U Hrodnie całkam admovilisia ad prakatnych samakataŭ i rovaraŭ. Nibyta pa prośbie žycharoŭ
Hrodna staŭ pieršym horadam Biełarusi, dzie z vulic źnikli prakatnyja elektrasamakaty i rovary. Ciapier skarystacca takim arendnym transpartam u horadzie nielha. Pry hetym haradskija ŭłady padkreślivajuć, što asobnaha rašeńnia ab zabaronie prakatu nie prymałasia. Da ciapierašniaj situacyi nibyta pryviali niekalki faktaraŭ, u tym liku mierkavańnie samich žycharoŭ.
Adnoj z prablem stała śpiecyfika histaryčnaj častki Hrodna. U horadzie šmat vuzkich vulic i miescaŭ sa staroj zabudovaj, dzie prastory pamiž piešachodami i transpartam niašmat. Niekatoryja karystalniki samakataŭ jeździli zanadta chutka, a arendnyja rovary i samakaty časam pakidali tam, dzie jany pieraškadžali minakam.
Častka haradžan ličyć, što admova ad prakatu pavysiła biaśpieku. Žychary raskazvali pra vypadki, kali samakaty ledź nie źbivali ich ci najazdžali na piešachodaŭ. Adnak byli i tyja, chto ličyŭ samakaty zručnym sposabam pieramiaščeńnia pa horadzie i chacieŭ by ich viartańnia.
Važnaj prablemaj taksama stała parkoŭka arendnaha transpartu. Paśla šmatlikich zvarotaŭ žycharoŭ haradskija ŭłady praviali apytańnie. 72% jaho ŭdzielnikaŭ vykazalisia za toje, kab u horadzie nie było prakatnych samakataŭ.
Adnak ciapierašniuju situacyju nielha farmalna nazyvać zabaronaj. Jak patłumačyli ŭ Hrodzienskim harvykankamie, z apieratarami prakatu prosta nie zaklučyli damovy na arendu placovak. Kali žychary znoŭ źviernucca z prośbaj viarnuć taki transpart, pytańnie mohuć razhledzieć paŭtorna.
Pry hetym ad srodkaŭ piersanalnaj mabilnaści ŭ Biełarusi całkam nie admaŭlajucca. U inšych haradach dla pavyšeńnia biaśpieki vykarystoŭvajuć abmiežavańni i praviły.
Naprykład, pierad pierasiačeńniem prajeznaj častki na samakatach nieabchodna syści ź ich i pierajści darohu pieššu. Na adnym samakacie moža jechać tolki adzin čałaviek. Kali ŭ horadzie jość vieładarožka, karystacca treba joj, a pry jaje adsutnaści dazvalajecca ruch pa tratuary.
Kiravać srodkami piersanalnaj mabilnaści mohuć tolki paŭnaletnija ludzi i tolki ŭ ćviarozym stanie.
U Breście, darečy, u histaryčnych miescach i na terytoryjach ź vialikaj kolkaściu ludziej stvaryli tak zvanyja čyrvonyja zony, dzie prakatnyja samakaty nie pracujuć.
Pavodle Dziaržaŭtainśpiekcyi, kolkaść avaryj z udziełam takoha transpartu skaraciłasia na 15% u paraŭnańni ź minułym hodam. Kolkaść zahinułych taksama źmienšyłasia: kali letaś zahinuli try čałavieki, to sioleta — adzin.
Ciapier čytajuć
Minčuk źniaŭ rolik pra čarhu ŭ paliklinicy, dzie było bolš za 150 čałaviek. Za heta na jaho napisali zajavu ŭ milicyju9
Kamientary