Brytanski palityk pryznaŭsia, što braŭ chabar za prasoŭvańnie rasijskich naratyvaŭ. Jaho sprava ŭskryła miechanizm, jak heta robicca

Jak paviedamlaje The New York Times, brytanski palityk Natan Hił, były deputat Jeŭraparłamienta ad Uelsa, 26 vieraśnia pryznaŭ siabie vinavatym u atrymańni chabaru za prasoŭvańnie prarasijskich intaresaŭ na vysokim jeŭrapiejskim uzroŭni.

52‑hadovy Natan Hił reprezientavaŭ Uels u Jeŭraparłamiencie z 2014 pa 2020 hod. Svaju karjeru jon pačynaŭ u krajnie pravaj Partyi niezaležnaści Złučanaha Karaleŭstva (UKIP), jakaja aktyŭna ahitavała za vychad Brytanii ź ES. U 2019 hodzie Hił dałučyŭsia da Partyi Brexit, jakaja paźniej była pierajmienavana ŭ Reform UK. U 2021 hodzie palityk navat uznačalvaŭ vybarčuju kampaniju partyi va Uelsie, adnak na siońnia jon bolš nie ŭvachodzić u jaje i nie zajmaje nijakich vybarnych pasad.

Jak paviedamiła brytanskaja prakuratura, Hił pryznaŭsia ŭ vaśmi epizodach chabarnictva. Pavodle źviestak śledstva, jon dziejničaŭ pa ŭkazańniach ukrainskaha palityka Aleha Vałošyna, byłoha čynoŭnika va ŭradzie Viktara Janukoviča i člena prarasijskaj partyi «Apazicyjnaja płatform — Za žyćcio» — jaki, imavierna byŭ rasijskim ahientam.

Vałošyn byŭ deputatam Viarchoŭnaj rady Ukrainy, u jakoj zajmaŭ pasadu namieśnika staršyni Kamiteta pa pytańniach intehracyi Ukrainy ź ES. Adrazu paśla pačatku poŭnamaštabnaj vajennaj ahresii Rasii suprać Ukrainy palityk razam z žonkaj i dvuma dziećmi vyjechaŭ u Biełaruś, jakaja časta vystupaje prykryćciom dla apieracyj rasijskaj ahientury. 

U 2022 hodzie ZŠA i Vialikabrytanija ŭviali suprać Vałošyna sankcyi za «raspaŭsiud dezynfarmacyi i prarasijskich naratyvaŭ».

Daručeńni Hir atrymlivaŭ praz WhatsApp. Jany byli nakiravany na padtrymku naratyvaŭ ukrainskaha multymiljaniera, kuma Uładzimira Pucina Viktara Miedźviedčuka, jaki ciapier žyvie ŭ Rasii. I jaki, pa zadumach Maskvy, u 2022 hodzie pavinien byŭ uznačalić novuju prarasijskuju administracyju Ukrainy, stać ukrainskim łukašenkam.

Kankretnyja vypadki

Hił pryznaŭsia, što dvojčy vystupaŭ z pramovami ŭ Jeŭraparłamiencie, jakija byli napisany pa «scenaryjach», pradstaŭlenych Vałošynym.

Tak u śniežni 2018 hoda jon abvinavaciŭ ukrainski ŭrad u «represijach» suprać prarasijskich ŚMI. «Ja całkam spačuvaju Ukrainie, kali havorka idzie pra Krym, pra rasijskuju ahresiju i ŭmiašańnie, — zajaviŭ tady Hił, — ale niapravilna zmahacca z represijami z dapamohaj represij». Jon zaklikaŭ Kijeŭ dazvolić telekanałam «viaščać, padabajecca vam ich pasył ci nie».

Padobnaje pasłańnie jon ahučyŭ i ŭ sakaviku 2019 hoda.

U lutym 2019 hoda, kali va Ukrainie suprać Miedźviedčuka raspačali kryminalnuju spravu, Vałošyn daručyŭ Hiłu vystupić na prarasijskim telekanale «112 Ukraina».

Pavialičyć

Pa słovach prakuroraŭ, brytanski palityk «dakładna prytrymlivaŭsia vyznačanaj jamu linii», śćviardžajučy, što Miedźviedčuka «pieraśledujuć» za jaho «palityčnyja pierakanańni». Paźniej Hił atrymaŭ zadańnie znajści inšych deputataŭ Jeŭraparłamienta dla padobnych zajaŭ u padtrymku aliharcha.

Samym jaskravym epizodam stała arhanizacyja ŭ lipieni 2019 hoda prezientacyi «mirnaha płana dla Danbasa» ad Viktara Miedźviedčuka niepasredna ŭ budynku Jeŭraparłamienta. Hił vystupiŭ u roli arhanizatara i viadoŭcy.

Na nastupny dzień paśla mierapryjemstva ŭ Bruseli Viktar Miedźviadčuk sustreŭsia ŭ Rasii z Uładzimiram Pucinym i z honaram paviedamiŭ pra pośpiech. Pavodle aficyjnaj stenahramy Kramla, Miedźviadčuk, spasyłajučysia na sustreču z brytanskimi palitykami, zajaviŭ, što ich reakcyja jaho «natchniła». Uładzimir Pucin, u svaju čarhu, nazvaŭ padzieju ŭ Jeŭraparłamiencie «vielmi pazityŭnaj».

Rasśledavańnie i sud

Dokazy suprać Hiła byli znojdzieny paśla taho, jak u vieraśni 2021 hoda jaho spynili ŭ aeraporcie Mančestera ŭ ramkach pravierki pa nacyjanalnaj biaśpiecy. Tady palicyja atrymała dostup da jaho pierapiski z Vałošynym u WhatsApp. Padčas dopytaŭ Hił admaŭlaŭsia adkazvać na pytańni, vykarystoŭvajučy prava nie śviedčyć suprać siabie.

Na sudovym pasiadžeńni 26 vieraśnia jon pryznaŭ vinu pa vaśmi kankretnych punktach abvinavačańnia ŭ chabarnictvie, ale adchiliŭ abvinavačańnie ŭ «zmovie z metaj chabarnictva», jakoje achoplivała pieryjad sa studzienia 2018 pa luty 2020 hoda.

Paviedamlajecca, što Natan Hił byŭ vyzvaleny pad zakład. Kančatkovy prysud pa jaho spravie budzie vyniesieny ŭ listapadzie.

• 6
• 0
• 2
• 0
• 1
• 1
• 5
• 0