Biełarusy stali čaściej žanicca, ale razvodziacca pa-raniejšamu šmat
U 2025 hodzie ŭ Biełarusi zarehistravali bolš za 52 tysiačy šlubaŭ i prykładna 34,8 tysiačy razvodaŭ. Heta aznačaje, što na 100 šlubaŭ prypadaje mienš za 67 razvodaŭ, i hety pakazčyk nižejšy, čym u papiarednim hodzie, paviedamlaje «Biełstat».
Dla paraŭnańnia: u 2024 hodzie było kala 46,2 tysiačy šlubaŭ i 34,9 tysiačy razvodaŭ, i tady na 100 šlubaŭ prypadała prykładna 75 razvodaŭ. Tamu možna skazać, što ŭ 2025 hodzie situacyja krychu palepšyłasia.
Taksama adznačajecca niekalki tendencyj. Siaredni ŭzrost mužčyn, jakija ŭpieršyniu ŭstupajuć u šlub, praciahvaje raści i ciapier składaje kala 29 hadoŭ. U žančyn jon zastajecca stabilnym — prykładna 26,7 hoda.
Bolš stała šlubaŭ u ludziej starejšaha ŭzrostu: kolkaść žanichoŭ i niaviest 65+ pavialičyłasia ŭ paraŭnańni ź minułym hodam.
Što da razvodaŭ, to ich stała mienš u pieršyja hady sumiesnaha žyćcia, ale pavialičyłasia kolkaść razvodaŭ paśla doŭhich šlubaŭ — prykładna praz 15—20 hadoŭ sumiesnaha žyćcia.
Taksama adznačajecca, što bolšaść razvodaŭ inicyjujuć žančyny. Najčaściej ich pryčynami nazyvajuć roznyja pohlady na žyćcio, adsutnaść ahulnych intaresaŭ i niesumiaščalnaść charaktaraŭ. Niaviernaść jak pryčyna składaje adnosna nievialikuju dolu.
Kamientary