U Łatvii vieterynarnaja słužba zaklikała nie kuplać chatnich žyvioł u Biełarusi. I heta nie prosta prychamać
Charčovaja i vieterynarnaja słužba Łatvii zaklikała žycharoŭ krainy nie kuplać sabak, katoŭ i chatnich tcharoŭ u Biełarusi i Rasii, bo heta moža być niebiaśpiečna.
Zaniepakojenaść łatvijskich vieterynaraŭ vyklikała toje, što niadaŭna ŭ Hiermanii ŭ sabaki, uviezienaha ŭ Jeŭrapiejski Sajuz z Rasii praz łatvijski pamiežny punkt, paćvierdzili šalenstva. Pry hetym u žyvioliny byli ŭsie nieabchodnyja dakumienty, u tym liku vyniki analizu na ŭzrovień antyciełaŭ suprać šalenstva, jakija pavinny paćviardžać efiektyŭnaść vakcynacyi.
Raniej łatvijskaja słužba ŭžo źviartałasia ŭ Jeŭrapiejskuju kamisiju z prośbaj uvieści bolš strohija abmiežavańni na ŭvoz žyvioł z Rasii i Biełarusi, bo kantrolnyja orhany adrazu niekalkich krain vyjavili vypadki padroblenych siertyfikataŭ ab vakcynacyi. U vyniku z vosieni 2024 hoda da dakumientaŭ abaviazkova treba prykładać test na antycieły, jaki pavinien harantavać, što žyviolina sapraŭdy vakcynavanaja i nie ŭjaŭlaje niebiaśpieki.
Tym nie mienš, u hetym vypadku sabaka byŭ zaviezieny ŭ Hiermaniju ŭ listapadzie 2025 hoda, a prykmiety chvaroby źjavilisia i dyjahnaz byŭ pastaŭleny tolki ŭ lutym 2026 hoda.
Pry praviercy vyśvietliłasia, što nivodnaja z žyvioł, jakija znachodzilisia ŭ toj ža samaj partyi i nakiroŭvalisia ŭ Hiermaniju, nie zastałasia ŭ Łatvii. Taksama byli ŭstanoŭlenyja asoby, jakija kantaktavali z hetymi žyviołami, u tym liku supracoŭniki pamiežnaha kantrolu. Pra situacyju prainfarmavany i Centr prafiłaktyki i kantrolu zachvorvańniaŭ.
Apošni vypadak šalenstva ŭ dzikich žyvioł u Łatvii byŭ zafiksavany ŭ 2010 hodzie, a ŭ chatnich — u 2012 hodzie. Takim čynam, kraina maje status terytoryi, svabodnaj ad šalenstva, i nie choča jaho stracić.
U Łatvii prybiaruć z darožnych znakaŭ nazvy biełaruskich haradoŭ. Nie škada i 120 tysiač jeŭra
Lidary Łatvii i Estonii zaklikali rychtavacca da pramych pieramoŭ z Rasijaj
Daŭhaŭpiłskaja balnica ŭ Łatvii zvolniła 49 supracoŭnikaŭ z hramadzianstvam Biełarusi i Rasii
Łatvija zakryvaje rehularnyja aŭtobusnyja rejsy ŭ Biełaruś
Kamientary