Akcyjaniery Tesla ŭchvalili patencyjnuju vypłatu Masku amal tryljona dalaraŭ

Akcyjaniery Tesla ŭchvalili rekordny kampiensacyjny pakiet dla zasnavalnika kampanii Iłana Maska, jaki moža skłaści amal 1 trłn dalaraŭ. Biesprecedentny pa sumie bonus byŭ uchvaleny 75% akcyjanieraŭ Tesla, jakija prahałasavali na štohadovym ahulnym schodzie ŭ čaćvier, piša Bi-bi-si.

Pahadnieńnie abaviazvaje Maska, jaki źjaŭlajecca najbahaciejšym čałaviekam na płaniecie, na praciahu nastupnych hadoŭ značna pavysić rynkavy košt kampanii, jakaja vyrablaje elektramabili, i dasiahnuć inšych pakazčykaŭ. Kali jon zrobić heta, jaho ŭznaharodziać sotniami miljonaŭ novych akcyj Tesla.

Jak adznačaje CNN, patencyjnaja vypłata moža zrabić Maska pieršym tryljanieram u historyi. U pačatku kastryčnika biznesmen užo staŭ pieršym čałaviekam, pamier bahaćcia jakoha dasiahnuŭ 500 młrd dołaraŭ.

Ciapier rynkavaja kapitalizacyja Tesla składaje kala 1,4 trłn dołaraŭ — Masku treba davieści jaje da 8,5 trłn dalaraŭ na praciahu bližejšych 10 hadoŭ. Jamu taksama nieabchodna ŭvieści ŭ kamiercyjnuju ekspłuatacyju miljon bieśpiłotnych aŭtamabilaŭ Tesla Robotaxi.

«Toje, što my źbirajemsia zrabić, — heta nie prosta novaja hłava ŭ budučyni Tesla, a zusim novaja kniha, — skazaŭ Mask aŭdytoryi na schodzie ŭ Ostynie, štat Techas. — Inšyja schody akcyjanieraŭ — heta sumnyja mierapryjemstvy, a našy — vybuchovyja. Heta ŭzrušalna».

Uchvaleny pakiet nakiravany na toje, kab Mask zastavaŭsia ŭ Tesla nie mienš za 7,5 hadoŭ. Heta dazvolić jamu pavialičyć svaju dolu ŭ kampanii z 12 da bolš čym 25%.

Mask raniej acharaktaryzavaŭ patencyjny rost Tesla jak biaźmiežny, zajaviŭšy, što jana stanie samaj kaštoŭnaj kampanijaj u śviecie, kali realizuje płany ŭ halinie technałohij aŭtanomnaha vadžeńnia i štučnaha intelektu.

Mask namiaknuŭ, što moža pakinuć Tesla ci adyści na druhi płan, kali jaho dola nie budzie pavialičana nastolki, kab jon moh vyznačać budučyniu kampanii. Zaklikajučy akcyjanieraŭ padtrymać prapanovu, kiraŭnik savieta dyrektaraŭ Tesla Robin Denchałm zajaviła, što ŭtrymańnie Maska maje vyrašalnaje značeńnie dla budučyni kampanii, i papiaredziła, što akcyi Tesla mohuć abvalicca, kali jon sydzie.

Rada dyrektaraŭ Tesla taksama adchiliła krytyčnyja zaŭvahi ab tym, što padtrymka miljarderam sprečnych palityčnych fihur niehatyŭna adbivajecca na prodažach, adznačaje AFP. Novy pakiet uznaharodžańniaŭ byŭ adchileny bujnymi inviestarami Tesla, u tym liku Dziaržaŭnym piensijnym fondam Narviehii — najbujniejšym fondam nacyjanalnaha dabrabytu ŭ śviecie, a taksama najbujniejšym dziaržaŭnym piensijnym fondam ZŠA CalPERS, jakija i raniej vystupali suprać vypłat vielizarnych bonusaŭ Masku.

• 3
• 2
• 0
• 0
• 0
• 0
• 0
• 0