Śmiarotnaje tatu 21‑hadovaj dziaŭčynie z Maładziečna zrabiŭ žanich za tydzień da viasiella: padrabiaznaści trahiedyi
Niadaŭna stała viadomaja dramatyčnaja historyja dziaŭčyny z Maładziečna, jakaja pamierła paśla taho, jak zrabiła tatu ŭ chatnich umovach. Ciapier inšaja tatu-majstrycha raspaviała padrabiaznaści: akazvajecca, tuju fatalnuju tatuiroŭku nabivaŭ žanich dziaŭčyny.
Detali žudasnaj historyi ahučyła ŭ tyktoku dziaŭčyna Volha, jakaja viadzie akaŭnt pad nikam Mied_ekśpiert. Pra siabie jana raspaviadaje, što pracuje ŭ tatu-škole i miedsiastroj u ankałahičnym centry, a taksama napisała miedycynski dapamožnik dla majstroŭ tatu.
«U adnaho chłopca, jaki zajmaŭsia tatuiroŭkami, pamierła jaho budučaja žonka. U ich pavinna było adbycca viasielle na vychadnych. Dziaŭčyna zachacieła nabić tatu, i chłopiec zrabiŭ jaho», — patłumačyła jana.
Raniej paviedamlałasia, što dziaŭčyna z Maładziečna ŭ chatnich umovach zrabiła tatuiroŭku na levym pieradpleččy. Praz paru dzion paśla pracedury ŭ jaje padniałasia vysokaja tempieratura, pačyrvanieła i aciakła vobłaść tatuiroŭki. Chutkuju dapamohu vyklikaŭ jaje chłopiec, dziaŭčynu pryvieźli ŭ balnicu, ale vyratavać jaje daktary nie zmahli.
Zhodna ź infarmacyjaj u ŚMI, sudova-miedycynskaja ekśpiertyza vyznačyła, što śmierć nastupiła ŭ vyniku zapalenčaha pracesu ŭ arhaniźmie, to-bok siepsisu.
Volha ž dadaje, što ŭ dziaŭčyny taksama znajšli dvuchbakovuju pnieŭmaniju, jakaja praciakała bieź simptomaŭ:
«Chłopca abvinavacili ŭ tym, što jon vinavaty ŭ tym, što adbyłosia. Ja i pahadžusia, i nie. Hladzicie, dvuchbakovaja pnieŭmanija bieśsimptomnaja. To-bok čałaviek nie moh skazać, što ŭ jaho niešta balić. Nu, moža niejkaja zadyška była, kašal — moładź na takoje nikoli nie źviartaje ŭvahi. Tolki kali pryciśnie, tady. I ŭsie tatu-majstry viedajuć: lubaja tatuiroŭka (vialikaja, maleńkaja) — heta stres dla arhanizma. Imunitet u lubym vypadku pačynaje reahavać navat na nievialikaje paškodžańnie skury».
Volha ličyć, što tatuiroŭka stała dadatkovym faktaram da asnoŭnaj chvaroby. Jana raić usim majstram tatu ŭvažliva raspytvać klijentaŭ navat pra samyja minimalnyja simptomy chvarob i alerhii.
A taksama rekamienduje davać na podpis zhodu na naniasieńnie tatu, dzie jość i apytańnie nakont chvarob, jakija čałaviek maje. Admaŭlacca ad hetaha nielha, navat kali pa tatu pryjšoŭ svajak ci niejki blizki siabar.
Čempijonka pa tajskim boksie pierabiła tatu z tvaram Łukašenki ŭ siabie na nazie
Illu Dubskaha ŭ kałonii prymusili samomu sabie lazom zrezać tatuiroŭku z Pahoniaj
Straciŭ pałovu tvaru, ale viarnuŭsia da zvyčajnaha žyćcia. Historyja biełarusa z tatuiroŭkaj na miescy voka
Majstryca z Polščy robić tatuiroŭki, ad vyhladu jakich moža ŭkałychać
Kamientary