«Haspadary ŭbačyli vynik i padniali arendu». Para źniała «babušatnik» i źmianiła jaho za $700
«Tym, u kaho niama ŭłasnych mietraŭ, davodzicca mirycca albo z čyimści nieprydatnym ramontam, albo z čyjojści praźmierna vysokaj staŭkaj arendnaj płaty. Minčanie Karyna i Alaksandr vyrašyli žyć pa svaich praviłach: źniali niedarahuju kvateru i adramantavali jaje nastolki estetyčna, što zrabili padobnaj na darahuju. Maładyja ludzi raspaviali Onlíner, kolki kaštavała pierarobka i čamu takoje rašeńnie źjaŭlajecca bolš vyhadnym, čym pierapłata za ŭžo hatovy kamfortny interjer.
«Chacieli žyć niadoraha i źbirać na svoj dom»
Karyna i Alaksandr — maładyja muž i žonka, u jakich paśla viasiella ŭźnikła pytańnie z žyllom.
— Naša historyja z pošukam kvatery pačałasia adrazu paśla viasiella, — raspaviadaje Karyna. — Nu, u pryncypie, jak i ŭ mnohich maładych siemjaŭ. Peŭny čas u nas była mahčymaść pažyć u kvatery ŭ Sašavych babuli ź dziadulem, tamu što jany z krasavika pa kastryčnik źjazdžajuć u viosku, pakidajučy kvateru pustoj. Atrymlivajecca, u nas było kala paŭhoda, kab spakojna i bieź śpiechu pašukać žyllo ŭ arendu, jakoje budzie nam idealna padychodzić.
Samym hałoŭnym kryteryjem pošuku byŭ rajon horada. Maładyja ludzi pryznajucca, što daloka nie ŭsie kutki Minska zdajucca im kamfortnymi dla žyćcia. Druhi niemałavažny momant — cana.
Muž i žonka dalnabačna płanavali tracić na arendu niašmat, kab paralelna adkładać hrošy na svaje asabistyja mietry — ciapier para pastupova buduje dom pad Minskam. Treci kryteryj — kamfort. Jak viadoma, moładź siońnia nie choča žyć u asiarodździ pažaŭciełych špaler i savieckaj mebli. Trend na estetyčnyja interjery zakranuŭ usich.
Jak časta byvaje, žyllo znajšłosia pa znajomstvie. Vyzvaliłasia adnuška płoščaj 44 «kvadraty» kala Łošyckaha parku.
U hetaj kvatery raniej žyli znajomyja i płacili vielmi pryvabnuju dla ciapierašnich realij canu — 600 rubloŭ.
— Pa videa varyjant nas naohuł nie ŭraziŭ. A kali pryjšli hladzieć hetuju adnušku na svaje vočy, jana akazałasia, miakka kažučy, «stomlenaj». Tam byŭ stary ramont: abarvanyja špalery, pałamanaja mebla, nijakaj atmaśfiery. Na niekatorych voknach nie było štor. Na kuchni zamiest lampy visieła prosta lampačka. Z mebli — staražytnyja savieckija šafy. Uražańnie ŭ nas skłałasia vielmi admoŭnaje.
Tym nie mienš muž i žonka zrazumieli: kvatery ŭ arendu za $200 na darozie nie valajucca. Sieli, zrabili chałodny raźlik i vyrašyli ź limonaŭ zrabić limanad.
— Kvatery, jakija my paśpieli pahladzieć raniej i jakija nam spadabalisia, kaštavali ad $300 i vyšej. Ale jany ŭsio roŭna nie byli idealnymi na 100%. U ich byli minusy: albo raźmiaščeńnie daloka ad centra, albo nievialikaja płošča. Vyrašyli, što vyhadniej uziać niedarahuju i vialikuju kvateru ŭ dobrym miescy i źmianić jaje. Zrabić jaje takoj, jak nam padabajecca: vybrać koler ścien, zručna raźmiaścić razietki. Stvaryć svaju ŭtulnaść.
Lepš vydatkavać hrošy adzin raz i potym doŭha žyć u kamforcie za nievialikuju sumu. Heta vyhadniej, čym kožny miesiac pierapłačvać za dobruju kvateru.
«Haspadary skazali: «Vam treba — vy i rabicie»
Ramont zaniaŭ paŭtara miesiaca. Za karotki termin maładaja para praviała kałasalnuju pracu. Pafarbavała stoli, pierakleiła špalery va ŭsich pakojach, kab pamiaškańni pierahukalisia pa kalarovaj hamie, całkam zamianiła meblu. Natchnieńnie Karyna šukała na Pinterest.
