Kolki razoŭ na dzień my bździm? Vučonyja zmahli padličyć

Doŭhi čas tema hazaŭtvareńnia (fłatulencyi) zastavałasia maładaśledavanaj praz składanaść zboru danych. Raniej miedyki abapiralisia na nazirańni samich pacyjentaŭ, ale hety mietad nienadziejny: ludzi časta zabyvajuć fiksavać takija momanty abo prosta nie zaŭvažajuć ich, asabliva padčas snu. Alternatyvaj byli karotkaterminovyja łabaratornyja daśledavańni ź invaziŭnymi pracedurami — naprykład, vykarystańniem rektalnych trubak dla zboru hazaŭ. Tamu abjektyŭnaje vymiareńnie doŭhi čas ličyłasia amal niemahčymym.

Kab vyrašyć hetuju prablemu, kamanda navukoŭcaŭ z Merylendskaha ŭniviersiteta ŭ Bałtymory (ZŠA) raspracavała kampaktnuju pryładu pamieram z manietu. Datčyk z elektrachimičnym siensaram macujecca da zvyčajnaj bializny i na praciahu dnia fiksuje kancentracyju vadarodu — hazu, jaki vypracoŭvajecca vyklučna mikrobami ŭ našym kišečniku. 

Pavialičyć

U piłotnym vyprabavańni, piša Daily Mail, uziali ŭdzieł 19 darosłych dobraachvotnikaŭ, jakija nasili pryładu padčas niaspańnia na praciahu tydnia. Bolš za 80% udzielnikaŭ paćvierdzili zručnaść hadžeta i adznačyli, što byli b hatovyja vykarystoŭvać jaho pa rekamiendacyi doktara.

Kab pravieryć dakładnaść pryłady, udzielnikam prapanavali źjeści cukierki ź inulinam — prebijatyčnaj klatčatkaj, jakaja stymuluje pracu kišečnych bakteryj. Pryłada zafiksavała pavyšeńnie vypracoŭki vadarodu z dakładnaściu 94,7%.

Niečakanyja vyniki

Vyniki vymiareńniaŭ akazalisia niečakanyja: datčyki fiksavali vydzialeńnie hazaŭ u siarednim 32 razy za 12 hadzin. Heta bolš čym udvaja pieravyšaje pakazčyk 14 razoŭ, jaki miedyki doŭhi čas vykarystoŭvali ŭ jakaści ahulnapryniataj normy.

Pry hetym daśledčyki zaŭvažyli vielmi vialikuju roźnicu pamiž ludźmi. Vyłučalisia dźvie cikavyja hrupy.

Na adnym polusie — tak zvanyja «zvyšvypracoŭniki vadarodu» (Hydrogen Hyperproducers). Ich arhanizm vypracoŭvaje ad 40 da 50 porcyj hazaŭ štodnia.

Na druhim — «dzen-stravavalniki» (Zen Digesters). Jany mohuć spažyvać šmat klatčatki — ad 25 da 38 hramaŭ u dzień — i pry hetym vypuskać hazy ŭsiaho čatyry razy za 12 hadzin. Ich stravavalnaja sistema zastajecca amal «cichaj».

Pavialičyć

Navošta heta ŭsio?

Choć tema moža zdavacca kamičnaj, daśledčyki padkreślivajuć jaje praktyčnaje značeńnie. Dla daktaroŭ vielmi važna mieć tak zvany «bazavy pakazčyk». Hetaksama jak isnujuć normy pulsu, cisku abo cukru ŭ kryvi, miedycynie patrebnaja dakładnaja ličba, kab razumieć, kali hazaŭtvareńnie ŭ pacyjenta sapraŭdy praźmiernaje i patrabuje lekavańnia, a kali jano źjaŭlajecca indyvidualnaj normaj.

Zaraz navukoŭcy pačynajuć maštabny prajekt pad nazvaj «Atłas fłatulencyi čałavieka». Jany płanujuć pravieści ekśpierymient ź vialikaj kolkaściu dobraachvotnikaŭ i sabrać danyja ab suviazi pamiž hazaŭtvareńniem i kankretnymi vidami mikrobaŭ u kišečniku.

Heta dapamoža navucy zrazumieć nie tolki toje, jakija mikroby žyvuć u našym stravavalnym trakcie, ale i jak mienavita jany reahujuć na roznyja pradukty, prabijotyki i leki. U pierśpiektyvie heta dazvolić stvarać piersanalizavanyja dyjety dla ludziej z adčuvalnym straŭnikam.

• 13
• 0
• 6
• 2
• 0
• 0
• 0
• 0