«Dapuściŭ roskvit narkakartelaŭ». ZŠA ŭviali sankcyi suprać prezidenta Kałumbii Hustava Pietra
Ułady ZŠA ŭviali sankcyi suprać prezidenta Kałumbii Hustava Pietra, zajaviŭšy, što jon nie zdoleŭ strymać niezakonny abarot narkotykaŭ. Abmiežavańni taksama zakranuli jaho žonku i starejšaha syna, paviedamlaje Bi-bi-si.
«Prezident Pietra dapuściŭ roskvit narkakartelaŭ i admoviŭsia spynić ich dziejnaść», — zajaviŭ ministr finansaŭ ZŠA Skot Biesient.
Akramia siamji prezidenta, amierykanski Minfin taksama ŭvioŭ sankcyi ŭ dačynieńni da ministra ŭnutranych spraŭ Kałumbii Armanda Bieniedeci.
Ludzi, suprać jakich uviedzieny sankcyi, straciać dostup da amierykanskaj majomaści ci aktyvaŭ, jakija im naležać.
U minułym Kałumbija ličyłasia sajuźnikam ZŠA ŭ baraćbie suprać narkotykaŭ: jaje ŭłady štohod atrymlivali ad Vašynhtona sotni miljonaŭ dalaraŭ dla ŭmacavańnia ŭzbrojenych sił. Adnak adnosiny Pietra z prezidentam ZŠA Donaldam Trampam stali vielmi napružanymi.
Biesient zajaviŭ, što paśla prychodu da ŭłady Pietra, sacyjalista i byłoha kiraŭnika adnoj ź levych partyzanskich hrupovak, vytvorčaść kakainu ŭ Kałumbii «padskočyła da samych vysokich pakazčykaŭ za niekalki dziesiacihodździaŭ, zapoŭniŭšy Złučanyja Štaty i atručvajučy amierykancaŭ».
Minfin ZŠA ličyć Kałumbiju samym bujnym eksparcioram kakainu ŭ śviecie, pavodle jaho danych, kraina ŭjaŭlaje «značnuju pahrozu» dla ZŠA z punktu hledžańnia narkotykaŭ.
Pietra adchilaje abvinavačvańni Vašynhtona i śćviardžaje, što zmahaŭsia z kantrabandaj narkotykaŭ «na praciahu dziesiacihodździaŭ», a taksama dapamahaŭ ZŠA zmahacca z užyvańniem kakainu.
«Heta poŭny paradoks, ale ni kroku nazad i nijakaha stajańnia na kaleniach», — napisaŭ Pietra ŭ svaim akaŭncie ŭ sietcy Ch.
Sankcyi stali praciaham abvastryŭsia kanflikt pamiž Pietra i Trampam. Raniej kałumbijski prezident abvinavaciŭ amierykanskaha lidara ŭ «pazasudovych pakarańniach śmierciu» i parušeńni mižnarodnaha prava ŭ suviazi z udarami pa sudnach, padazronych u pieravozcy narkotykaŭ. Tramp nazvaŭ Kałumbiju «narkaprytonam».
Za apošnija dva miesiacy było źniščana 10 sudnaŭ, padazronych amierykanskimi ŭładami ŭ narkahandli, a kolkaść zahinułych skłała 43 čałavieki.
U vieraśni Pietra ŭ intervju Bi-bi-si nazvaŭ ŭdary pa sudnach «aktam tyranii» i abvinavaciŭ ZŠA ŭ zabojstvie kałumbijskaha hramadzianina i parušeńni suvierenitetu krainy.
Praktyka ŭviadzieńnia sankcyj suprać lidaraŭ dziaržaŭ nie zanadta raspaŭsiudžana, ale takija vypadki sustrakajucca.
U hadavinu śmierci Žanny Fryskie Dźmitryj Šepieleŭ raspavioŭ, čamu nie dazvalaje synu bačycca ź jaje svajakami16
Kamientary