Pad Homielem pačynajuć budaŭnictva najbujniejšych u Biełarusi mohiłak
U Homielskim rajonie, kala vioski Stukačoŭka, ź siaredziny kastryčnika pačynajuć budaŭnictva novych vialikich mohiłak — «Mohiłki №2, krematoryj i kałumbary». Pra heta śviedčyć abviestka ab tendary, apublikavanaja Upraŭleńniem kapitalnaha budaŭnictva Homiela, piša «Fłahštok».
Na hetym etapie idzie pieršaja čarha budaŭnictva i stvareńnie pieršaha puskavoha kompleksu. Usiaho prajekt raźličany na čatyry čarhi.
U 2024 hodzie Homielski rajvykankam pravodziŭ hramadskaje abmierkavańnie prajekta, ale jano časova było prypyniena z-za zaŭvah ad adnaho čałavieka — Valeryi Jafremavaj, jakaja patrabavała dapracavać spravazdaču pa acency ŭździejańnia na navakolnaje asiarodździe. Paśla dapracoŭki spravazdača była zaćvierdžanaja, a hramadskaje abmierkavańnie adnoŭlena.
Płanujecca vysiakańnie lesu na ŭčastku płoščaj 150 hiektaraŭ, bo terytoryja znachodzicca ŭ lasnym masivie i miažuje z najaŭnymi mohiłkami. Paśla realizacyi prajekta Stukačoŭskija mohiłki stanuć samymi vialikimi ŭ Biełarusi, pierasiahnuŭšy pamieram Paŭnočnyja mohiłki ŭ Minsku.
Na pieršyja try čarhi budaŭnictva adviedziena terytoryja dla tradycyjnych pachavańniaŭ płoščaj 127 hiektaraŭ, dzie źmieścicca prykładna 182 tysiačy mahił.
Pieršuju čarhu płanujecca zaviaršyć da siaredziny sakavika 2026 hoda, na heta ź biudžetu vydzielena 2,685 miljona rubloŭ (kala 911 tysiač dalaraŭ). Pieršy puskavy kompleks uklučaje 650 dvuchmiesnych pachavańniaŭ na 1,76 ha.
Prajekt taksama praduhledžvaje budaŭnictva krematoryja i kałumbaryjaŭ dla pachavańnia urnaŭ z popiełam. Na siońniašni dzień u Biełarusi jość tolki adzin krematoryj i kałumbaryi ŭ Minsku, tamu žychary Homiela i inšych rehijonaŭ zmušanyja dastaŭlać pamierłych u stalicu.
Budaŭnictva kompleksu krematoryja i kałumbaryjaŭ u Stukačoŭcy zapłanavana tolki na čaćviortuju čarhu prajekta, i jaje zaviaršeńnie mahčyma nie raniej za 2028 hod — pry najaŭnaści finansavańnia.
Ciapier čytajuć
U adkrytym dostupie apublikavali bazu 4000 štatnych supracoŭnikaŭ KDB, imiony ahientaŭ i infarmataraŭ nie nazyvajuć19
Kamientary