«Jon mianie padvioŭ». U apošni dzień vizitu ŭ Brytaniju Tramp abmierkavaŭ sa Starmieram cisk na Pucina

U sieradu vizit Trampa byŭ u asnoŭnym pryśviečany cyrymonijam u Vindzarskim pałacy: sustrečy z karalom Karłam i dziaržaŭnamu bankietu. U čaćvier kiraŭnik Biełaha doma zajmaŭsia pytańniami suśvietnaj palityki i brytanska-amierykanskich adnosinaŭ.

«My pracujem razam, kab spynić zabojstvy va Ukrainie», — skazaŭ Starmier na sumiesnaj pres-kanfierencyi z Trampam paśla pieramovaŭ.

«U apošnija dni Pucin pakazaŭ svajo sapraŭdnaje abličča, ździejśniŭšy najbujniejšyja ataki z pačatku ŭvarvańnia. Usio bolš kryvi pralivajecca, usio bolš niavinnych ludziej hinie. Biesprecedentnaje parušeńnie pavietranaj prastory NATO. Heta nie dziejańni čałavieka, jaki choča miru», — praciahnuŭ premjer-ministr.

U kancy žniŭnia i pačatku vieraśnia Rasija ździejśniła najbolš masiravanyja ŭdary pa Ukrainie z pačatku vajny. Starmier nahadaŭ, što padčas hetych abstrełaŭ paškodžany budynak Kabinieta ministraŭ Ukrainy, a taksama pradstaŭnictva Jeŭrapiejskaha sajuza i budynak Brytanskaj rady ŭ Kijevie.

Dyk voś my i abmierkavali siońnia, jak my možam umacavać abaronu, padtrymać Ukrainu i rašuča ŭzmacnić cisk na Pucina, kab jon pahadziŭsia na mirnaje pahadnieńnie, jakoje pryniasie doŭhaterminovy mir», — reziumavaŭ Starmier.

Tramp u adkaz paŭtaryŭ, što zaviaršyć vajnu va Ukrainie akazałasia značna składanaj zadačaj, čym jon dumaŭ pieršapačatkova.

«Jon mianie padvioŭ. Jon sapraŭdy mianie padvioŭ», — skazaŭ prezident ZŠA pra Uładzimira Pucina. «Ja vielmi rasčaravany, što hety [kanflikt va Ukrainie] jašče nie vyrašany», — dadaŭ Tramp.

Tramp taksama čarhovy raz paŭtaryŭ adzin sa svaich ulubionych tezisaŭ pra toje, što kali b jon, a nie Džo Bajden, byŭ prezidentam ZŠA, to vajny nie było b.

«Spadziajusia, chutka ŭ nas buduć dobryja naviny na hetuju temu», — skazaŭ Tramp, nie rastłumačyŭšy, što jon maje na ŭvazie.

Adkazvajučy na pytańnie pra sankcyi ŭ dačynieńni da Rasii, ni Tramp, ni Starmier nie dali kankretnaha adkazu, ale abodva lidary vykazalisia pra toje, što jeŭrapiejskija krainy pavinny jak maha mienš zaležać ad rasijskaj enierhii. Z pačatku svajho prezidenckaha terminu Tramp pakul nie ŭvioŭ suprać Rasii nijakich novych sankcyj, choć nieadnarazova abiacaŭ heta zrabić, kali Maskva nie prademanstruje hatoŭnaść da miru.

Na hetym tydni Tramp nakiravaŭ list sajuźnikam pa NATA, u jakim zajaviŭ, što budzie hatovy da sankcyj, kali ŭsie členy aljansu, u tym liku jeŭrapiejskija, spyniać kuplać rasijskuju naftu.

Na pres-kanfierencyi ŭ Łondanie jon paŭtaryŭ hetuju dumku. «Ja hatovy pajści na inšyja miery, ale nie tady, kali ludzi, za jakich ja zmahajusia, kuplajuć naftu ŭ Rasii», — zajaviŭ prezident ZŠA žurnalistam. «Kali cana na naftu źnizicca, usio vielmi prosta, Rasija pahodzicca [na ŭrehulavańnie va Ukrainie]», — skazaŭ Tramp.

Paśla pačatku poŭnamaštabnaha ŭvarvańnia va Ukrainu ES rezka skaraciŭ impart enierhanośbitaŭ z Rasii, ale dźvie dziaržavy Jeŭrasajuza — Vienhryja i Słavakija — praciahvajuć atrymlivać rasijskuju naftu. Pavodle adkrytych dadzienych, na ekspart nafty ŭ ES prypadaje kala 6% ahulnaha abjomu pastavak z Rasii na suśvietnyja rynki.

• 1
• 0
• 1
• 1
• 0
• 0
• 0
• 0