Na nastupnym tydni Śviatłana Cichanoŭskaja budzie ŭ Štatach. U jakich mierapryjemstvach jana budzie ŭdzielničać i ci sustreniecca z kamandaj Trampa?
Na nastupny tydni Śviatłana Cichanoŭskaja prymie ŭdzieł u Tydni vysokaha ŭzroŭniu 80‑j jubilejnaj siesii Hienieralnaj Asamblei AAN u Ńju-Jorku (22‑25 vieraśnia). Jaje dypłamatyčny daradca Dzianis Kučynski kaža, što ŭdzieł Cichanoŭskaj u ciapierašnich umovach — heta test dla mižnarodnaj supolnaści, ci zdolnaja jana abaraniać univiersalnyja kaštoŭnaści i supraćstajać aŭtakratyjam.
«Vielmi važna, što ŭžo čaćviorty hod zapar padčas Tydnia vysokaha ŭzroŭniu ŭ AAN hučyć hołas svabodnaj Biełarusi, a nie tolki pradstaŭnikoŭ režymu Łukašenki, jakija i ŭ hetym hodzie buduć tam taksama prysutnyja».
«Dla nas AAN adna z klučavych płatformaŭ, kab uźniać temu palitviaźniaŭ, transnacyjanalnych represij, padtrymki hramadzianskaj supolnaści i miedyja, budučyni Biełarusi ŭ volnym i demakratyčnym Saviecie. Na hetym tydni ŭ Ženievie ŭžo adbyvajucca važnyja mierapryjemstvy pad ehidaj AAN, dzie ŭ tym liku niadaŭna vyzvalenyja palitviaźni, takija jak Mikoła Dziadok, dajuć svaje žyvyja śviedčańni pra toj žach i piekła, u jakim znachodziacca biełaruskija palitviaźni», — dadaje Kučynski.
Cichanoŭskaja vystupić na sajd-ivencie pra Biełaruś, arhanizavanym delehacyjaj ES pry AAN razam ź Litvoj, Łatvijaj, Estonijaj i Danijaj, budzie na dyskusii, arhanizavanaj Suśvietnym ekanamičnym forumam, dzie ŭdzielničajuć dziasiatki kiraŭnikoŭ dziaržaŭ i MZS. Taksama budzie ŭdzielničać u cyrymonii ŭznaharodžańnia Global Citizen Awards ad Atlantic Council i vystupić na mierapryjemstvie mižnarodnaj supolnaści žančyn-lidarak Women Political Leaders.
U Ńju-Jorku na ŭručeńni premii Vacłava Haveła «Disturbing the Peace» budzie ŭznaharodžany advakat i palitviazień Maksim Znak.
«Nu i biezumoŭna ciaham tydnia papiarednie zapłanavanyja šerah sustreč u roznych farmatach z pradstaŭnikami dziaržaŭ — siabraŭ AAN, u tym liku z tymi, ź jakimi zvyčajna niama pramych dypłamatyčnych kanałaŭ, i taksama z novaabranymi lidarami, naprykład z novym premjer-ministram Kanady», — dadaje Kučynski.
«Heta budzie vielmi ciažki, napružany tydzień. Na 80‑j siesii AAN naša zadača ŭ proćmie inšych suśvietnych prablem i kryzisaŭ viarnuć Biełaruś u centr uvahi. I tamu, pakul u Biełarusi jość palitviaźni, pakul parušajucca pravy čałavieka, naša prysutnaść u AAN — nie raskoša, a abaviazak».
24 vieraśnia Śviatłana i Siarhiej Cichanoŭskija sustrenucca ź biełaruskaj dyjasparaj u Ńju-Jorku.
Ci čakajecca vizit u inšyja harady i sustreča z kamandaj Trampa?
«My nie płanujem być u Vašynhtonie padčas hetaha vizitu, — adkazvaje Kučynski. — Adnak ja ŭ pastajannym kantakcie z daradcami prźzidenta ZŠA. Kali buduć nastupnyja kroki ci naviny — abaviazkova paviedamim».
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary