Łukašenka: Raman Pratasievič — daŭni supracoŭnik biełaruskaj raźviedki
Łukašenka pa-raniejšamu abviarhaje prymusovuju pasadku samalota Ryanair i robić vyhlad, što piłoty sami vyrašyli siadać u Minsku — što źjaŭlajecca chłuśnioj. Ciapier jon pryploŭ siudy i druhuju kanśpirałahičnuju teoryju — što Pratasievič, dziela jakoha pasadzili samalot, nasamreč byŭ daŭnim raźviedčykam, ukaranionym u šerahi apazicyi. Ale pakolki samalot pasadzili — naturalna, pa vinie Litvy, — to i, maŭlaŭ, daviałosia zdymać błohiera z rejsa i sudzić. Pytańnie — čamu Łukašenka zajaviŭ pra heta ciapier?
Alaksandr Łukašenka nazvaŭ błohiera Ramana Pratasieviča supracoŭnikam biełaruskaj raźviedki.
Raskazvajučy ŭ Lepielskim rajonie pra situacyju vakoł pierapravy ŭ Litvu cyharet z dapamohaj mieteazondaŭ, Łukašenka paskardziŭsia, što apanienty za miažoj prosta šukajuć padstavu, kab pasprabavać «nachilić» biełaruski bok.
Niečakana ŭ jakaści prykładu jon pryvioŭ situacyju z zatrymańniem na borcie samalota Ramana Pratasieviča i Safii Sapieha.
«Doŭha raskazvać nie budu. Pratasievič — heta supracoŭnik našaj raźviedki. Nam treba było jaho zatrymlivać? A voś pytańnie, čamu jany [rejsam Ryanair] u Vilniu lacieli, tam nie sieli, a raźviarnulisia i ŭ Minsk prylacieli, sieli paśla zvanka, što ŭ ich na borcie tam niejkaja vybuchoŭka… Nu sadziciesia, vy ŭ Vilniu lacieli, nad Vilniaj byli — sadziciesia. Raźviarnulisia, prylacieli ŭ Minsk. Sieli ŭ Minsku. Ja kažu: «Nu što, pravodźcie apieracyju, jon ža pad prykryćciom pracavaŭ hetych źbiehłych. Pravodźcie apieracyju jak naležyć», — zajaviŭ jon.
«Pryjšłosia nam apieracyju pravodzić pa jaho zatrymańni. Chacia nam nie treba było jaho zatrymlivać. Jon pryjechaŭ u Hrecyju, jaho tudy vyklikali, jon davioŭ raźviedčykam usio, što nas cikaviła, atrymaŭ zadańnie i lacieŭ nazad. Tudy, dzie pracavaŭ, praź Vilniu. Nas abvinavacili ŭ tym, što my zatrymali apazicyjaniera. A jon nie naš apazicyjanier. My nie zatrymlivali apazicyjaniera. Voś uviali sankcyi», — skazaŭ jon.
Słovy Łukašenki pra samalot — chłuśnia. Samalot Ryanair prymusova pasadzili 23 maja 2021 hoda. Dyśpietčar nacyjanalnaha aeraporta daŭ pakazańni, jak jaho dziejańniami ŭ toj dzień kiravaŭ supracoŭnik Kamiteta dziaržaŭnaj biaśpieki Biełarusi.
Pratasieviča i Sapiehu zatrymali, paśla pieraviali pad chatni aryšt da suda. Paźniej Pratasieviču prysudzili 8 hadoŭ kałonii, Sapieha — 6 hadoŭ, ale praz čas maładych ludziej pamiłavali.
Varta adznačyć, što Raman Pratasievič niadaŭna prapaŭ. Jaho nie vidać užo dva z pałovaj miesiacy.
Asabisty telehram-kanał Pratasieviča nie abnaŭlajecca ad 18 žniŭnia.
Telehram-kanał z navinami Sprava, jaki stvaraŭ Pratasievič, novyja dopisy publikuje rehularna. Ale jaho daŭno viadzie nie Pratasievič — rytoryka i temy pastoŭ stali inšymi.
Tyja, chto sprabavaŭ źviazacca z Pratasievičam, kažuć, što jon nie adkazvaje na paviedamleńni.
Apošni raz jaho bačyli amal try miesiacy tamu. Tady jon zapisaŭ videa, dzie vyhladaŭ strašna pryhniečanym. Jon kazaŭ, što nie moža znajści siabie ŭ Biełarusi, nie moža znajści pracy i chacieŭ by vyjechać.
Ciapier čytajuć
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje1010
Kamientary