Nie tolki Hrodna. Stała viadoma, u jakich jašče haradach Biełarusi źjavicca taksi Bro Car
Hrodna staŭ pieršym biełaruskim horadam, u jakim niadaŭna zapuścili novy ahrehatar taksi Bro Car. Jon pačaŭ pracavać jašče ŭ studzieni. Vydańnie Office Life vyśvietliła, ci źjavicca servis u inšych haradach.
Jak raskazali Office Life u kampanii «Brokar Bieł», jakaja adkazvaje za servis taksi ŭ Biełarusi, zaraz u Hrodnie ŭžo padklučana kala 200 mašyn. Pakul jość nievialikaja składanaść u intehracyi z prahramnymi kasami, ale raźličvajuć, što na praciahu troch-čatyroch tydniaŭ adładziać praces. Heta dazvolić bolšaj kolkaści kiroŭcaŭ pracavać z najaŭnymi hrašyma. Pakul takaja mahčymaść jość tolki ŭ tych, chto jeździć z taksomietram.
Nastupnym horadam dla zapusku Bro Car u našaj krainie stanie Ščučyn.
Hety horad znachodzicca ŭsiaho za 70 kiłamietraŭ ad Hrodna, i tam prajavili vialikaje žadańnie padklučycca. U kampanii kažuć, što z zadavalnieńniem adhuknulisia i raźličvajuć užo ź pieršaha tydnia sakavika akazvać pasłuhi pasažyram u Ščučynie.
Jak udakładniła Kaciaryna Stankievič, staršynia Asacyjacyi prafiesijnych pieravozčykaŭ pasažyraŭ, nastupnym z abłasnych haradoŭ u płanach Bro Car staić Viciebsk, dzie taksama vielmi aktyŭnyja pieravozčyki.
Pavodle jaje słoŭ, u hetym horadzie ź pieravozčykami vydatnaja zvarotnaja suviaź i «jość razumieńnie pracesaŭ, jakija nieabchodna naładzić, kab zabiaśpiečyć biaśpiečnuju pieravozku, a taksama zachoŭvać intaresy jak pieravozčykaŭ, tak i kiroŭcaŭ». Zapuścić tam servis raźličvajuć u kancy sakavika abo pačatku krasavika.
Płany pa inšych haradach u kampanii pakul nie raskryvajuć, ale paćviardžajuć, što płanujuć pašyracca.
Praŭda, Minska ŭ śpisie niama. Pradstaŭniki Bro Car kažuć, što pravodzili schody ź pieravozčykami — staličnyja prajavili najmienšuju zacikaŭlenaść. Pry hetym jość zapyt ad haradoŭ Minskaj vobłaści.
Razhladajuć i mahčymaść pieradzamovy ŭ aeraport, dla hetaha pasprabujuć sfarmiravać taryf i pahladzieć na vodhuk pieravozčykaŭ.
Uładalnik Bro Car — kampanija «Eviery Kar» z Kazachstana. Servis pracuje jašče i ŭ Azierbajdžanie. Hałoŭnaje adroźnieńnie novaj słužby taksi: u joj nie vykarystoŭvajecca dynamičnaje cenaŭtvareńnie. Ceny — fiksavanyja. U čas pik jany mohuć pavyšacca, ale ŭsio adno buduć fiksavanyja.
Kamientary