MZS Litvy: Meta Minska — vyjści ź izalacyi

Litva nie paddasca palityčnamu šantažu, ale hatovaja da techničnaha dyjałohu — prezident Litvy Hitanas Naŭsieda i ministr zamiežnych spravaŭ Kiastucis Budrys aficyjna adkazali biełaruskamu režymu na prapanovy ab palityčnym dyjałohu, jaki faktyčna staŭ umovaj šantažu — inakš biełaruski režym admaŭlajecca adpuścić fury z krainy.

Kiraŭnik litoŭskaj dypłamatyi Kiastucis Budrys zajaviŭ, što sapraŭdnaja meta Minska — atrymać kansultacyi na ŭzroŭni Ministerstvaŭ zamiežnych spravaŭ, kab vyjści ź mižnarodnaj palityčnaj izalacyi i dabicca źniaćcia sankcyj.

«Imknieńni Biełarusi adhadvajucca, niekatoryja ź ich vielmi kankretnyja i viadomyja… Pieršaja zadača — źmianić, kali havaryć naŭprost, pierałamać palityku Jeŭrapiejskaha sajuza adnosna Biełarusi i Rasii, jakaja źjaŭlajecca palitykaj mižnarodnaj izalacyi i admovy razmaŭlać z režymam», — skazaŭ Budrys.

Ministr padkreśliŭ, što sam fakt vychadu na palityčna-dypłamatyčny ŭzrovień aznačaŭ by, što Biełaruś «užo zrabiła krok» da adnaŭleńnia svajho miesca ŭ mižnarodnych arhanizacyjach i źniaćcia sankcyj, jakija «vielmi balučyja dla ich u ekanamičnym i finansavym płanie».

Litva ličyć, što ŭ vybary jaje ŭ jakaści mišeni jość pytańnie nie tolki ab dvuchbakovych adnosinach, ale i pytańnie palitycy ŭsiaho Jeŭrapiejskaha sajuza.

«[Biełaruś] sprabuje źmianić naša staŭleńnie i palityku šantažom, takim žorstkim, bandyckim sposabam», — dadaŭ jon.

Prezident Litvy Naŭsieda taksama zajaviŭ, što Biełaruś sprabuje pieratvaryć techničnyja pytańni ŭ palityčnyja. Jon padkreśliŭ, što Litva nie budzie paddavacca takomu cisku: «Litva, biezumoŭna, hatovaja da supracoŭnictva na techničnym uzroŭni ŭ pošukach rašeńniaŭ. My nie paddadzimsia šantažu, ale i nie staniem zatykać vušy i začyniać dźviery», — cytuje kiraŭnika dziaržavy BNS.

Naŭsieda źviarnuŭ uvahu na toje, što dziejańni biełaruskich uładaŭ mohuć być skaardynavanyja z Rasijaj na fonie niavyznačanaści vakoł mirnaha płanu ZŠA pa Ukrainie: «Davajcie zrazumiejem, što Biełaruś — blizki sajuźnik Rasii, tamu ich dziejańni, u tym liku jakija destabilizujuć, mohuć być skaardynavanyja. I čym bolš niavyznačanaści, čym bolš šumu, tym bolš vyhadna hetym ahresiŭnym režymam».

Jon znoŭ nazvaŭ incydenty z pavietranymi šarami i hruzavikami «techničnymi pytańniami, jakija pamiežniki z abodvuch bakoŭ mohuć vyrašyć biez prablem», i adznačyŭ, što niama nieabchodnaści ŭ «štučnaj sprobie abvastryć situacyju».

U kancy kastryčnika Litva zakryła, a potym daterminova adkryła pamiežnyja punkty propusku «Miedniki» i «Salečniki» praz pahrozu kantrabandysckich pavietranych šaroŭ, jakija litoŭskija palityki ličać hibrydnaj atakaj.

Biełaruski bok, niahledziačy na adkrytuju miažu, dahetul nie vypuskaje litoŭskija hruzaviki sa svajoj terytoryi.

• 3
• 1
• 0
• 2
• 0
• 0
• 0
• 0