Tempy prasoŭvańnia rasijskaj armii va Ukrainie ŭpali da minimumu ź viasny minułaha hoda

Najbolš aktyŭnyja bajavyja dziejańni ŭ studzieni rasijskija vojski viali na ŭčastku pamiž Sievierskam i Kanstancinaŭkaj na poŭnačy Danieckaj vobłaści, dzie im udałosia zaniać kala 59,6 kvadratnych kiłamietraŭ. Jašče 37,6 kvadratnych kiłamietraŭ byli zachoplenyja ŭ rajonie Pakroŭska, a kala 36 kvadratnych kiłamietraŭ — na paŭdniovym učastku frontu, pieravažna taksama ŭ Danieckaj vobłaści.

Adnak u pieryjad z 19 pa 25 studzienia prasoŭvańnie Rasii rezka zapavoliłasia: za hety tydzień pad jaje kantrol pierajšło tolki 30,4 kvadratnych kiłamietra — heta najmienšy pakazčyk ź viasny 2025 hoda. Dla paraŭnańnia, u siaredzinie sakavika minułaha hoda za tydzień Rasija zaniała 22,5 kvadratnych kiłamietra. U kancy studzienia rasijskija vojski prasunulisia na 10,7 kvadratnych kiłamietra ŭ rajonie Kanstancinaŭki, na 6,4 — kala Pakroŭska i na 7 — na paŭdniovym učastku frontu.

U cełym studzień pakazaŭ značna horšyja vyniki dla rasijskaha nastupleńnia, čym papiarednija miesiacy. U śniežni, pavodle DeepState, Rasija zachapiła 423 kvadratnyja kiłamietry, a ŭ listapadzie — 489.

Zasnavalnik Conflict Intelligence Team (CIT) Rusłan Lavijeŭ adznačyŭ, što svojeasablivaja «ŭmoŭnaja paŭza» na froncie pačałasia jašče ŭ kancy śniežnia. Na jaho dumku, u pačatku lutaha moža być zafiksavany antyrekord, kali za ŭvieś miesiac rasijskaje prasoŭvańnie budzie amal niezaŭvažnym.

Analityki tłumačać zapavoleńnie nastupleńnia ŭ pieršuju čarhu zimovymi ŭmovami. Vajskovy ekśpiert Kirył Michajłaŭ adznačyŭ, što marazy nie spryjajuć dziejańniam piachoty, choć i robiać umovy bolš zručnymi dla vykarystańnia dronaŭ. Padobnuju acenku daŭ i Lavijeŭ, padkreśliŭšy, što zimoj, pry karotkim śvietłavym dni i zamarazkach, bajavyja dziejańni tradycyjna zapavolvajucca.

Akramia taho, u śniežni rasijskaja armija aktyŭna nastupała ŭ Zaparožskaj vobłaści ŭ kirunku Hulajpola, ale ciapier hetaje prasoŭvańnie amal spyniłasia. Adzin z analitykaŭ CIT vykazaŭ mierkavańnie, što ŭkrainski Hienštab moh uzmacnić abaronu hetaha ŭčastka i vypravić raniejšyja pamyłki.

Finski OSINT-prajekt Black Bird Group taksama źviazvaje źnižeńnie tempaŭ nastupleńnia z nadvorjem, bajami ŭ rajonach Mirnahrada, Pakroŭska i Hulajpola, a taksama z paśpiachovymi kontrnastupalnymi dziejańniami Ukrainy kala Kupianska.

Zapavoleńnie nastupleńnia adbyvajecca na fonie aktyvizacyi mirnych pieramoŭ. U minułyja vychadnyja ŭ Abu-Dabi prajšła pieršaja trochbakovaja sustreča, jakaja nie pryniesła kankretnych damoŭlenaściaŭ, ale, pavodle naziralnikaŭ, pakazała prykmiety aściarožnaha prahresu.

Raniej Rasija vykarystoŭvała pośpiechi na froncie jak arhumient na pieramovach, damahajučysia pieradačy joj usiaho Danbasa. Uvosień Uładzimir Pucin nieadnarazova sustrakaŭsia z vajskoŭcami, paśla čaho zajaŭlaŭ, što Rasija zdolnaja dasiahnuć svaich metaŭ vajennym šlacham. Adnak apošnim časam takija zajavy ź jaho boku nie hučali.

Zamiest naroščvańnia nastupleńnia na froncie Rasija ŭzmacniła ŭdary pa enierhietyčnaj infrastruktury Ukrainy. Paśla pačatku pieramoŭ u AAE rasijskija vojski nanieśli samy mahutny za miesiac udar pa Kijevie, što pryviało da krytyčnaj situacyi ŭ enierhasistemie krainy, blizkaj da humanitarnaj katastrofy.

• 0
• 1
• 0
• 0
• 0
• 0
• 0
• 1