Byłoha kalinoŭca Vasila Hračychu asudzili da piaci hadoŭ kałonii
Razam z byłym vajarom Pałka Kalinoŭskaha Vasilom Vieramiejčykam, jakoha Vjetnam vydaŭ Biełarusi, sudzili Vasila Hračychu. Mužčynu zatrymali viasnoj pry nieviadomych abstavinach, piša «Viasna».
Prapahandysty pakazali, jak jaho viaduć pa bałocistaj miascovaści niekalki supracoŭnikaŭ KDB z aŭtamatami. Ahułam kalinoŭcaŭ abvinavacili pavodle dvanaccaci artykułaŭ Kryminalnaha kodeksa. U vyniku Vasila Hračychu asudzili da piaci hadoŭ kałonii, a Vasilu Vieramiejčyku pryznačyli 13 hadoŭ kałonii.
Pra zatrymańnie byłoha kalinoŭca Vasila Hračychi stała viadoma z vypusku navinaŭ na dziaržaŭnym telebačańni «Biełaruś 1» 5 maja 2025 hoda. U prapahandysckim roliku pakazali, jak supracoŭniki KDB z aŭtamatami viali mužčynu pa bałocistaj miascovaści, a potym pieravozili viertalotam. Padčas transparciroŭki jon byŭ z čornym miaškom na hałavie, a ruki byli sčeplenyja śpieradu płastykavaj ściažkaj. Kalinoŭca dastavili viertalotam na aeradrom, dzie pierad pasadkaj u mikraaŭtobus jaho pakazalna na kamieru apytvaŭ Kanstancin Byčak. Paśla kadraŭ zatrymańnia ŭ roliku pakazali videa ź mirnych akcyj pratestu ŭ 2020 hodzie.
Pavodle infarmacyi pres-słužby Pałka Kalinoŭskaha, Vasil dałučyŭsia da ich u mai 2022 hoda, ale pakinuŭ padraździaleńnie ŭžo ŭ červieni taho ž hoda pa ŭłasnym žadańni.
Jak stała viadoma pravaabaroncam, Vasila Vieramiejčyka i Vasila Hračychu sudzili razam.
Ich abvinavačvali pavodle 12 artykułaŭ Kryminalnaha kodeksa: č. 1 i 2 art. 285 (stvareńnie złačynnaj arhanizacyi albo ŭdzieł u joj); art. 290‑3 (prachodžańnie navučańnia ci inšaj padrychtoŭki dla ŭdziełu ŭ terarystyčnaj dziejnaści); č. 1 art. 342 (arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich); č. 1 art. 357 (zmova ci inšyja dziejańni, ździejśnienyja z metaj zachopu dziaržaŭnaj ułady); č. 1 i 3 art. 361‑1 (stvareńnie ekstremisckaha farmavańnia albo ŭdzieł u im); č. 2 art. 361‑3 (udzieł na terytoryi zamiežnaj dziaržavy va ŭzbrojenym kanflikcie); č. 1 i 2 art. 361‑4 (sadziejničańnie ekstremisckaj dziejnaści); art. 364 (hvałt albo pahroza prymianieńnia hvałtu ŭ dačynieńni da supracoŭnika orhanaŭ unutranych spraŭ); č. 1 art. 368 (abraza Łukašenki); art. 369 (abraza pradstaŭnika ŭłady); art. 389 (pahroza ŭ adnosinach da sudździ); art. 391 (pahroza sudździ).
Vasil Vieramiejčyk i Vasil Hračycha ŭtrymlivajucca ŭ SIZA-1 u Kaladzičach.
Ciapier čytajuć
Radzilnyja damy spaborničajuć, u kaho 3 lipienia narodzicca bolš dziaciej12
Kamientary