Napiaredadni ranica ŭ Salihorsku akazałasia pa-sapraŭdnamu niezvyčajnaj. Žychary horada stali masava dzialicca ŭ sacsietkach fatahrafijami i videa niezvyčajnaj atmaśfiernaj źjavy — hustoha ružovaha tumanu, što achutaŭ vulicy, piša «Minskaja praŭda».
Adnoj ź pieršych źjavu zafiksavała karystalnica tyktoku. «Videa bieź filtraŭ. Siońnia ranicaj byŭ ružovy tuman u Salihorsku. Nasamreč koler byŭ bolš ružovy, čym fijaletavy», — adznačyła aŭtarka zapisu pad nikam @senora_darya.
Emocyi ŭ kamientarach varjiravalisia ad šoku da zachapleńnia. «Skazać, što ja była ŭ šoku, — ničoha nie skazać», «Ja taksama zaŭvažyła, što siońnia była ružovaja ranica. Pryhoža i niezvyčajna», «Dy i ŭ nas taksama byŭ ružovy», — dzialilisia karystalniki.
Čamu tuman byŭ ružovym? Jakija mohuć być tłumačeńni źjavy
Mietearołahi i fiziki vyłučajuć niekalki klučavych pryčyn, jakija mahli pieratvaryć zvyčajny tuman u ružovy.
1. Efiekt «ranišniaha zachodu». Heta asnoŭnaja i samaja vierahodnaja pryčyna. Sam pa sabie tuman biaskolerny. Čaraŭnictva pačynajecca dośvitkam, kali sonca znachodzicca nizka nad haryzontam. Jaho pramianiam davodzicca prabivacca praz bolš ščylnyja płasty atmaśfiery, jakija dziejničajuć jak hihancki śviatłafiltr, «adsiavajučy» chałodnyja sinija adcieńni i prapuskajučy ciopłyja — čyrvonyja i aranžavyja. Husty tuman vystupaje ŭ roli vielizarnaha ekrana, jaki adlustroŭvaje i raśsiejvaje hetaje ružovaje śviatło pa ŭsim horadzie.
2. Anamalii nadvorja i tempieraturnyja areli. Uzimku ružovy tuman časta ŭźnikaje na fonie rezkich pierapadaŭ tempieratury. Kali słupok termomietra značna vyšej za siezonnuju normu, heta spryjaje aktyŭnamu vypareńniu vilhaci i stvareńniu asabliva hustoha imhlistaha «pałatna», jakoje idealna adlustroŭvaje i pierałamlaje soniečnaje śviatło.
3. Upłyŭ cykłonaŭ. Pachmurnaje i tumannaje nadvorje časta supravadžaje cykłony. Pry vyznačanym źbiehu akaličnaściaŭ — ščylnaj vobłačnaści naviersie i praśvietach u haryzoncie — cykłon moža stvaryć idealny «prajektar» dla afarboŭvańnia tumanu ŭ dalikatnyja tony.
Ci niebiaśpiečna heta?
Śpiecyjalisty supakojvajuć: kali tuman maje ružovaje adcieńnie vyklučna praz hulniu śviatła i ŭmovy nadvorja, jon biaśpiečny dla zdaroŭja. Heta pryrodny fienomien, a nie nastupstva technahiennaj avaryi ci zabrudžvańnia, piša «Minskaja praŭda».
Kamientary