Stała viadoma, na kaho rychtavała palityčny zamach mižnarodnaja hrupa, zatrymanaja ŭ Hrecyi i Litvie
Baškirski aktyvist, lidar ruchu za niezaležnaść Baškartastana Rusłan Habasaŭ, jaki ciapier žyvie ŭ Litvie, zajaviŭ, što mienavita jon moh być metaj palityčnaha zamachu na žyćcio, pra padrychtoŭku jakoha raniej paviedamili litoŭskija i hrečaskija ŚMI.
Raniej łitoŭskija i hrečaskija miedyja paviedamlali, što jašče ŭ minułym hodzie była vykrytaja złačynnaja hrupa, jakaja nibyta dziejničała ŭ supracoŭnictvie z rasijskimi śpiecsłužbami i rychtavała zabojstva ŭ Litvie. Mierkavanymi celami dla ich nazyvali 46‑hadovaha rasijskaha palityčnaha ŭciekača i adnaho litoŭskaha palityčnaha daradcu, ale ich imiony nie raskryvałasia.
46 hadoŭ z tych rasijan, jakija žyvuć u Litvie, maje baškirski aktyvist Rusłan Habasaŭ, i jon u zapisanym videa sam śćviardžaje, što havorka idzie pra jaho.
Rusłan Habasaŭ naradziŭsia ŭ 1979 hodzie, pavodle adukacyi historyk. Aktyŭna zajmacca hramadskaj i palityčnaj dziejnaściu pačaŭ u pačatku 2010‑ch hadoŭ. Razam z adnadumcami stvaryŭ arhanizacyju «Baškort» («Baškir»), jakaja zajmałasia abaronaj nacyjanalnych intaresaŭ baškiraŭ, u tym liku pytańniami movy, ekałohii i pradstaŭnictva ŭ orhanach ułady. U Rasii hetuju arhanizacyju paźniej pryznali ekstremisckaj i zabaranili.
Habasaŭ aktyŭna ŭdzielničaŭ u akcyjach pratestu i hramadskich kampanijach. Jon vystupaŭ za abaviazkovaje vyvučeńnie baškirskaj movy, krytykavaŭ ułady Baškartastana i padtrymlivaŭ ekałahičnyja inicyjatyvy, naprykład, suprać pramysłovaj raspracoŭki hary Kuštau.
Z-za cisku z boku ŭładaŭ suprać jaho nieadnarazova zavodzilisia kryminalnyja spravy, pravodzilisia dopyty i zatrymańni. Sam jon śćviardžaŭ, što heta było źviazana ź jaho palityčnaj dziejnaściu. U 2021 hodzie jon pakinuŭ Rasiju, spačatku źjechaŭ u Turcyju, a zatym pierajechaŭ u Litvu, dzie paprasiŭ palityčny prytułak. U 2022 hodzie hety prytułak jamu aficyjna dali.
Paśla vyjezdu za miažu jon praciahnuŭ aktyŭnuju dziejnaść: staŭ adnym ź inicyjataraŭ roznych mižnarodnych płatformaŭ, źviazanych ź idejami decentralizacyi Rasii i pravami narodaŭ. U toj ža čas u Rasii suprać jaho zaviali novyja spravy, u tym liku pa abvinavačańni ŭ ekstremiźmie, i ŭnieśli ŭ śpis «zamiežnych ahientaŭ». Taksama ŭ Rasii zatrymlivali jaho svajakoŭ.
U Litvie raskryli mižnarodnuju hrupu, što płanavała palityčnyja zabojstvy. Siarod złačyncaŭ jość biełarusy
Heta pieśnia na baškirskaj movie zavirusiłasia ŭ śviecie. Ale i vyklikała dyskusiju va Ukrainie
Maładyja baškiry fatahrafujucca to z nacyjanalnym ściaham, to z rasijskim impierskim. I prosiać prabačeńnia — va ŭsich pa čarzie
Dziermant zastupiŭsia za baškirskaha hieroja Sałavata Jułajeva. Heta nie spadabałasia Dziukavu
Amal usie čaty i supołki kałonij i SIZA Biełarusi pryznali ekstremisckimi farmavańniami. Pad pahrozaj tysiačy čałaviek5
Kamientary