Skandał vakoł zabarony na vykanańnie duchoŭnaha himna «Malitva», jaki ŭčyniła ŭdava kampazitara Aleha Moŭčana Iryna Vidava paśla kancerta ŭ fiłarmonii, vykryŭ schavany bok bijahrafii tvorcy. Pakul udava zmahajecca z vykanaŭcami za aŭtarskija adličeńni, rodnaja dačka kampazitara zastałasia praktyčna ni z čym i vymušana vieści šmathadovuju vajnu za baćkavu spadčynu.
Nahadajem, dniami Iryna Vidava-Moŭčan zabaraniła śpievaku Piatru Jałfimavu i inšym artystam vykonvać chity svajho pamierłaha muža, u tym liku znakamituju «Malitvu», spasłaŭšysia na svajo vyklučnaje prava ŭłasnaści. Adnak, jak vyjaviłasia, Iryna Vidava — nie adzinaja žančyna, jakaja maje dačynieńnie da losu hetych piesień.
Vykraślenaje žyćcio
Kali adkryć aficyjnuju bijahrafiju Aleha Moŭčana na jaho piersanalnym sajcie abo staronku ŭ Vikipiedyi, jakaja stvorana jaho apošniaj žonkaj Irynaj Vidavaj (pra heta śviedčyć historyja pravak), to tam adsutničajuć źviestki pra papiarednija šluby i dziaciej.
Adnak mienavita na hady pieršaha šlubu sa śpiavačkaj i kampazitarkaj Taćcianaj Moŭčan, ciapierašniaj kiraŭnicaj teatra «Biełarusinki», prypali najbolš plonnyja hady pracy z «Pieśniarami», a taksama ŭ 1989 hodzie naradziłasia adzinaja dačka kampazitara — Viktoryja.
Taćciana Moŭčan u svaich uspaminach piša, što mnohija znakavyja pieśni, pravy na jakija ciapier prysvoiła ŭdava, byli napisany zadoŭha da źjaŭleńnia Vidavaj u žyćci tvorcy.
«U internecie jaje raschvalvajuć jak muzu, ź jakoj jon napisaŭ svaje šedeŭry. Asabliva śmiešna, kali jaje chvalać za «Marharytu» ci «Malitvu», napisanyja da 1993 hoda. My razyšlisia ŭ 1995-m. Prosta jon byŭ Svabodny», — pisała Taćciana ŭ sacsietkach.
«Staŭ hłamurnym i zabyŭ dačku»
Pa słovach pieršaj žonki, paśla razvodu i novaha šlubu Aleh Moŭčan addaliŭsia ad siamji. «Staŭ «hłamurnym», krutym», — z horyčču adznačała Taćciana. Adnosiny pierarvalisia na doŭhija hady. Byłaja žonka vinavacić u hetym Vidavu, maŭlaŭ, novaja spadarožnica «ŭsio žyćcio sprabavała adharadzić jaho ad znosin».
Lod kranuŭsia tolki ŭ apošnija dva hady žyćcia kampazitara, kali jon užo ciažka chvareŭ. Moŭčan sam patelefanavaŭ, pačaŭ razmaŭlać ź Viktoryjaj i navat paśpieŭ sustrecca ź joj i ŭnukam Śviatasłavam. Ale adnavić paŭnavartasnuju suviaź jany nie paśpieli.
Šlubnaja damova i skandał na pachavańni
Paśla śmierci kampazitara ŭ 2019 hodzie razharnułasia sapraŭdnaja drama z padziełam majomaści. Vyśvietliłasia, što jurydyčna dačce nie naležyć amal ničoha.
«U žniŭni 2017 hoda Vika ŭpieršyniu paznajomiła dzieda z unukam. Iračka piaščotna trymaje Viku za palčyk. A voś u vieraśni Iračka pierapisvaje na siabie ŭsiu majomaść šlubnaj damovaj. I dla padstrachoŭki jašče i zaviaščańnie ŭsio sabie lubimaj», — raskazvała ŭ sacsietkach Taćciana Moŭčan.
Situacyja dajšła da suda, ale, pa słovach pieršaj siamji, vyjhrać u ich pakul nie atrymlivajecca:
«Dahetul zmahajemsia z apošniaj žonkaj nakont spadčyny. Ładna, zabrała jana ŭsio, nu choć pa aŭtarskich pravach krychu prabivajusia. Viedaŭ by Aleh, što ŭ dački niama navat hetaj finansavaj paduški».
Asabliva cyničnym, pa słovach Taćciany, byŭ epizod na raźvitańni ŭ fiłarmonii, kali Vidava nibyta kinuła dačce, jakaja płakała la truny: «Što ty tut robiš — jon tabie nichto».
«Heta nie luboŭ i nie pamiać»
Varta adznačyć, što Viktoryja Moŭčan pajšła pa śladach baćkoŭ. Jana prafiesijnaja śpiavačka, piedahoh pa vakale, stypiendyjatka śpiecfondu prezidenta pa padtrymcy talenavitaj moładzi. I jaje pazicyja adnosna spadčyny baćki kardynalna adroźnivajecca ad pazicyi ŭdavy.
Kali Iryna Vidava zabaraniaje vykonvać pieśni Aleha Moŭčana i błakuje videa ŭ YouTube, dačka i pieršaja žonka vystupajuć za toje, kab muzyka hučała.
«Ładzić pampieznyja pradstaŭleńni ŭ pamiać pra Aleha, a potym zabaraniać vykonvać jaho pieśni i prybirać ich ź internetu — u hetym zaklučajecca luboŭ i pamiać?» — zadajecca pytańniem Taćciana Moŭčan.
Jana ŭpeŭnienaja, što spraviadlivaść budzie adnoŭlena: «Maja dačka dabjecca, kab nichto nie zabaraniaŭ vykonvać jaho pieśni. Kab na jaho tvorčaść nichto nie viešaŭ zabaronaŭ i kab jaho imia nie syšło ŭ zabyćcio».
«Naša Niva» — bastyjon biełaruščyny
PADTRYMAĆPaśla patryjatyčnaha paryvu biełarusaŭ u fiłarmonii ŭdava kampazitara Moŭčana zabaraniła ŭsim vykonvać «Malitvu» Janki Kupały
U centry Minska adkryjecca muzyčnaja łava, na jakoj možna budzie pasłuchać miełodyi Aleha Moŭčana
Sud za «Malitvu»: Špakoŭskaja zapłacić Moŭčanu 9 młn kampiensacyi
Sud za «Malitvu»: miram nie razyducca
Kampazitar Aleh Moŭčan padaŭ u sud na vakalistku Naka
Druhi vajskoviec, jaki zahinuŭ pry avaryi MAZa pad Asipovičami — 21‑hadovy tenisist ź Viciebska1
Kamientary