Va Ukrainie vychodzić artbuk «Sož» — pieršy za čatyry hady pierakład ź biełaruskaj movy
Artbuk «Sož» — pieršaje z 2021 hoda biełaruskaje vydańnie, što vychodzić va Ukrainie. Usie srodki ad prodažu pojduć na padtrymku reabilitacyjnaha centra «Łanka», jaki dapamahaje biełarusam-dobraachvotnikam, paranienym u vajnie, paviedamlaje «Novy čas».
«Sož» — pieršy z 2021 hoda pierakład ź biełaruskaj movy, što vychodzić va Ukrainie. Usie srodki ad prodažu nakiroŭvajucca na padtrymku biełaruskaha reabilitacyjnaha centra «Łanka», tamu hetaja kniha — sposab padtrymać dobraachvotnikaŭ, jakija addali svajo zdaroŭje ŭ hetaj vajnie, i adnačasova atrymać artbuk. Heta ŭžo stała tradycyjaj: usie prybytki ad vydańnia aryhinała (2023) taksama išli na padtrymku «Łanki».
Kniha zroblenaja jak dychtoŭny fotaalbom ź vieršami Alesia Płotki i fotazdymkami Alesia Pileckaha (Biełaruś—2020) i Stanisłava Krupaža (Ukraina—2022). Pierakładčyk — viadomy biełarusam Viačasłaŭ Lavicki, jaki, miž inšym, spryjaŭ źjaŭleńniu ŭ Kijevie vulicy Uładzimira Karatkieviča. Ukrainskaja viersija atrymała nazvu «Sož» — u honar raki, što ciače pamiž dźviuma krainami, sučasnaj fizičnaj i mietafizičnaj miažy, «šeraj zony» našaha času.
Aleś Płotka kamientuje:
«Heta jašče adno źviano ŭ humanitarnaj misii, jakuju vykonvaje hetaja kniha, praciah aryhinalnaj viersii. Kali ja pačynaŭ jak pierakładčyk z knihi Ivana Semiesiuka, na prezientacyjach było bahata ŭkraincaŭ, jakija nabyvali jaje dla svaich biełaruskich siabroŭ. A ciapier i maja kniha va ŭkrainskim pierakładzie moža być cikavaja nie tolki ŭkraincam, ale i biełarusam, jakija šukajuć padobny padarunak. Pahatoŭ što aryhinalnaha biełaruskaha vydańnia zastałosia mienš za 10 pracentaŭ».
Kniha vychodzić u vydaviectvie «Koło», što śpiecyjalizujecca na składanych palihrafičnych prajektach (naprykład, artbuk «Maryja» Hryćka Čubaja), pry padtrymcy House of Europe. Papiaredniaja zamova praciahvajecca da 20 śniežnia, paśla knihu možna budzie nabyć u zvyčajnych internet-kniharniach. Kali hrafiki adklučeńniaŭ elektryčnaści nie buduć paharšacca, kamanda prajekta spadziajecca adpravić usie knihi ŭžo na zimovyja śviaty.
Ciapier čytajuć
Čamu amierykancy tak irvucca na Miesiac, što tam buduć zdabyvać? I što da taho biełarusam? Tłumačyć biełaruski astrafizik5
Kamientary