Saša Niema dakazvaje, što ŭ 2020-m trapiŭ na pratesty pjanym, paśla kancertaŭ u padtrymku Łukašenki

Paśla 2020 hoda Saša Niema trapiŭ u apału. Ułady zhadali pra jaho ŭ 2024 hodzie. Tady nieaficyjny kanał HUBAZiKa apublikavaŭ videa sa śpievakom. Siłaviki zajavili, što Saša Niema pryjšoŭ u milicyju, kab «vybačycca za svaje dziejańni ŭ 2020 hodzie». U storys u instahramie sam śpiavak kazaŭ, što «heta była ciažkaja hutarka, z pakazańniami» i jon vycisnuty «ŭ chłam».

Šlach na šyrokuju estradu dla artysta zakryty — vystupać u Biełarusi nie dajuć, na telebačańnie nie kličuć. Saša Niema nie chavaje, što zarablać prychodzicca na napisańni karparatyŭnych piesień — u asnoŭnym dla zamoŭcaŭ z Rasii. Naprykład, jon rehularna matajecca ŭ Kalininhrad, kab praśpiavać odu čarhovamu žyllovamu kompleksu bujnoha zabudoŭščyka.

Amal što padpolna Saša Niema piša pieśni dla dazvolenych u Biełarusi artystaŭ — i prosić ich heta nie afišyravać i, kali treba, u jakaści aŭtara ŭkazvać umoŭnaha Vasiu Pupkina.

Zhadaŭ artyst siurealistyčny vypadak z tym, jak amal što tajemna padaryŭ pieśniu Alaksandru Saładuchu. Toj, jak kaža Niema, śpiavaŭ jaje dla ahraryjaŭ na palach. Ale niechta ź niadobrazyčliŭcaŭ daviedaŭsia, chto aŭtar pieśni i danios pra heta «kamu treba». Na heta chutka adreahavali — jak možna zdahadacca pa kantekście, Saładuchu zabaranili vykonvać kampazicyju apalnaha aŭtara.

Pavialičyć

Vidavočna, što takoje žyćcio — daloka nie toje, ab čym maryć niekali papularny (chacia b u Biełarusi) śpiavak. Letaś artyst pačaŭ publična kajacca: spačatku napisaŭ dopis, jak «zajšoŭ u nie tyja dźviery». Paśla staŭ aktyŭna demanstravać mierč z kramy Łukašenki ŭ svaim instahramie, vykłaŭ u instahramie pieśniu «Nado, batia!» — dałučyŭsia takim čynam da dziaržaŭnaha fłešmobu, kab «uhavaryć» Łukašenku iści na novy termin u prezidenty.

Saša Niema pryznajecca, što paśla maksimalna padchalimskaj pieśni-paniehiryka sastarełamu dyktataru jamu pisali šmat niehatyvu — u tym liku i stryječny brat, razam ź jakim artyst vyras.

Ale ž pakul ničoha z hetaha nie dapamahło artystu viarnuć svajo imia na afišy. Ciapier jon znoŭ sprabuje dahrukacca da Łukašenki — i zapisaŭ navat zvarot da taho.

Čarhovyja publičnyja pakajańni Sašy Niema prahučali ŭ padkaście «Niesieleby». Jon prosić Boha, kab Łukašenka pačuŭ hety padkast.

Pavialičyć

Pa słovach śpievaka, šmat chto ź biełaruskich zorak u 2020 hodzie niezrazumieła jak trapiŭ «u miasarubku». Niema bažycca, što sam spačatku śpiavaŭ na kancertach u padtrymku Łukašenki.

— My pracavali na kancertach «Za Biełaruś!» i za nami biehali niezrazumiełyja ludzi z kamierami: «A što vy tut robicie? A za kaho ahitujecie?». I my adbivalisia, realna adbivalisia. Kaho jak zaciahnuła ŭ hetu historyju…

U svaim vypadku Niema ŭsio śpisvaje na ałkahol:

— Ja ŭvohule ničoha nie pamiataju! Jak ja pračnuŭsia pjany, zdajecca, u Centralnym RUUS Minska 10 žniŭnia, na nastupny dzień paśla vybaraŭ. Ja nijaki viarnuŭsia ŭ horad, nijaki. Razumiejecie, u kožnaha svoj šlach i ja ni ab čym nie škaduju…

Artyst tłumačyć, što dva hady pierad 2020-m dla jaho byli składanymi: ciažki razvod, depresija i sproby vyrašyć prablemy ałkaholem. Kaža, praz usio heta i trapiŭ u dziŭnuju situacyju: pajechaŭ u tur za Łukašenku, a potym niezrazumieła jak trapiŭ na pratesty.

Pavialičyć

Raspavioŭšy hetuju niepryhožuju historyju, artyst z entuzijazmam pačynaje kazać, što maryć syhrać dla Łukašenki na hitary.

— Ja prosta maru nabraŭšysia siły, dośviedu, mudraści sieści i Valeryja Abadzinskaha jamu syhrać… Jak šarachnuć «Eti hłaza naprotiv» jak ja ŭmieju, jak ja mahu… A jašče lepš, kab jon u zale siadzieŭ, a ŭsio vakoł radavalisia.

Niema pachvaliŭsia, što sioleta ŭ lutym chadziŭ na pryjom da ministra kultury Rusłana Čarnieckaha — padpisvaŭ niejkija papierki. Vyjšaŭ vielmi natchnionym. Pytaŭsia ŭ čynoŭnikaŭ: «Dyk što, mnie ŭžo zaŭtra «hastrolku» daduć?». Ale ministr adkazaŭ, što nie ŭsio tak prosta — treba pačakać, abiacaŭ patelefanavać paźniej. Voś z taho času śpiavak i čakaje zvanka — vieryć i spadziajecca, što kali-niebudź usio ž pra jaho zhadajuć i znoŭ daduć zialonaje śviatło.

Pavialičyć

U nastupnym hodzie ŭ studzieni śpievaku spoŭnicca 45 hadoŭ:

— Vydatnaja data, kab vydać albom, sabrać usich siabroŭ i jašče raz uvajści ŭ tuju kalainu, kali ŭsio narmalna, usio dobra, ja śpiavaju, prezident u zale, usio dobra, chłopcy z pravincyi: «Nado, batia»!

Pakul ža Saša Niema zaśviaciŭsia ŭ Maskvie — vystupiŭ na fiestyvali «Ahoń žyćcia». I vielmi dziakavaŭ arhanizataram za ščodry hanarar.

• 0
• 3
• 6
• 20
• 0
• 1
• 7
• 0