnych terytoryj, los jakich abmiarkoŭvajecca bolš za stahodździe. U 2020 hodzie tam adbyŭsia bujny ŭzbrojeny kanflikt. Adnak trymać vojski na redka zasielenych učastkach miažy daŭžynioj amal 3500 kiłamietraŭ vielmi doraha, tamu Modzi jašče ŭ minułym hodzie pačaŭ patajemna vyvučać mahčymaść razradki adnosin z Kitajem.

U vyniku abiedźvie krainy damovilisia ab sumiesnym patrulavańni sprečnych učastkaŭ miažy, Piekin źniaŭ abmiežavańni na ekspart indyjskaj mačaviny, a Deli adnaviŭ turystyčnyja vizy dla kitajskich hramadzian. U vieraśni płanujecca adnaŭleńnie pramoj aviasuviazi pamiž krainami.

Ekanamičnyja intaresy taksama važnyja: ekanomika Kitaja ciarpić ad deflacyi i pieravytvorčaść pradukcyi, ad jakoj imknucca abaranicca zachodnija partniory, tamu indyjski rynak moža stać kanałam dla zbytu liškaŭ pradukcyi. Indyja ž zacikaŭlenaja ŭ kitajskich inviestycyjach, kab vykanać płan Modzi pa pavieličeńni doli vytvorčaści ŭ VUP da 25%. Novyja pošliny ZŠA mohuć skaracić ekspart u krainu na 55—60%, što pahražaje stracić kala 1% VUP.

Ekśpierty, praŭda, ličać, što zbližeńnie Indyi i Kitaja budzie iści pastupova, nievialikimi krokami. Pakul heta ŭsio jašče kampiensacyja strat ad minułaha paharšeńnia adnosin, a mocna prasunucca dalej budzie składana z-za histaryčnaj varožaści i nieraźviazanych sprečak na miažy.

• 0
• 0
• 1
• 0
• 0
• 0
• 0
• 0