«Na abiedy i viačery nie traciła bolš za 5 BYN». Biełaruska — pra svaje vydatki na padarožža ŭ Žyrovicki manastyr

Manastyr znachodzicca ŭ Hrodzienskaj vobłaści, u Słonimskim rajonie, u samym centry ahraharadka Žyrovičy. Znakamity jon samaj maleńkaj cudatvornaj ikonaj Božaj Maci. Jaje pamier — usiaho 5,6 na 4,4 sm.

Z Mahilova, jak i ź Minska, zručna dabiracca na ciahniku.

— Kvitok na ciahnik mižrehijanalnych linij biźnies-kłasa Mahiloŭ — Minsk kaštavaŭ 21,49 BYN. Z Mahilova ciahnik adpraŭlajecca a 19:43, prybyćcio ŭ Minsk — a 22:38. Ź Minska da Słonima dajechali na ciahniku Minsk — Hrodna za 18,69 BYN, z paścielnaj bializnaj. Adpraŭlajecca ciahnik u 00:50, prybyćcio ŭ Słonim — u 04:25.

Za 2,5 BYN zdali rečy ŭ kamieru zachoŭvańnia, kab pahulać pa horadzie bieź ničoha.

Da Žyrovičaŭ chodzić aŭtobus № 205, kvitok kaštuje kala 1,5 BYN. Jechali da manastyra chvilin 20-30.

Pierš za ŭsio dziaŭčaty zasialilisia ŭ hatel dla pałomnikaŭ.

Pavialičyć

U im vykonvajucca praviły pavodzin, padobnyja da tych, što i dla nasielnikaŭ manastyra: adpaviednaje adzieńnie, nijakaha šumu, zabarona na śvieckuju muzyku i čytańnie bulvarnaj litaratury. Naturalna, nielha kuryć, raśpivać śpirtnoje i łajacca. Dla raźmiaščeńnia patrebny pašpart.

— Pra pražyvańnie treba damaŭlacca zahadzia, na sajcie manastyra jość numary telefonaŭ. Papiarednie my stelefanavalisia i braniravali pakoj. Raźmiaščeńnie błočnaha typu, u błoku dva pakoi na dvuch čałaviek z ahulnym dušam i sanvuzłom. U kožnym pakoi pa dva łožki, vialiki stoł z kresłami, tumbačka, šafa, u chole kalidora — elektračajnik. Na pieršym paviersie byŭ chaładzilnik.

U hateli my načavali dźvie nočy, za hety čas da nas nikoha tak i nie padsialili.

Pražyvańnie kaštavała 20 BYN z čałavieka za sutki. Darečy, mužčyny i žančyny raźmiaščajucca asobna.

Na terytoryi manastyra jość pałomnickaja trapieznaja i kaviarnia. Ježa, pa słovach surazmoŭnicy, prostaja i vielmi smačnaja, hatujuć tolki z naturalnych praduktaŭ, štučnyja dabaŭki nie vykarystoŭvajuć.

— Zaŭsiody možna vybrać niekalki vidaŭ ryby i miasa, sałaty i harniry — krupy, piure, aharodninnaje rahu. U mieniu byli draniki, jaječnia, syrniki. Ceny na ŭzroŭni zavodskich stałovych.

Lanivy hałubiec kuplała za 1,5 BYN, rybnuju katletu — za 2 BYN. Pamier porcyj salidny.

Pa rubli kaštujuć bułački z karycaj abo makam. Bochan chleba kaštavaŭ krychu bolš za 2 BYN. Adroźnieńnie manastyrskaha chleba ad zvyčajnaha ŭ tym, što ciesta miesiać na śviatoj vadzie.

Za 4,5 BYN možna ŭziać rybnuju katletu, dranik i sałat z burakoŭ z majanezam. U takuju ž sumu ŭkładvałasia, kali vybirała harnir, katletu i sałat. Ni na adzin abied abo viačeru nie patraciła bolš za 5 BYN.

Kaviarniaŭ i restaranaŭ u ahraharadku my nie bačyli, narod masava idzie jeści ŭ trapieznuju. U niadzielu ŭvohule była vializnaja čarha.

Pavialičyć

Raskazvali, što ŭ Žyrovičach była stałovaja ŭ miascovym kaledžy, ale jana zakryłasia, bo navučency addavali pieravahu manastyrskaj ježy.

U manastyry možna zamović ekskursiju, zahadzia stelefanavaŭšysia. Mahilaŭčanki vyvučali ŭsio sami, bo było dastatkova času.

— Na terytoryi šmat carkoŭnych kramak, dzie možna zrabić pakupku, pačynajučy ad 1 BYN, — stolki kaštuje imiennaja łaminavanaja ikona. Ikony ŭ płastmasavych ramkach kaštavali ad 5—8 BYN. U draŭlanych — daražej, 12—15 BYN. Siarebranyja kryžyki — u siarednim 15 BYN. Pradavałasia navat adzieńnie, heta aktualna dla tych, chto pryjechaŭ u majcy i šortach ci karotkich spadnicach.

Nazad mahilaŭčanki jechali da Minska na ciahniku Hrodna — Viciebsk, jaki adpraŭlajecca a 15:58. Kvitok biez paścielnaj bializny kaštavaŭ 13,69 BYN. Pryjechali ŭ Minsk a 18:49. Maršrutka da Mahilova abyšłasia ŭ 25 BYN.

Kolki patracili?

Dźvie nočy ŭ hateli dla pałomnikaŭ — 80 BYN.

Ježa ŭ trapieznaj i kaviarni — kala 70 BYN.

Daroha — u rajonie 170 BYN.

Pajezdka na dvaich na try dni abyšłasia ŭ 320 BYN. Ličba nie ŭklučaje pakupki ŭ carkoŭnych kramkach.

• 4
• 1
• 1
• 2
• 0
• 0
• 0
• 1