Rasijski hienierał chvaliŭsia žoncy, jak katavaŭ i zabivaŭ ukrainskich pałonnych — adrazaŭ vušy i zachoŭvaŭ u siabie

Ukrainski i ruskamoŭny rasśledavalnickija prajekty «Radyjo Svaboda»: «Schiemy» i «Sistema» apublikavali materyjał ab katavańniach nad pałonnymi USU, jakimi vychvalaŭsia 49‑hadovy hienierał-major Raman Demurčyjeŭ. Ciapier jon namieśnik kamandzira 20‑j ahulnavajskovaj armii.

Žurnalisty atrymali dostup da asabistaj pierapiski Demurčyjeva dziakujučy krynicy va ŭkrainskim vojsku. U jakim miesiendžary pierapisvaŭsia Demurčyjeŭ, nie ŭdakładniajecca. 

Aściarožna, apublikavanaja nižej infarmacyja moža šakavać vas

Vyvučyŭšy atrymany archiŭ za 2022‑2024 hady, rasśledavalniki vyśvietlili, što Demurčyjeŭ raskazvaŭ kaleham i svajakam pra katavańni i zabojstvy ŭkrainskich vajennapałonnych.

Tak, 18 kastryčnika 2022 hoda Demurčyjeŭ paviedamiŭ, što «ŭziaŭ apornik», jaki šturmavaŭ try dni, i ŭ vyniku zachapiŭ u pałon čaćviarych ukraincaŭ. Paśla hetaha jon dasłaŭ svajoj žoncy fota adrezanych i sčarniełych čałaviečych vušej, padviešanych na mietaličnuju trubu. 

Taksama žurnalisty ŭstanavili, što Demurčyjeŭ abmiarkoŭvaŭ z surazmoŭcam, jakoha padpisaŭ jak «Hrek» (miarkujučy pa kantekście, heta supracoŭnik vajskovaj kontrvyviedki na imia Raman), što ŭ hienierała jość novy «padarunak» — ukrainski vajennapałonny. 

— U mianie pałonny jość adzin <…> mahu tabie jaho padaryć. Vuń siadzić adzin tam, u jamie <…> Što mnie ź im rabić: utylizavać ci tabie addać? — pytajecca hienierał kontrraźviedčyka ŭ kastryčniku 2023 hoda.

«Hrek» zhadžajecca zabrać pałonnaha, ale Demurčyjeŭ udakładniaje:

— U nas času nie było prosta katavać jaho, tamu infarmacyja paluboŭnaja… Ale ŭ vas času dafiha, vy možacie padklučyć instrumienty roznyja, jakija prymušajuć čałavieka kazać praŭdu.

Žurnalisty vyśvietlili asobu hetaha vajennapałonnaha — jon dobraachvotnik z Zaparožža, jakomu na momant zachopu było 40 hadoŭ. Vajskoviec USU pravioŭ u pałonie hod i dziesiać miesiacaŭ. Jaho ŭtrymlivali ŭ SIZA na Ałtai. Uletku 2025 hoda mužčynu abmianiali i jon viarnuŭsia dadomu va Ukrainu.

Taksama «Hrek» sam adpraŭlaŭ pałonnych Demurčyjevu z prośbaj pazbavicca ad ich, pryčym jak-niebudź tak, kab nichto nie daviedaŭsia. Tak jon pisaŭ hienierału ŭ žniŭni 2023 hoda:

— Sprava jość. Sakretnaja, — paviedamlaje «Hrek». — Jość niekalki pid***saŭ (zatrymanych z dokazami złačynstva na schronach). Realnyja čalcy rezidentury… Ale pad praces ich addavać nielha. Jość prapanova addać tabie na paru dzion papracavać kapalnikami akop, tranšej… Nu i tam ich pakinuć. Nazaŭždy.

U śniežni 2024 hoda ŭ pierapiscy Demurčyjeva źjaŭlajecca videa z drona ź ciepłavizaram, na jakim rasiejskija vajskoŭcy, byłyja źniavolenyja, zasiakli da śmierci troch ukraincaŭ sapiornymi łapatkami ŭžo paśla taho, jak apošnija padniali ruki i zdalisia ŭ pałon.

Voś taki dyjałoh jość u adnym z hałasavych paviedamleńniaŭ:

— Nu, ja tabie dakładvaŭ. Dva «zeki» zajšli na apornik, na pazicyju — try chachły. Uziali ŭ pałon i zasiekli ich łapatkami, b*, źviery, na*. Vuń pahladzi, pakarańnie sapiornymi łapatkami, b*, — kaža Demurčyjeŭ.

«Schiemy» vyznačyli padraździaleńnie, u jakim słužyli hetyja zeki — «Čornaja mamba» 252‑ha motastrałkovaha pałka ŭ składzie 3‑j dyvizii 20‑j ahulnavajskovaj armii RF. Taksama byli vyznačany i asoby zabitych pałonnych USU, adnak jany nie pryvodziacca ŭ materyjale. 

Bolš za toje, Demurčyjeŭ pakazaŭ videa z zabojstvam pałonnych svajmu niepasrednamu načalniku-kamandujučamu 20‑j armijaj hienierału Alehu Miciajevu, jaki zajaviŭ: 

— Zeki, jakija ŭziali punkt, pasiekli łapatkami, daj boh vyžyvuć, da ŭznaharodžańnia padać abaviazkova. Pacichu adciskacca, małajčyna. <…> Małajcy, dušycie, dušycie hadaŭ, b*.

Pavialičyć

U 2023 hodzie Uładzimir Pucin prysvoiŭ Demurčyjevu zvańnie hienierał-majora. Taksama hienierał atrymlivaŭ premiju «My pobač. Dobraja sprava» ad hubiernatara Maskoŭskaj vobłaści Andreja Varabjova i orden ad kiraŭnika Čačni Ramzana Kadyrava. Niahledziačy na ŭznaharodu ad Kadyrava, Demurčyjeŭ nazyvaŭ čačenskich bajcoŭ u pierapiskach «sykunami i pijarščykami», kažučy, što «vyniki pakazvajuć tolki słavianie». 

Žurnalisty datelefanavalisia da Demurčyjeva, ale paśla taho, jak jamu zadali pytańnie, jon pakłaŭ słuchaŭku. U Minabarony RF na zapyt śledčych nie adkazali.

• 0
• 1
• 0
• 9
• 6
• 3
• 46
• 0