«Jon nie źbieh, a paimčaŭ da mianie ŭ raddom». Sud vynies surovaje pakarańnie ŭ spravie śmiarotnaha DTZ u centry Minska

«43‑hadovy kiroŭca Audi, ruchajučysia pa vulicy Lenina, prajechaŭ na čyrvonaje praź pierakryžavańnie ź miascovym prajezdam, jaki złučaje vulicy Lenina i Kastryčnickuju. U vyniku jon sutyknuŭsia z Volkswagen 51‑hadovaha mužčyny, jaki pačaŭ ruch na zialonaje. Ad udaru Volkswagen vyjechaŭ za miežy prajeznaj častki i ŭrezaŭsia ŭ aśviatlalnuju mačtu, a Audi apynuŭsia na sustrečnaj», — raspaviali ŭ DAI Minska.

«Kiroŭcu Volkswagen i pasažyra Audi dastavili ŭ balnicu dla abśledavańnia», — paviedamili inśpiektary.

Śledstvam było ŭstanoŭlena, što kiroŭca Audi znachodziŭsia ŭ stanie ałkaholnaha apjanieńnia i jechaŭ z chutkaściu 130 km/h pry dazvolenaj 60 km/h.

U vyniku DTZ ad atrymanych traŭmaŭ u balnicy pamior pryjaciel abvinavačanaha, jaki jechaŭ ź im i nie byŭ pryšpileny. Vadziciel taksi atrymaŭ cialesnyja paškodžańni, jakija naležać da katehoryi ciažkich pavodle prykmiety niebiaśpieki dla žyćcia, havorycca ŭ materyjałach spravy.

— Paśla avaryi abvinavačany nie akazaŭ dapamohi paciarpiełym, a kinuŭ aŭtamabil i źbieh ź miesca zdareńnia. Na nastupny dzień vinavaty ŭ avaryi sam źviarnuŭsia ŭ orhany ŭnutranych spraŭ, — paviedamlaje Hienieralnaja prakuratura.

43‑hadovamu minčuku inkryminavanyja parušeńnie praviłaŭ darožnaha ruchu, jakoje pa nieaściarožnaści mieła vynikam śmierć, i pryčynieńnie ciažkaha cialesnaha paškodžańnia, a taksama śviadomaje pakidańnie paciarpiełaha ŭ niebiaśpiečnym dla žyćcia i zdaroŭja stanie. Sprava nakiravana ŭ sud. U dačynieńni abvinavačanaha ŭžyta miera ŭtrymańnia ŭ vyhladzie zaklučeńnia pad vartu.

Z Onliner źviazałasia dziaŭčyna, jakaja nazvałasia žonkaj kiroŭcy Audi. Jana śćviardžaje: jaje muž nie moh być pjany, bo dziaŭčyna była ź im pobač i da avaryi, i paśla jaje.

— Da DTZ my razam z mužam znachodzilisia ŭ raddomie, razam žyli ŭ pałacie. U niejki momant jon vyjšaŭ pahavaryć ź siabram, toj paprasiŭ padvieźci jaho — tak i trapili ŭ avaryju.

Paśla DTZ muž u stanie šoku pabieh da mianie ŭ raddom. Ja razumieju jaho stan: spačatku jon prysutničaŭ na rodach, pieršym uziaŭ dzicia na ruki… Potym bach — i takoje. Nie viedaju, što b ja rabiła ŭ hetaj situacyi i kudy pabiehła b. Toje, što muž byŭ ćviarozy, — heta ja z upeŭnienaściu mahu skazać.

Bolš za toje, u RUUS jon pryjšoŭ nie praz sutki, a praz paru hadzin. Tak, jon vinavaty, na žoŭtaje śviatło «daŭ u piedal», kab praskočyć skryžavańnie, a tam taksist. Ale «pjanaha rula» tam nie było.

Jak stała viadoma, kiroŭcu Volkswagen ustanavili II hrupu invalidnaści. Što vyrašyŭ sud?

— Na padstavie č. 4 art. 317 i č. 3 art. 159 Kryminalnaha kodeksu sud pryznačyŭ pakarańnie ŭ vyhladzie pazbaŭleńnia voli na termin 8 hadoŭ sa štrafam 400 bazavych vieličyń (16,8 tys. rubloŭ) i z pazbaŭleńniem prava zajmacca dziejnaściu, źviazanaj z kiravańniem transpartnymi srodkami, na termin 8 hadoŭ, — raskazała padrabiaznaści nakont spravy słužba infarmacyi prakuratury horada Minska.

Prysud u zakonnuju siłu nie ŭstupiŭ, moža być abskardžany i apratestavany ŭ apielacyjnym paradku.

• 2
• 0
• 1
• 2
• 2
• 0
• 1
• 0