«Drobnyja zładziužki». Rabavańnie Łuŭra ździejśnili žychary biednaha pryharada Paryža

Prakuror Paryža Łor Bieko zajaviła, što ludzi, jakija ŭ kastryčniku vykrali z Łuŭra kaštoŭnaści francuzskich manarchaŭ, byli drobnymi złačyncami i žyli ŭ biednym pryharadzie stalicy Francyi, piša Bi-bi-si.

«Heta, viadoma, nie zusim užo drobnaje, paŭsiadzionnaje złačynnaje asiarodździe. Ale heta taki jaho typ, jaki my, jak praviła, nie asacyjujem z vyšejšymi ešałonami arhanizavanaj złačynnaści», — skazała Bieko ŭ intervju radyjostancyi Franceinfo.

Jana dadała, što čaćviora aryštavanych i abvinavačanych u suviazi z rabavańniem ludziej — troje mužčyn i žančyna — «vidavočna miascovyja», ludzi, jakija «ŭsie bolš ci mienš žyvuć u rajonie Sen-Deni» (biednym pryharadzie Paryža, raźmieščanym na poŭnač ad stalicy).

Pa słovach Bieko, dvoje mužčyn z čatyroch aryštavanych majuć mnostva sudzimaściaŭ za kradziež.

U subotu abvinavačvańni ŭ suviazi z rabavańniem Łuŭra byli pradjaŭlenyja dvum padazravanym: 38‑hadovaj žančynie z horada Kurnioŭ (jon raźmieščany kala Sen-Deni) i 37‑hadovamu mužčynu. Bieko raskazała, što hetyja ludzi znachodziacca ŭ adnosinach i ŭ ich jość dzieci, ale nie dała inšych padrabiaznaściaŭ.

Žančyna i mužčyna, imiony jakich nie nazyvajucca, admaŭlajuć dačynieńnie da złačynstva.

Da hetaha ŭłady taksama aryštavali jašče dvaich padazravanych: 34‑hadovaha hramadzianina Ałžyra, jaki žyvie ŭ Francyi (jaho asobu ŭdałosia ŭstanavić dziakujučy śladam DNK na skutery, jaki vykarystoŭvaŭsia dla ŭciokaŭ), a taksama 39‑hadovaha taksista z pryharada Paryža. Hetyja ludzi «častkova pryznali» svoj udzieł u rabavańni Łuŭra, paviedamlali pravaachoŭnyja orhany.

Śledstva miarkuje, što nalot na samy papularny muziej śvietu ździejśnili čatyry čałavieki, i adzin ź ich pa-raniejšamu chavajecca.

Na hetym tydni ŭłady taksama zatrymali jašče troch čałaviek, jakich praviarali na dačynieńnie da rabavańnia, ale jany byli vyzvaleny biez pradjaŭleńnia abvinavačvańniaŭ.

Jak raźvivałasia rabavańnie

U niadzielu, 19 kastryčnika, hrupa padazravanych padjechała da Łuŭra ŭ 09:30 pa miascovym časie, nieŭzabavie paśla taho, jak muziej adkryŭsia dla naviedvalnikaŭ.

Vykarystoŭvajučy skradzieny hruzavik ź miechaničnaj leśvicaj i lulkaj, jany padnialisia da bałkona Łuŭra, jaki vychodzić na nabiarežnuju Sieny. Pry dapamozie dyskavych razakoŭ rabaŭniki razrezali akno, uvajšli ŭ Halereju Apałona, a zatym adkryli siejfy z kaštoŭnaściami.

Pavialičyć

Pavodle danych prakuratury, złamyśniki znachodzilisia ŭ budynku Łuŭra na praciahu čatyroch chvilin. U 09:38 jany źbiehli na dvuch skutarach, jakija znachodzilisia kala budynka, a paśla hetaha pierasieli na aŭtamabili.

Im udałosia vynieści nieacennyja histaryčnyja artefakty na sumu kala 88 młn jeŭra.

Ministerstva kultury Francyi paviedamiła, što siarod vykradzienych pradmietaŭ byli:

• dźvie broški, karsažny bant i dyjadema impieratrycy Jaŭhienii, žonki Napaleona III;
• izumrudnaje kalje i zavušnica z kalekcyi Maryi-Łuizy, žonki Napaleona I;
• kalje, para zavušnic i dyjadema, jakija naležali Maryi Amalii, žoncy karala Łui-Filipa I, i Hartenzii Baharne, maci Napaleona III.

Usie hetyja pradmiety ŭpryhožany tysiačami bryljantaŭ i inšych kaštoŭnych kamianioŭ. 

Jašče prynamsi adna vykradzienaja relikvija, karona impieratrycy Jaŭhienii, była znojdziena niedaloka ad miesca złačynstva. Vidać, złodziei kinuli ci zhubili jaje padčas uciokaŭ.

Prakurory aścierahajucca, što kaštoŭnaści ŭžo pierapraŭleny za miažu, a značyć znajści ich budzie vielmi składana. Adnak Bieko kazała, što pradać vykradzienyja kaštoŭnaści zaraz niemahčyma, i adznačała, što jašče nie pozna ich viarnuć.

Jana taksama źviarnułasia da tych, u čyich rukach znachodziacca kaštoŭnaści, adznačyŭšy, što ŭ vypadku ich dobraachvotnaha viartańnia «sudy, vidavočna, prymuć da ŭvahi toj fakt, što kradziež nie pryvioŭ da jakich-niebudź strat».

Paśla rabavańnia Łuŭra francuzskija ŭłady ŭzmacnili miery biaśpieki va ŭsich muziejach krainy. 

• 4
• 0
• 1
• 5
• 2
• 0
• 0
• 0