U Jeŭraparłamiencie na Dzień Voli vystupili ŭ padtrymku biełarusaŭ
Staršynia Jeŭraparłamienta Rabierta Mietsoła napiaredadni pasiadžeńnia 25 sakavika vystupiła z zajavaj u padtrymku biełarusaŭ. Taksama sumiesnuju zajavu z hetaj nahody vydała hrupa deputataŭ.
Rabierta Mietsoła ŭ svajoj zajavie adznačyła, što hetaja data maje asablivaje značeńnie dla Biełarusi jak simvał baraćby za svabodu i demakratyju.
«Siońnia my adznačajem Mižnarodny dzień salidarnaści ź Biełaruśsiu, viadomy jak Dzień Voli. U hety dzień u 1918 hodzie Biełaruś abviaściła niezaležnaść. Dla miljonaŭ biełarusaŭ hetaja hadavina stała mahutnym simvałam pratestu suprać pryhniatalnaj dyktatury. I my karystajemsia hetaj mahčymaściu, kab znoŭ paćvierdzić našu padtrymku ŭsim biełarusam, jakija zmahajucca za svabodnuju i demakratyčnuju krainu».
Aŭtary zajavy ad deputataŭ padkreślili, što Dzień Voli — heta nie tolki histaryčnaja data, ale i simvał imknieńnia biełarusaŭ da svabody, hodnaści i samavyznačeńnia. Siońnia jon nabyvaje asablivaje značeńnie jak znak supracivu va ŭmovach praciahłych represij paśla falsifikavanych vybaraŭ 2020 hoda.
U zajavie adznačajecca, što, niahledziačy na vyzvaleńnie niekatorych palitviaźniaŭ, kala 900 čałaviek pa-raniejšamu zastajucca za kratami, a represii praciahvajucca. Asablivuju zaniepakojenaść vyklikaje cisk na hramadzianskuju supolnaść i biełaruskuju kulturu.
Jeŭradeputaty padkreślivajuć, što suvierenitet Biełarusi znachodzicca pad pahrozaj na fonie ŭzrastajučaj zaležnaści ad Rasii, i zaklikajuć da jaho abarony. Jany paćviardžajuć padtrymku demakratyčnym siłam Biełarusi i prava biełarusaŭ samastojna vyznačać svaju budučyniu.
Aŭtary zajavy vykazali salidarnaść ź biełarusami pa ŭsim śviecie i padkreślili, što Jeŭropa praciahnie padtrymlivać šlach Biełarusi da svabody, demakratyi i viartańnia ŭ jeŭrapiejskuju siamju.
Zajavu padpisali: staršynia Kamiteta pa zamiežnych spravach (AFET) Devid Makalister, staršynia Padkamiteta pa pravach čałavieka Munir Satury, staršynia Delehacyi pa suviaziach ź Biełaruśsiu Małhažata Hasieŭskaja, a taksama ad imia Biuro delehacyi — pieršy vice-staršynia Tomaš Tobe i druhi vice-staršynia Michał Kaboska, a taksama pastajanny dakładčyk AFET pa Biełarusi Chielmut Brandšteter.
-
Uładalnik kramy Kropka ŭ Vilni raskazvaje, jak raźvivajecca jaho biznes i ci znajšli tych, chto raźbiŭ im vokny
-
Rasijanka pierajechała ŭ viosku pad Oršaj i ździŭlena biełaruskim standartam. «Tut pastajanna jość śviatło»
-
Volha Takarčuk padzialiłasia dramatyčnymi padrabiaznaściami svaich uciokaŭ ź Biełarusi
Ciapier čytajuć
Dziadok raskazaŭ, jak pavodziŭ by siabie ŭ siońniašniaj Biełarusi i što budzie dalej5
Kamientary