«Raspradać Radzimu» akazałasia nie tak prosta

Šyroki žest Łukašenki Rasija jaŭna nie acaniła. Dakładniej, piśmienna zrabiła vyhlad, što jaje heta mała cikavić. Zajava pra hatoŭnaść pradać kantrolnyja pakiety akcyj «Biełtranshaza» dy NPZ sparadziła nie ažyjatažny popyt, a kplivyja repliki.

Pieršy vice-premjer Siečyn zaznačyŭ, što Rasija i tak pierapłaciła, advaliŭšy až dva z pałovaj miljardy dołaraŭ za 50% biełaruskaj truby. A pradstaŭnik «Hazproma» Kupryjanaŭ zajaviŭ, što pieramaŭlacca ź biełaruskim bokam pra aktyvy možna budzie chiba tady, kali toj całkam raspłacicca za spažyvany haz (bo inačaj da kanca hoda zapazyčanaść, jakaja sa studzienia pa krasavik skłała 192 miljony dołaraŭ, moža vyraści da 500–600 miljonaŭ). Atrymałasia ździekliva, na ŭzroŭni papiaredžańnia z ŽESa niejkamu daŭžniku-ałkaholiku.

Kaniečnie,

Maskva hulaje. Nie takaja ŭžo jana raŭnadušnaja da biełaruskaj truby dy naftanki. Prosta čas pracuje na Rasiju.

U minułuju niadzielu «Hazprom» nakiravaŭ jachtaj u Hiermaniju pa maršrucie «Paŭnočnaj płyni» simvaličny bałon hazu. Naleta pradukt buduć pampavać užo pa samoj trubie cieraz Bałtyku.

I jašče adna prykraja dla aficyjnaha Minska navina. Mała taho što rasijcy kładuć BTS-2, kab pampavać u abychod Biełarusi jašče i naftu, dyk jany vyrašyli pabudavać svoj NPZ va Uść-Łuzie. Heta padsiače kaciroŭki našych zavodaŭ u Navapołacku dy Mazyry.

Što da cisku na Biełaruś, dyk Maskvie nadaje impetu i praryŭ (tak, va ŭsiakim razie, tam ličać) na ukrainskim froncie.

Uvohule ž, zbyvajecca toje, pra što daŭno kazali ekśpierty:

Rasija biare ŭ abcuhi, asłablaje tranzitnyja kozyry Łukašenki.

Jamu ž dazarezu patrebny hrošy pad vybary. A sa studzienia pavodle kantrakta śvieciać užo jeŭrapiejskija ceny na haz: pierachodny pieryjad, pra jaki damovilisia pad boj kurantaŭ pry kancy 2006 hoda, nieŭprykmiet syšoŭ.

Tym časam

truba pakrysie ržavieje, pieratvarajecca ŭ mietałałom. «Familnaje srebra» abiasceńvajecca. A hałoŭnaje — zmarnavany toj załaty čas naftavaha afšoru, kali možna było b adnosna biazbolna refarmavać ekanomiku. Ciapier budzie baluča.

Našy kamientatary pryzvyčailisia vydavać na aŭtamacie, što rasijskija aliharchi puskajuć ślinki, točać zuby na łasyja kavałki biełaruskaj ułasnaści. Ale nieŭprykmiet kanjunktura źmianiłasia. Ciapier Maskva usio bolej upeŭniena nakidaje ŭmovy.

Tamu ŭ adkaz na nibyta šyroki (choć i tut svaja hulnia) žest Łukašenki rasijcy vybrali ledziany ton. Razam z tym ananim z atačeńnia Pucina nie strymaŭ radaści, kamientujučy situacyju «Kommiersantu»: «Łukašenku nadyšoŭ čas žyć pa srodkach. Nie moža kraina 15 hadoŭ žyć nie pa srodkach. Praz paŭhoda ŭ jaho ŭsio budzie zusim kiepska. Chaj vozić naftu ź Vieniesueły».

Maskva piśmienna trymaje paŭzu ŭ torhu z raźlikam, što nieŭzabavie možna budzie ŭziać klijenta hołymi rukami.

• 0
• 0
• 0
• 0
• 0
• 0
• 0
• 0