Prakuratura budzie patrabavać śmiarotnaha pakarańnia dla zabojcy Čarli Kirka. Novyja padrabiaznaści zatrymańnia

Pa słovach prakurora, suprać Robinsana vystaŭleny siem punktaŭ abvinavačańnia. Siarod ich — zabojstva, niepravamiernaje vykarystańnie ahniastrelnaj zbroi, što pryviało da ciažkich cialesnych paškodžańniaŭ, cisk na śviedkaŭ, pieraškoda pravasudździu.

Jak udakładniaje Reuters, abvinavačvańni buduć aficyjna pradjaŭleny Robinsanu paźniej, padčas jaho pieršaha sudovaha słuchańnia. 

Hrej taksama zajaviŭ, što prakuratura maje namier chadajničać ab śmiarotnym pakarańni. U suviazi z hetym Robinsan budzie ŭtrymlivacca ŭ turmie biez prava vychadu pad zakład.

Džef Hrej raspavioŭ žurnalistam, što pieršaj da aryšta Tajlera paznała jaho maci, a nie baćka, jak śćviardžałasia raniej.

Ubačyŭšy syna ŭ efiry navin, jana pazvaniła jamu, a Tajler adkazaŭ, što jon doma i ŭžo niekalki dzion chvory. Žančyna źviarnułasia za paradaj da muža, i toj zhadziŭsia, što asoba, jakuju šukajuć, na fota padobna na ich syna.

U toj ža čas baćka Robinsana, ubačyŭšy vintoŭku na fatahrafijach z kamier nazirańnia, vyrašyŭ, što jana vyhladaje jak taja, jakuju Tajleru padaryŭ dzied.

Jon pasłaŭ synu paviedamleńnie z prośbaj dasłać fota, ale Robinsan nie adkazaŭ. Paśla hetaha baćka pazvaniŭ jamu i ŭhavaryŭ pryjści dadomu da baćkoŭ. Užo doma Robinsan namiaknuŭ, što heta jon streliŭ u Kirka, i skazaŭ, što chacieŭ pamierci, kab nie trapić u turmu.

Pa słovach prakurora, maci Robinsana paviedamiła, što ŭ apošni čas jaje syn staŭ bolš palityzavanym i schilaŭsia da levych pohladaŭ u adnosinach da pravoŭ hiejaŭ i transhiendaraŭ, bo pačaŭ sustrakacca sa svaim susiedam pa pakoi, jaki ŭ toj momant prajšoŭ praz transhiendarny pierachod.

Hrej začytaŭ žurnalistam mierkavanyja pierapiski pamiž Robinsanam i jaho ramantyčnym partnioram, u jakoj jon prasiŭ jaho pašukać pad kłavijaturaj zapisku. «Susied pa pakoi zazirnuŭ pad kłavijaturu i znajšoŭ zapisku, u jakoj havaryłasia: «U mianie źjaviłasia mahčymaść pazbavicca ad Čarli Kirka, i ja źbirajusia joju skarystacca»» — skazaŭ Hrej. Pa słovach prakurora, susied pa pakoi adkazaŭ: «Heta ž žart?»

U paviedamleńniach Robinsan taksama apisaŭ, jak sprabavaŭ schavacca ad palicyi i paviedamlaŭ naviny pra svaje pieramiaščeńni. U niejki momant jon niby napisaŭ pra Kirka: «Mianie dastatkova jaho nianaviści. Nie ŭsiakuju nianaviść možna likvidavać šlacham pieramovaŭ». Hrej śćviardžaje, što Robinsan i jaho partnior taksama pierapisvalisia pra jaho płany pakinuć horad paśla zabojstva Kirka, a taksama pra stratu vintoŭki i pra toje, jak jamu pryjdziecca tłumačyć heta svajmu baćku. Paźniej Robinsan paviedamiŭ, što zdacca, i paprasiŭ susieda pa pakoi nie razmaŭlać sa ŚMI i znajści jamu advakata.

Prakuratura pradjaviła Robinsanu abvinavačańnie ŭ zabojstvie z abciažarvajučymi abstavinami, ździajśnieńni kryminalnaha złačynstva z prymianieńniem ahniastrelnaj zbroi i pieraškodzie ažyćciaŭleńnia pravasudździa, taksama da ich dadali dva punkty — ab cisku na śviedku i pra ździajśnieńnie hvałtu ŭ prysutnaści dziciaci. Kula, jakaja zabiła Kirka, pralacieła mima dziaciej, tłumačyć prakuror.

Jak cisk na śviedku kvalifikavali mierkavanyja prośby da susieda pa pakoi vydalić tekstavyja paviedamleńni i nie razmaŭlać z palicyjaj u vypadku dopytu. U vyniku ahulnaja kolkaść abvinavačańniaŭ dasiahnuła siami. Prakuror imkniecca damahčysia śmiarotnaha pakarańnia.

***

31‑hadovy Čarli Kirk, kansiervatyŭny błohier i aktyvist, 10 vieraśnia byŭ zabity strełam u šyju. U hety momant Kirk vystupaŭ va ŭniviersitecie štata Juta. Tramp nazvaŭ złačynstva «žachlivym».

Kirk ličycca adnym z tych, chto dapamoh Respublikanskaj partyi ZŠA i samomu Trampu zaručycca padtrymkaj vialikaj kolkaści maładych vybarcaŭ na prezidenckich vybarach 2024 hoda.

• 1
• 0
• 0
• 1
• 0
• 0
• 0
• 0