«Byŭ adklučany roŭminh, pryjechała ŭ RB — zapazyčanaść 250 rubloŭ». Paśla adnaho vypadku biełaruska baicca brać simku ŭ ES

Biełarusy ŭ pryhraničnych čatach rehularna cikaviacca, dzie i jak kupić simku ŭ Jeŭrasajuzie, kab tanna karystacca internetam i nie padklučać roŭminh na našych simkach. Karystalnica čata Ksienija adreahavała na takoje pytańnie i raskazała, što apieratar A1 źniaŭ u jaje prykładna 250 rubloŭ za internet-roŭminh, choć jana jaho nie ŭklučała.

Niekatoryja biełarusy ŭ adkaz pryznalisia, što bajacca brać našy simki ŭ Jeŭrasajuz, kab nie trapić u takuju samuju historyju.

«U mianie byŭ adklučany roŭminh, pryjechała ŭ RB — zapazyčanaść kala 250 rubloŭ prykładna za 20 MB [internetu]. Pryčym pahladzieła historyju ŭ A1. Pa časie i dacie nijak nie mahła ŭklučyć biełaruski roŭminh u hety momant. Vierahodna, ad pierazapusku telefona niešta źlacieła ci što, da hetaha času nie viedaju. Tak što ciapier biełaruskuju simku na terytoryju ES naohuł brać nie chaču. Potym takija sumy vystaŭlajuć, što vočy na łob vyłaziać», — padzialiłasia svajoj prablemaj Ksienija.

U inšym paviedamleńni jana dadała, što pierad pajezdkaj u Jeŭropu kupiła sms-roŭminh za 5‑7 rubloŭ. Internet-roŭminh u naładach biełaruskaj simki ŭ jaje zaŭsiody byŭ adklučany, a na terytoryi Jeŭrasajuza jana karystałasia polskaj simkaj.

«Ale voś jak rastłumačyć, što ŭ momant, kali ja jechała za rulom pamiž Hiermanijaj i Polščaj, ź mianie źniali 250 rubloŭ za vykarystańnie ŭ adzin momant 20 MB, nie viedaju. Jak uklučyŭsia roŭminh, na žal, taksama. Tak što vam vielmi-vielmi pašancavała, što pakul vy z takim nie sutykalisia», — piša biełaruska.

Paśla hetaj historyi niekatoryja karystalniki čata pryznalisia, što ciapier nie chočuć brać biełaruskija simki ŭ Jeŭrasajuz:

«Ja b jašče całkam prybrała z telefona biełaruskuju simku. Navat kali vy jaje deaktyvujecie, čytała, što kamuści prychodziŭ rachunak za internet-roŭminh ad MTS abo «Vełkom» [ciapier heta A1]. Tam ža pa-lubomu ŭ telefonie budzie ŭklučanaja pieradača dadzienych».

«Mienavita. Lepš biełaruskuju simku vynuć zahadzia. Navat pry adklučanym roŭminhu».

Ź imi zhodnaja i Ksienija:

«Heta dakładna, nie paŭtarajcie maich pamyłak. Ciapier pakidaju ŭ RB kamu-niebudź, kab mnie M-kody mahli paviedamić, kali niešta terminovaje. A tak nie patrebna jana ŭ ES».

Im adkazali biełarusy, u jakich niama prablem z roŭminham u Jeŭrasajuzie. Jany nazvali varjackaj ideju pakidać biełaruskija simki doma:

«Dyk heta tema mabilnych danych. Nie ŭklučajcie internet. Ja sms ad banka biez prablem atrymlivaju i biaspłatna. Pra što vy, simku ŭ RB? Tryźnieńnie».

«U mianie taryf na A1 2 rubli ŭ miesiac. Tamu i trymaju numar. Sms atrymlivaju ŭ RP biez prablem. Internet nie ŭklučaju. Tamu tema vopytu i razumieńnia. Kali na polskim numary ŭ RB ŭkluču internet, to taksama moža 200 złotych prylacieć chutka».

Ksienija ŭ adkaz napisała, što im pakul što šancuje:

«Značyć, vam pakul što vielmi šancavała. Ja taksama vielmi doŭha karystałasia roŭminham, ale voś adzin raz niešta pajšło nie tak».

Siarhiej Ivanoŭ, adzin z karystalnikaŭ pryhraničnaha čata, patłumačyŭ, čamu ŭ Ksienii ŭklučyŭsia roŭminh, choć jana jaho nie ŭklučała:

«Vielmi prosta. Vy ž u Hiermaniju jechali pa jeŭrapiejskim roŭminhu i ŭklučyli roŭminh danych u telefonie, kab internet u telefonie byŭ pa polskaj simcy. Potym u opcyjach telefona jość nałada, jakaja adkazvaje za toje, jakoj simcy my addajem pieravahu, kab telefanavać, [atrymlivać i adpraŭlać] sms, [uklučać] internet.

I tut jość jašče adna opcyja — data switching! Jakaja dapamahaje pieršaj: kali upadabanaja simka nie moža [padklučyć] internet, tady ŭ pracu ŭklučajecca druhaja simka i bjecca ŭ internet, kab nie adłamaŭsia navihatar i instahram. A pakolki vy ŭklučyli roŭminh danych, to pakul polskaja simka damaŭlałasia z vyškaj niemcaŭ, biełaruskaja simka paśpieła padklučycca ŭ internet i spampavać paru miehabajtaŭ.

Vysiakajcie siakieraj [funkcyju] data switching abo časova adklučajcie biełaruskuju simku, kali pierasiakajecie terytoryi [krain] z roŭminham».

Inšy biełarus dadaŭ:

«U naładach sim-karty, jak praviła, možna adklučyć pieradaču danych u roŭminhu, internet tady nie ŭklučycca. MTS pra heta sms dasyłaje».

«Usio pravilna. Tolki pieradača danych pavinna być uklučanaja, tamu što roŭminh dla polskaj simki taksama prychodzić u Hiermanii. I kali adklučyć pieradaču danych, to ŭ vas nie budzie internetu ni pa polskaj, ni pa inšaj. Tamu tut albo bieź internetu naohuł, albo sačyć za internetam praź simku, dzie ŭsio składana ŭ paraŭnańni z druhoj simkaj», — udakładniŭ Siarhiej Ivanoŭ.

Karystalniki pryhraničnych čataŭ rajać biełarusam, jakim patrebny internet u Polščy, skarystacca pasłuhami Orange Flex. Pieravahi: niedarahaja suviaź i internet pa ŭsim ES, aktyvacyja esim [elektronnaj simki] mahčymaja anłajn ŭ Biełarusi praz dadatak u AppStore i Play Market.

• 2
• 0
• 0
• 3
• 0
• 0
• 1
• 0