Sanatoryi chočuć, kab biełarusy płacili stolki ž, kolki rasijanie. Nakolki moža padaražeć adpačynak?

Biełaruskija sanatoryi rychtujucca zraŭnavać košty na adpačynak dla biełarusaŭ i rasijan. Tłumačać heta adzinaj cenavaj palitykaj dla ŭsich hramadzian tak zvanaj Sajuznaj dziaržavy. Vyhladaje, što biełarusam daviadziecca płacić pa rasijskich, a značyć bolš vysokich taryfach.

Košt puciovak kožny sanatoryj vyznačaje samastojna. U tych sanatoryjach, jakija atrymlivajuć častkovaje dziaržaŭnaje finansavańnie abo pracujuć z prafsajuznymi prahramami, dla hramadzian Biełarusi dziejničajuć źnižanyja taryfy abo lhoty. U inšych ža ŭsie klijenty, niezaležna ad krainy pachodžańnia, adpačyvajuć na adnolkavych umovach i pa adnolkavym košcie.

U bolšaści papularnych sanatoryjaŭ roźnica pamiž cenami dla biełarusaŭ i rasijan usio jašče zachoŭvajecca.

Popyt na biełaruskija sanatoryi z boku rasijan u apošnija hady prykmietna vyras. Ekspart sanatornych pasłuh (heta značyć, prybytak ad zamiežnikaŭ) za 2025 hod pavialičyŭsia bolš jak na 40%.

Kolki ciapier płaciać za pucioŭki biełarusy i rasijanie? Projdziemsia pa kankretnych prykładach. Zaŭvažym, što ceny mocna zaležać ad siezonu i pakieta pasłuh. My razhladajem ceny na siońniašni dzień, letam jany zvyčajna vyšejšyja. 

Sanatoryj «Junactva» (Minskaja vobłaść)

Ceny dla biełarusaŭ tut kala 328—485 BYN za sutki na čałavieka ŭ zaležnaści ad numara i pakieta. Siaredniaje: 406,5 BYN.

Ceny dla turystaŭ z RF — kala 393‑543 BYN za sutki na čałavieka. Siaredniaje: 468 BYN.

Roźnica takim čynam — 15,1%.

«Prydniaproŭski» (Homielskaja vobłaść)

Biełarusy za sutki zapłaciać tut 120‑210 BYN na čałavieka (siaredniaje — 165 BYN), rasijanie — 128-224,5 BYN (siaredniaje — 176 BYN).

Roźnica: 6,7%.

«Alfa Radon» (Hrodzienskaja vobłaść)

Dla biełarusaŭ u padobnych sanatoryjach ceny składajuć 435‑881 BYN za sutki. Siaredniaje: 658 BYN. 

Dla rasijan — 465‑942 BYN. Siaredniaje: 703,5 BYN.

Roźnica składaje 6,9%.

«Biełaja Ruś» (Narač)

U prajsach bačym 140‑220 BYN za sutki dla biełarusaŭ (siaredniaje — 180 BYN) i 168‑248 BYN dla rasijan (siaredniaje — 208 BYN).

Roźnica: 15,6%.

«Pryaziorny» (Minskaja vobłaść)

Dla biełarusaŭ taryfy kala 269‑527 BYN za sutki (siaredniaje — 398 BYN), dla turystaŭ z RF kala 300‑600 BYN (siaredniaje — 450 BYN). 

Roźnica — 13,1%.

Jak bačym, u asnoŭnym rasijanie płaciać prykładna na 7-15% bolš za sutki, čym biełarusy. Poŭnaje zraŭnavańnie taryfaŭ moža pavialičyć košt adpačynku dla biełarusaŭ prykładna na takuju sumu.

• 0
• 3
• 0
• 4
• 0
• 0
• 3
• 0