Naŭsieda: Handal kaštoŭnaściami nieprymalny, Litva pa-raniejšamu budzie błakavać tranzit biełaruskich uhnajeńniaŭ
Prezident Litvy Hitanas Naŭsieda ŭ intervju ahienctvu BNS zajaviŭ ab ćviordym namiery adstojvać zabaronu na tranzit biełaruskich kalijnych uhnajeńniaŭ praz Kłajpiedski port, niahledziačy na mahčymy cisk z boku ZŠA. Pavodle słoŭ kiraŭnika litoŭskaj dziaržavy, lubyja sproby abmianiać sankcyjnuju palityku na palityčnyja ci vajennyja vyhady źjaŭlajucca dla jaho pryncypova nieprymalnymi.
Kamientujučy rašeńnie Vašynhtona źniać sankcyi ź biełaruskich uhnajeńniaŭ u abmien na vyzvaleńnie palitviaźniaŭ, Naŭsieda padkreśliŭ, što Litva nie źbirajecca iści na sastupki ŭ hetym pytańni.
«Viedajecie, dla mianie kaštoŭnasnaja palityka — heta nie pustoje paniaćcie. Tamu rabić takija dziejańni [dazvolić tranzit] — heta značyć handlavać kaštoŭnaściami, što dla mianie absalutna nieprymalna», — zajaviŭ prezident Litvy.
Naŭsieda adznačyŭ, što ciapier aktyŭna farmujecca «kaalicyja rašučych» siarod susiednich krain. U pryvatnaści, hetaje pytańnie abmiarkoŭvałasia z premjer-ministrami Polščy i Łatvii, a taksama z novym kancleram Hiermanii Frydrycham Miercam. Pavodle słoŭ litoŭskaha lidara, Mierc padtrymlivaje pazicyju Vilniusa i razumieje metazhodnaść sankcyj suprać režymu ŭ Biełarusi.
Adkazvajučy na pytańnie ab mahčymaści adnaŭleńnia tranzitu ŭ abmien na pavieličeńnie amierykanskaha vajennaha kantynhientu ŭ Litvie ci nakiravańnie prybytku ad tranzitu ŭ abaronny biudžet, Naŭsieda byŭ kateharyčny. Jon nazvaŭ takija razvahi «nieprymalnymi ŭ pryncypie», dadaŭšy, što režym sankcyj ES u dačynieńni da Biełarusi zastajecca ŭ sile, i Brusiel budzie prymać rašeńnie ab ich padaŭžeńni ŭžo ŭ lutym.
Dzieviać čałaviek pamierli ŭ Breście i Minsku — usim im uvodzili adnyja i tyja ž leki. U preparacie znajšli bakteryi5
Kamientary