Biełarusy Koŭna abviaścili zbor na pamiatnuju šyldu Biełaruskamu asobnamu bataljonu ŭ litoŭskim vojsku
«Biełaruskaja siabryna Koŭna» abviaściła zbor srodkaŭ na pamiatnuju šyldu Biełaruskamu asobnamu bataljonu, jaki dziejničaŭ u składzie Litoŭskaha vojska ŭ 1920‑ja hady, piša «Radyjo Svaboda».
«Bataljon prasłaviŭsia ŭ bajach suprać balšavikoŭ, jaho vajary atrymali aficyjnuju padziaku ad prezidenta Litvy Antanasa Śmiatony, 51 žaŭnier byŭ adznačany najvyšejšaj uznaharodaj Litvy — Kryžam Vicisa», — adznačajecca ŭ paviedamleńni arhanizacyi.
Ideja ŭstalavańnia pamiatnaj šyldy źjaviłasia ŭ biełarusaŭ Koŭna ŭ 2023 hodzie padčas restaŭracyi mahiły Kłaŭdzija Duž-Dušeŭskaha, architektara i stvaralnika eskizu bieł-čyrvona-biełaha ściaha. Mienavita tady daśledčyki vyśvietlili, što ŭ Koŭnie dysłakavaŭsia Biełaruski asobny bataljon. Peŭny čas spatrebiŭsia na pošuki infarmacyi pra bataljon i vyznačeńnie miescaŭ jaho raźmiaščeńnia. Uvosień 2024 hoda byli znojdzienyja byłyja kazarmy bataljona.
Dla realizacyi prajekta nieabchodna 3900 jeŭra. Šyldu płanujuć ustalavać 23 listapada, kali ŭ Litvie buduć śviatkavać Dzień vajara, adznačajecca na sajcie hetaha prajekta.
«Ad pačatku farmiravańnia Vojska Litoŭskaha ŭ listapadzie 1918 hoda roznyja biełaruskija (hudskija) padraździeły byli važnaj častkaj jaho struktury. Biełarusy razam z pradstaŭnikami inšych mienšaściaŭ słužyli i aktyŭna ŭdzielničali ŭ bajach za niezaležnaść Litvy: u 1919—1920 hadach suprać balšavikoŭ na Dźvinskim froncie i ŭ 1920 hodzie suprać vojskaŭ Vilenskaj (Siaredniaj) Litvy pad kamandavańniem hienierała Lucyjana Žalihoŭskaha. Pra značny ŭniosak śviedčyć toje, što 51 biełaruski žaŭnier byŭ uznaharodžany Kryžam Vicisa», — skazaŭ doktar histaryčnych navuk Tomaš Błaščak.
«Biełaruskija sałdaty pakinuli jarki śled u historyi Litvy. Heta była ahulnaja baraćba za svabodu i niezaležnaść Litvy, litoŭskaja ziamla palitaja kryvioju biełaruskich žaŭnieraŭ pad Jeziarosami, Novymi Śviancianami, Turmontam, Malatami, Dubinkami, Mieračču, Druskienikami, a ŭ Łatvii — ad Čyrvonki da samaha Dźvinska. U baraćbie za niezaležnaść zahinuli bolš za 30 biełaruskich dobraachvotnikaŭ, kala 20 byli paranienyja», — adznačyŭ historyk, publicyst, daśledčyk historyi Litoŭskaha vojska Hintaŭtas Surhejlis.
Šyldu vykanaŭ z kamieniu skulptar Kiastucis Łanaŭskas.
Redki vypadak: pamiłavany biełaruski palitviazień pajšoŭ na vajnu suprać Ukrainy16
Redki vypadak: pamiłavany biełaruski palitviazień pajšoŭ na vajnu suprać Ukrainy
«Strelba kali i strelić, to naŭrad ci kulamiotnaj čarhoj». Maksim Znak acaniŭ realnaść pahroz biełaruskaj prapahandy pazbavić hramadzianstva palitemihrantaŭ1212
Kamientary