Žychar Ušačaŭ pieradaŭ machlaram 100 tysiač dalaraŭ i nie pryznaŭsia žoncy
Dniom 20 śniežnia 61‑hadovamu žycharu haradskoha pasiołka Ušačy patelefanavali machlary. Pradstaviŭšysia supracoŭnikami arhanizacyi, jakaja absłuhoŭvaje damavyja damafonnyja sistemy, złamyśniki prapanavali zamianić stary čyp na novy.
Paśla atrymańnia zhody na numar telefona paciarpiełaha pačali pastupać paviedamleńni z kodami, jakija jon, vykonvajučy ŭkazańni, paviedamlaŭ, piša pres-słužba MUS.
Nieŭzabavie paśla hetaha mužčynu patelefanavali novyja asoby, jakija pradstavilisia supracoŭnikami pravaachoŭnych orhanaŭ. Jany pačali zapałochvać svaju achviaru vydumanaj historyjaj, zajaviŭšy, što praź jaho bankaŭskija rachunki ažyćciaŭlajucca pieravody hrašovych srodkaŭ na finansavańnie vajennych dziejańniaŭ na terytoryi inšaj krainy.
Pad padstavaj paźbiahańnia kryminalnaj adkaznaści złamyśniki zapatrabavali ad mužčyny «zadekłaravać» usie asabistyja źbieražeńni. Dla hetaha nieabchodna było pieradać hrošy «daviernaj asobie» ŭ Viciebsku.
Vykonvajučy atrymanyja instrukcyi, paciarpieły praź niekalki dzion sabraŭ usie nazapašanyja srodki — 91,5 tys. dalaraŭ, 1450 jeŭra i 8900 biełaruskich rubloŭ, prybyŭ u Viciebsk, dzie pieradaŭ bujnuju sumu kurjeru machlaroŭ.
Źniknieńnie hrošaj na nastupny dzień vyjaviła žonka paciarpiełaha. Spačatku, vykonvajučy dadzienaje złamyśnikam abiacańnie ab nierazhałošvańni, mužčyna nie paviedamlaŭ pra toje, što adbyłosia, adnak paźniej raskryŭ tajamnicu. Siamiejnaja para źviarnułasia ŭ milicyju.
Kamientary