U Łatvii prybiaruć z darožnych znakaŭ nazvy biełaruskich haradoŭ. Nie škada i 120 tysiač jeŭra
U Łatvii płanujuć prybrać z darožnych znakaŭ nazvy haradoŭ i nasielenych punktaŭ Rasii i Biełarusi. Pra heta paviedamlaje Delfi.lv.
Na dziaržaŭnych darohach krainy naličvajecca bolš za 200 takich znakaŭ roznaha pamieru. Ich zamiena abo karektavańnie moža kaštavać prykładna 120 tysiač jeŭra. Takija pakazalniki jość i na municypalnych darohach — u hetym vypadku vydatki na zamienu buduć pakryvacca ź biudžetaŭ samakiravańnia.
U Ministerstvie suviazi tłumačać nieabchodnaść hetych źmienaŭ usio bolšym zapytam takich krokaŭ z boku palitykaŭ i hramadstva ŭ suviazi z raźviazanaj Rasijaj poŭnamaštabnaj vajnoj suprać Ukrainy. Raźliki koštu rabot pakul papiarednija, bo ciapier idzie padrychtoŭčy etap. Realna jany zmohuć pačacca tolki z nadychodam budaŭničaha siezona i pry spryjalnych umovach nadvorja.
U viedamstvie adznačajuć, što častkovaje zaklejvańnie abo źmianieńnie znakaŭ moža stvarać peŭnyja ryzyki. Naprykład, kali častka staroha znaka budzie zakrytaja novym materyjałam, jana moža vyhladać jarčej i krychu adciahvać uvahu. Adnak padkreślivajecca, što havorka nie idzie pra znaki pryjarytetu ci inšyja krytyčna važnyja pakazalniki, tamu istotnaha ŭpłyvu na biaśpieku darožnaha ruchu heta nie pavinna mieć.
Razam z tym u Departamiencie analityki biaśpieki darožnaha ruchu ličać, što zaklejvańnie častki znaka nie źjaŭlajecca dobraj praktykaj arhanizacyi ruchu.
Pavodle płanaŭ Ministerstva suviazi, usie raboty pa zamienie abo častkovym karektavańni darožnych znakaŭ pavinny być zavieršanyja nie paźniej za 30 vieraśnia 2026 hoda.
Valfovič prakamientavaŭ zajavy SVR i paprasiŭ Jeŭropu nie dyktavać Biełarusi, jak žyć
Daŭhaŭpiłskaja balnica ŭ Łatvii zvolniła 49 supracoŭnikaŭ z hramadzianstvam Biełarusi i Rasii
Łatvija zakryvaje rehularnyja aŭtobusnyja rejsy ŭ Biełaruś
U Łatvii padčas vystupleńnia biełaruskich spartsmienaŭ na Alimpijadzie buduć uklučać rekłamu
Kamientary
[Zredahavana]