— Adna z samych zatratnych častak ramontu — heta łaminat, — adznačaje dziaŭčyna. — Jaho my pakłali ŭ pakoi, tamu što raniej tam byŭ nastolki stary linoleum, što niedzie navat utvarylisia dzirki.
— Pryjšłosia pavazicca i z elektrykaj. Heta była samaja pylnaja častka pracy, tamu što treba było rabić štreby dla elektrapravodki. U vannym pakoi naohuł nie było razietak — a jak sušyć vałasy ci banalna padklučyć prałku? Darečy, raniej jana była padklučana da razietki ŭ kalidory, a provad ciahnuŭsia praź dźviarny prajom. Taksama my zrabili dadatkovyja razietki ŭ kalidory dla roŭtara i pyłasosa. Jasnaja reč, dadali ich i na kuchni.
Hałoŭnym honaram Karyna ličyć kuchniu. Tam muž i žonka pravodziać bolš za ŭsio času — jaduć, adpačyvajuć, pracujuć. Krytyčna važnym było zrabić hetaje pamiaškańnie maksimalna ŭtulnym.
— Na kuchni pamianiali špalery, pafarbavali stol, pierafarbavali fasady. Novuju stalnicu cudam znajšli na sajcie pa pieraprodažy b/u rečaŭ. Jana abyšłasia ŭsiaho ŭ 100 rubloŭ. Pry hetym stalnica była novaj i idealna padyšła pa kolery. Praz paŭhadziny paśla publikacyi abjavy my ŭžo jechali jaje zabirać. Rakavina sa źmiašalnikam kaštavała rubloŭ 200. Dla skinali vykarystoŭvali reštki staroj plitki, jakaja lažała na dačy. Zaraz modna rabić adkrytuju palicu na kuchni — jaje my kupili. Ciapier stavim na joj usiakija pryhožyja štuki, ja amatarka estetyčnaha posudu.
Častka mebli taksama była kuplenaja z ruk. U kvatery źjavilisia estetyčnyja kanapy, tumbačka pad televizar, šafa. Karyna źviartaje ŭvahu na šafu aliŭkavaha koleru, jakaja staić u piarednim pakoi, i bardovuju vitrynu sa šklanymi dźviercami.
— Šafu my kupili za 150 rubloŭ. Ubačyli ŭ joj patencyjał, tamu što pieršapačatkova jana vyhladała niabłaha. Pierafarbavali, zrabili novyja ručki. Jana idealna stała ŭ nišu, što nas vielmi ŭzradavała.
— Vitrynu naohuł zabrali biaspłatna. Pastavili jaje na nožki, pierafarbavali ŭ bardovy — jana stała vyhladać jak novaja. Ciapier u joj staić pryhožy posud i butelki z ałkaholem. Atrymaŭsia taki impravizavany bar.
Usie interjernyja abnoŭki abyšlisia ŭ vyniku ŭ 2100 rubloŭ.
Jak na hetyja mietamarfozy adreahavali haspadary? Karyna ŭspaminaje: jany adrazu skazali, što ŭdzielničać u zadumie nie źbirajucca i ŭklučać zatraty ŭ rachunak arendy nie buduć.
Naadvarot, paśla ŭsich pieraŭtvareńniaŭ staŭka arendnaj płaty navat krychu padniałasia.
— Nam skazali: «Vam treba — vy i rabicie». Kali jany ŭbačyli vynik, to im, viadoma, spadabałasia, tamu što kvatera źmianiłasia. Ale niejkaj tam burnaj reakcyi nie było. Zaraz my płacim za arendu $300. Ale my naohuł ni razu nie paškadavali, što zrabili taki ramont. My ŭsio roŭna akazalisia ŭ plusie pa mnohich paramietrach, — pierakananaja Karyna. — Mnohija našy ahulnyja znajomyja, jakija raniej byvali ŭ staroj kvatery, prychodziać i dziviacca. Bo, pa sutnaści, atrymałasia zusim novaja prastora, naohuł nie padobnaja na papiaredniuju. Vysnova takaja: kamfort možna stvaryć navat za nievialikija hrošy.
23‑hadovy repier z Astraŭca zahinuŭ za Rasiju na vajnie. Pavajavaŭ jon, vidać, kala miesiaca17
23‑hadovy repier z Astraŭca zahinuŭ za Rasiju na vajnie. Pavajavaŭ jon, vidać, kala miesiaca
«Uśviedamlaju, što mahu stać pieršaj biełaruskaj, jakaja naviedaje ŭsie krainy śvietu». Padarožnica ź Minska razmaŭlaje na 8 movach i maryć pražyć 200 hadoŭ88
Kamientary