Naŭsieda: My možam znoŭ zakryć miažu ź Biełaruśsiu, ale biez dapamohi inšych nie damo rady
Prezident Litvy Hitanas Naŭsieda zajaviŭ, što kali praciahnucca paloty kantrabandnych pavietranych šaroŭ ź Biełarusi, miažu možna budzie zakryć u luby momant. Adnak pryznaŭ, što adna Litva nie zdolnaja akazać istotny ŭpłyŭ na pavodziny režymu Łukašenki, paviedamlaje BNS.
«My adkryvali miažu, spadziejučysia na dobruju volu Biełarusi, ale pakul jaje nie bačym. Jak adkryli — tak i možam zakryć, kali nie budzie sihnałaŭ, što režym choča cyvilizavanaha suisnavańnia», — skazaŭ Naŭsieda.
Jon, adnak, dadaŭ, što dla ŭpłyvu na Biełaruś nieabchodnaje sumiesnaje dziejańnie z krainami ES i transantłantyčnymi partniorami, asabliva z ZŠA.
Prezident adznačyŭ, što ZŠA majuć svaje płany adnosna biełaruskaha režymu, ale z-za niepradkazalnych pavodzin režymu ich realizacyja była adkładzienaja. U vyniku ŭ spravie kantaktaŭ z ZŠA taksama mohuć być nastupstvy, kali Biełaruś nie demanstruje dobruju volu.
Hitanas Naŭsieda zhadaŭ, što paśla adkryćcia Litvoj dvuch pamiežnych punktaŭ ź Biełaruśsiu biełaruski bok nie dazvalaje litoŭskim hruzavikam viartacca nazad, a taksama što ŭ Litvie ŭžo dvojčy prypyniali pracu aeraporta Vilniusa z-za palotaŭ kantrabandnych šaroŭ.
Prezident Litvy padkreśliŭ, što krytyka ŭrada mahčymaja, ale razam ź joj treba prapanoŭvać kankretnyja rašeńni. Jon paraŭnaŭ situacyju z napadam Rasii na Ukrainu, kali vinavać Kijeŭ było b absurdnym.
Naŭsieda taksama adznačyŭ suviaź pamiž uzmacnieńniem palotaŭ šaroŭ i razhladam amierykanskaha płana miru dla Ukrainy. Pavodle jaho, aŭtakratyčnyja režymy mohuć skarystacca takoj mižnarodnaj situacyjaj dla destabilizacyi.
Raniej, u kancy kastryčnika, Litva zakryvała miažu ź Biełaruśsiu amal na try tydni z-za pahrozy ad kantrabandnych mietearałahičnych šaroŭ, ale paźniej adkryła jaje. Paśla hetaha incydenty z šarami zafiksavali 20 i 23 listapada.
Tym časam biełaruskija ŭłady praciahvajuć utrymlivać litoŭskija hruzaviki, što, na dumku litoŭskaha kiraŭnictva, źjaŭlajecca hibrydnaj ci kambinavanaj atakaj Biełarusi na krainu.
Čamu litoŭskija fury dahetul nie vypuskajuć ź Biełarusi
Litoŭskaja apazicyja atakuje ŭrad za toje, što miažu adkryli, a fury zastajucca ŭ pałonie
Premjer Litvy: Kali situacyja ź Biełaruśsiu nie źmienicca, znoŭ zakryjem miažu
Kiraŭnik kamisii Siejma Litvy: My pavieryli ŭ dobruju volu Biełarusi i paśpiašalisia z adkryćciom miažy
Ciapier čytajuć
U biełaruski ŭ Italii zabrali dvuch synoŭ — bo jana nie pryznavała dziaržavu i nie adpuskała dziaciej u škołu i da doktara6
Kamientary