Na stvareńnie rasijskaj alternatyvy Vikipiedyi patracili $25 miljonaŭ, a na likvidacyju patraciać jašče amal $4 miljony
Prajekt «Vialikaja rasijskaja encykłapiedyja», na jaki było vydatkavana amal 2 miljardy rubloŭ (kala 25 miljonaŭ dalaraŭ), vyrašyli zakryć, piša The Moscow Times.
Rasijski ŭrad vydzieliŭ bolš za 303 miljony rubloŭ (kala 3,7 miljona dalaraŭ) na likvidacyju arhanizacyi, pakryćcio zapazyčanaści pa zarobkach, vypłatu dapamoh pry zvalnieńni supracoŭnikaŭ i inšyja finansavyja abaviazki. Ministerstvu ličbavoha raźvićcia daručana kantralavać vykarystańnie hetych srodkaŭ i padać spravazdaču da 1 sakavika 2026 hoda.
Prajekt byŭ stvorany pa inicyjatyvie prezidenta Rasii Uładzimira Pucina, jaki ŭ 2019 hodzie spadziavaŭsia, što encykłapiedyja moža stać rasijskim anałaham Vikipiedyi. Žartam prajekt nazyvali «zabojcam Vikipiedyi». Spačatku płanavałasia zaviaršyć stvareńnie hetaj encykłapiedyi ŭ 2022 hodzie, ale heta nie atrymałasia, i zapusk pieranieśli na 2023 hod.
Finansavańnie adbyvałasia praź Ministerstva kultury, što ŭpłyvała na źmiest resursu: naprykład, u im adsutničali bijahrafii niekatorych palitykaŭ, u tym liku Pucina. Šmat materyjałaŭ było ŭziata z «Vialikaj savieckaj encykłapiedyi», tamu niekatoryja artykuły sastareli.
Viasnoj 2024 hoda supracoŭniki paviedamili, što im nie płaciać zarobki sa śniežnia 2023 hoda. Heta paćvierdziŭ adkazny redaktar Siarhiej Kraviec. A ŭ siaredzinie červienia minułaha hoda abnaŭleńni sajta całkam spynilisia.
U lipieni 2024 hoda kiraŭnictva «Vialikaj rasijskaj encykłapiedyi» aficyjna abviaściła pra zakryćcio partała, bo dziaržava spyniła jaho finansavańnie. Krynica vydańnia The Insider adznačaje, što ŭłady vyrašyli nie tracić dalej biudžetnyja hrošy na hety darahi prajekt.
Vosieńniu 2024 hoda ŭrad pačaŭ praceduru likvidacyi arhanizacyi, a sabranyja materyjały vyrašyli pieradać internet-encykłapiedyi «Ruviki».
Ciapier čytajuć
Prapahanda rychtuje hramadstva da zahadkavaj «praciahłaj kamandziroŭki» Łukašenki39
Kamientary