Paśla tatuiroŭki mužčyna straciŭ usie vałasy i pierastaŭ pacieć

Tatuiroŭki, jakija siońnia ŭsprymajucca jak simvał samavyjaŭleńnia i mastactva, mohuć pryvieści da surjoznych miedycynskich uskładnieńniaŭ: ad łakalnych alerhičnych reakcyj da maštabnych sistemnych zbojaŭ u pracy ŭsiaho arhanizma.

Vučonyja z centra dermatałohii i ankadermatałohii Urocłaŭskaha miedycynskaha ŭniviersiteta ŭ artykule na staronkach časopisa «Clinics and Practice» raskazali pra niezvyčajny vypadak, jaki adbyŭsia z 36‑hadovym miascovym žycharom.

Uletku 2020 hoda mužčyna zrabiŭ tatuiroŭku ŭ vyhladzie čyrvonaj kvietki na pravym pieradpleččy. Prykładna praz čatyry miesiacy paśla hetaha ŭ zonie malunka pačaŭsia mocny śvierb, skura stała łuščycca, a na ciele ŭźnik syp.

Spačatku źmieny zakranuli ruki i hrudzi, ale z časam zapaleńnie raspaŭsiudziłasia amal na ŭsio cieła, i ŭ mužčyny raźviłasia erytradermija — ciažki stan, pry jakim skura masava čyrvanieje i łuščycca.

U pačatku 2021 hoda situacyja jašče bolš pahoršyłasia: mužčyna pačaŭ imkliva hublać vałasy, pakul nie zastaŭsia bieź ich zusim — jak na hałavie, tak i na ŭsim ciele. Daktary nazyvajuć taki stan poŭnaj ałapiecyjaj (alopecia universalis). Praź niekatory čas źjaviŭsia jašče adzin niebiaśpiečny simptom — anhihidroz: mužčyna amal pierastaŭ pacieć, a praź niekalki miesiacaŭ pot źnik całkam.

Heta akazałasia nie prosta niazručnaściu, a surjoznaj pahrozaj zdaroŭju. Biez pota cieła nie moža narmalna astudžacca, tamu mužčyna bolš nie moh biaśpiečna zajmacca fizičnaj pracaj, sportam abo znachodzicca ŭ ciopłych pamiaškańniach. Navat zvyčajnaja śpioka stała dla jaho niebiaśpiečnaj — uźnik ryzyka ciepłavoha ŭdaru.

Na praciahu 2021 hoda mužčynu nieadnarazova špitalizavali ŭ roznyja adździaleńni balnic. Daktary praviali dziasiatki analizaŭ i abśledavańniaŭ, kab vyklučyć ankałahičnyja i inšyja redkija zachvorvańni. U vyniku jany pryjšli da vysnovy, što pryčynaj stała mocnaja imunnaja reakcyja, vierahodna źviazanaja z kampanientami čyrvonaj farby dla tatu.

Pavialičyć

Lačeńnie mocnymi supraćzapalenčymi i imunasupresiŭnymi preparatami davała tolki časovy efiekt. Jak tolki dozy źnižali abo leki admianiali, prablemy viartalisia. Asabliva pakazalnym było toje, što pry spynieńni lačeńnia novyja vysypańni znoŭ źjaŭlalisia mienavita ŭ zonie čyrvonaha pihmientu tatu.

U vyniku miedyki vyrašyli pajści na krajni krok — chirurhičnaje vydaleńnie tatuiroŭki. Na praciahu paŭtara hoda mužčynie zrabili siem apieracyj, padčas jakich pastupova vyrazali ŭsie ŭčastki skury z čyrvonaj farbaj. Paśla kožnaj apieracyi stan skury palapšaŭsia, ale vałasy nie adrastali, a pot nie źjaŭlaŭsia.

U 2022 hodzie źjaviłasia jašče adna prablema — vityliha, zachvorvańnie, pry jakim skura hublaje pihmient i pakryvajecca śvietłymi plamami. Z časam jany achapili kala treci pavierchni cieła.

Dalejšyja daśledavańni pakazali, što potavyja załozy ŭ mnohich učastkach cieła byli faktyčna źniščanyja i zamienienyja rubcovaj tkaninaj. Heta značyć, zdolnaść pacieć, chutčej za ŭsio, stračana nazaŭsiody.

Situacyju ŭskładniała toje, što ŭ mužčyny daŭno było aŭtaimunnaje zachvorvańnie — chvaroba ščytapadobnaj załozy. Daktary miarkujuć, što tatu-farba mahła stać svojeasablivym «puskavym miechanizmam», jaki spravakavaŭ zboi ŭ imunnaj sistemie arhanizma, užo schilnaha da takich reakcyj.

Paźniej mužčynu pryznačyli sučasnaje imunamadulujučaje lačeńnie. Jano dało plon: vałasy pačali znoŭ raści, a raspaŭsiud vityliha ŭdałosia spynić. Adnak zdolnaść pacieć tak i nie viarnułasia. Kab nie pierahravacca, mužčyna pastajanna astudžaje cieła vadoj z pulvieryzatara i vymušany ŭvažliva sačyć za fizičnymi nahruzkami.

Hety vypadak nazyvajuć vyklučna redkim: raniej nie fiksavałasia, kab paśla tatuiroŭki adnačasova ŭźnikali ahulnaje zapaleńnie skury, poŭnaja strata vałasoŭ, źniknieńnie pota i vityliha.

Daśledčyki adznačajuć: dla bolšaści ludziej tatuiroŭki nie stvarajuć surjoznych prablem, adnak ludziam z alerhijami, aŭtaimunnymi abo chraničnymi zachvorvańniami skury varta asabliva ŭvažliva padychodzić da rašeńnia zrabić tatuiroŭku i, pry mahčymaści, papiarednie prakansultavacca z dermatołaham. Navat pry sučasnych normach i siertyfikacyi skład farbaŭ nie zaŭsiody harantuje poŭnuju biaśpieku, a indyvidualnaja reakcyja arhanizma moža akazacca niepradkazalnaj.

• 0
• 0
• 0
• 2
• 4
• 2
• 0
• 0